Genese

18 KUA mama mairā Iehova kiaia i te au ale i Mamera: te noo ra aia i te ngutupa puakapa i te avatea:

2 Kua nānā akera oki tona mata ki runga e akara atura, e i na! e puke tangata toko toru, te tu ua maira ki mua iaia; e kite akera aia, oro atura aia e aravei ia ratou ra, mei te ngutupa puakapa mai, e kua tupou iora aia ki raro i te one,

3 E karanga atura, E taku Atu e, kia kie aroaia mai au e koe na, te anoano nei au, auraka e aere ua e akaruke mai ei i toou nei tavini:

4 Teia taku tuatua, e tiki matou i tetai manga vai, ei orei i to kotou vaevae, e akaangaroi ua ana kotou ki raro ake i te rakau nei.

5 E ka tiki oki au i tetai manga kai iti, kia maroiroi ake kotou, ka aere ei: i tae mai ei oki kotou ki ko nei ki to kotou nei tavini. E kua tuatua maira ratou, E akapera taau i tuatua mai ana.

6 Aere viviki aturā Aberahama ki roto i te puakapa kia Sara ra, e karanga atura, Ka oi vave ana i e toru āriki faraoa meitaki, ka tunu ei ei areto.

7 E oro atura oki a Aberahama ki te anana puakatoro ra, e opu maira i tetai punua meitaki, e te paruparu, kua tuku atura ki te tavini; kua maoa iora iaia kare i mamia.

8 Kua rave akera i te bata, ma te u, e taua punua i maoa ra, e kua tuku atura ki mua i to ratou aroaro; e kua tu ua iora aia i vaitata ia ratou, i raro ake i te rakau ra; e kua kai akera ratou.

9 Kua tuatua maira ratou kiaia, Teiea taau vaine ko Sara? E kua karanga atura aia, I na, tei te puakapa nei.

10 E kua tuatua maira aia, Ka oki mairai au kia koe na kia oki mai taua tuatau nei rai; e i na! e tamaitiia ta taau vaine ta Sara. Te akarongo mairā Sara i taua tuatua ra, tei te ngutupa puakapa, tei muri mai iaia.

11 Kua ruaine a Aberahama raua ko Sara, e manganui akera to raua mataiti, e te tuatau tamarikiiaʼi, kua topa ïa ia Sara.

12 Kua kata iorā Sara ki roto iaia uaorai, na ko akera, Ei rekareka tamaiti ainei toku, tei ruaine au, e kua ruaine katoa taku pu nei?

13 E kua tuatua mairā Iehova kia Aberahama, Eaa Sara i kataʼi, i na ko ei e, E tamaiti ainei taku tei ruaine au?

14 Te vai atura aina tetai mea e kore e tika ia Iehova? Kia tae ki te tuatau i akonoia ra, ka oki mai ei au kia koe nei, kia oki mai taua tuatau nei rai, e e tamaitiia ta Sara.

15 Kua uuna iorā Sara, na ko maira, Kare au i kata; kua mataku oki aia. Kua karanga atura aia, Eiaa, kua kata rai oki koe.

16 Tu akera aua nga tangata ki runga i reira ra, akara tika atura ki Sodoma: e kua aere katoa aturā Aberahama i te aru aere ia ratou.

17 E kua na ko akerā Iehova, E uuna ainei au nei ia Aberahama i taku e rave nei?

18 Ka riro oki a Aberahama ei enua maata, e te mana, e meitaki oki te pa enua katoa o te ao nei iaia.

19 Kua kite oki au e, e ako rai aia i tana tamariki, e tona ngutuare katoa, kia akono ratou i te tuatua a Iehova a muri atu, i te rave anga i te tuatua-tika e te tuatuatau; kia apai mai a Iehova kia Aberahama i tana i tuatua kiaia ra.

20 Kua tuatua mairā Iehova, No te mea, e aue maata to Sodoma, e to Gomora, e no te mea kua maata roa ta ratou ara;

21 E aere ana au ki raro, kia kite i te rave tika anga ratou, mei tei tae roa mai i te reo kiaku nei: e kare ra, ka kite rai au.

22 Kua ariu ke atura aua nga tangata ra, e aere tika atura ki Sodoma; tu ua iora rā Aberahama ki mua ia Iehova.

23 Kua akavaitata aturā Aberahama, e karanga atura, E akapou katoa aina koe i te tangata tuatua-tika, e te akono kore i te Atua?

24 Peneiake e rima ngauru ua tangata tuatuatika tei taua oire ra; e akapou rai koe, kare koe e akakore i te ara a to taua ngai ra, i taua au tangata tuatua-tika e rima ngauru i roto ra? 25 Auraka roa oki koe e akapera, e ta katoaia te tangata tuatua-tika e te akono kore i te Atua; e kia okotai katoa arite i te tangata tuatua-tika e te akono kore i te Atua, auraka rava ïa. Kare ainei e mea tika ta te Akava i to te ao katoa nei e rave? 26 E kua tuatua mairā Iehova, E rima ngauru tangata tuatua-tika e kitea e au i roto i taua oire ra ia Sodoma, ka matara iaku te ara a to taua ngai katoa ra ia ratou.

27 E kua karanga aturā Aberahama, na ko atura, I na, kua timata io nei au i te tuatua atu ki taku Atu, e e one-pueu oki au, e te reu ai:

28 Peneiake ko te kore e tae ki te rima o te ngauru anga i te tangata tuatua-tika ko te toe ua e rima; ka ta rai koe i taua oire katoa ra i taua toko rima e kore ra? Kua tuatua maira aia, E a ngauru ma rima te kitea e au i reira, kare ïa e mate iaku.

29 E kua karanga akaou atura aia kiaia, na ko atura, Peneiake e a ngauru anga te kitea atu i reira? Kua tuatua maira aia, Kare ïa au e rave i taua a ngauru ra.

30 E kua karanga atura aia, Auraka taku Atu kia riri, kia karanga atu au: peneiake e toru ua nei ngauru te kitea atu i reira ra.

31 Kua karanga atura aia, I na, kua tuatua ua atu rai au ki taku Atu; peneiake e rua ngauru te kitea atu i reira. Kua tuatua maira aia, Kare ïa au e ta i taua rua ngauru ra.

32 E kua karanga atura aia, Auraka taku Atu kia riri mai, okotai ua atu aku tuatua toe; peneiake okotai ua ngauru te kitea atu i reira. Kua tuatua maira aia, Kare ïa au e ta i taua okotai ngauru ra.

33 Kua akaoti akerā Iehova i tana tuatua ia Aberahama, aere atura; e kua oki maira oki a Aberahama ki tona ngai.