1 Samuela

12 KUA karanga aturā Samuela kia Iseraela katoa, I na, kua akarongo au i to kotou reo i te au mea ravarai ta kotou i tuatua mai kiaku ra, kua akaariki oki au i tetai ariki ki rungao ia kotou.

2 E teianei i na, kua na mua i kotou te ariki i te aere: kua ruaine oki au, e kua inainaia toku mimiti; e te noo ua nei aku puke tamariki i o kotou nei: e kua na mua au ia kotou i te aere mei toku ou anga mairai e tae rava akenei ki teianei rā.

3 I na, teia au; e akakite mai ana kotou kiaku ki mua i te aroaro o Iehova, e ki mua oki i te aroaro o tona tangata i akatainuia ra. Ko taai puakatoro tei raveia e au? E koai taku i akangere atu? Koai taku i takinga-kino atu? E i rave au i te tutaki i te rima oai ei akapo i toku mata? Ka akakite mai, e naku e akaoki atu.

4 Kua tuatua maira ratou, Kare koe i akangere mai ia matou, kare oki koe i takinga-kino mai ia matou, kare oki koe i rave i ta te tangata nei apinga.

5 Kua karanga atura aia ki ratou, Ko Iehova te kite, e tona tangata i akatainuia nei te kite, ia kotou i teianei rā e, kare a kotou apinga i kiteʼi i roto i toku nei rima. Kua tuatua maira ratou, Ko te kite ïa.

6 Kua karanga aturā Samuela ki te au tangata, Ko Iehova ïa ko tei akono ia Mose raua ko Aarona, e ko tei arataki mai i to kotou ai metua mei te enua maira mei Aiphiti.

7 E tenana, tu uaorai ana kotou, kia karangaranga ua ana au kia kotou, ki mua i te aroaro o Iehova, i te au takinga-meitaki katoa a Iehova ia kotou, e i to kotou ai metua ra.

8 Tae aturā Iakoba ki Aiphiti, e tautopa atura to kotou ai metua kia Iehova ra, kua tono aturā Iehova ia Mose raua ko Aarona, e kua arataki mai raua i to kotou ai metua mei Aiphiti mai, e kua akanoo ia ratou ki ko nei.

9 E ia ratou i akangaropoina i to ratou Atua ia Iehova, kua oko atura aia ia ratou ki te rima o Sisera, rangatira no te nuku o Hazora; e te rima oki o te Philiseti, e te rima oki o te ariki o Moabi, e kua tamaki maira ratou ia ratou.

10 E kua kapiki atura ratou kia Iehova, karanga atura, Kua ara matou, no te mea kua akatitima matou ia Iehova, e kua akamori matou i te rima o to matou nei au enemi, e e akamori matou ia koe.

11 Kua tono akerā Iehova ia Ieru-baala, e ia Bedana, e ia Iepheta, e ia Samuela, e kua akaora iora ia kotou i te rima o to kotou au enemi i pini ua ake, noo iora kotou ma te ora.

12 Kia kite io nei ra kotou i te ariki o te tamariki a Amona ia Nahasa, i te aerenga mai e tamaki ia kotou na, kua tuatua maira kotou kiaku, Auraka; ei ariki ra to matou ki rungao ia matou; e ariki oki to kotou ko to kotou Atua ra ko Iehova.

13 E tenana, i na taua ariki i ikiia e kotou na, ta kotou i anoano na! E i na, kua tuku oki a Iehova i tetai ariki ki rungao ia kotou na.

14 Kia mataku kotou ia Iehova, e kia akamori kotou iaia, kia akono oki i tona reo e kare e akatokā i te akauenga a Iehova, ei reira kotou, e te ariki katoa tei tutara ki rungao ia kotou, e aru tamou ei i to kotou Atua ra ia Iehova:

15 Kia kore ra kotou e akamako i te reo o Iehova, kia akatokā ra kotou i te akauenga a Iehova, ei rungao to Iehova rima ia kotou i reira, mei to kotou ai metua katoa ra.

16 E teianei, ka tu ua ana kotou, kia kite i teianei mea maata, ta Iehova e rave ki muao i to kotou na mata.

17 Kare ainei teia i te tuatau mou sitona ra? Ka tautopa au ia Iehova, e nana e tuku mai i te mangungu e te ua; kia akara kotou e kia kite kotou, e e kino maata tei raveia e kotou i mua i te aroaro o Iehova nei, kotou i pati mai i tetai ariki no kotou na.

18 Kua tautopa aturā Samuela ia Iehova: e kua tuku mairā Iehova i te mangungu e te ua i taua rā ra: mataku rava akera te au tangata ravarai ia Iehova e ia Samuela.

19 E kua tuatua maira te au tangata katoa kia Samuela, E pure oki i to Atua ra ia Iehova i to au tavini nei, kia kore matou e mate: kua kapiti katoa oki matou i teia ara ki ta matou au ara katoa ra, ko matou i pati i tetai ariki no matou nei.

20 Kua karanga aturā Samuela ki taua au tangata ra, Auraka e mataku: kua rave rai oki kotou i taua kino maata katoa nei; auraka ra kotou e tatipake i to kotou aru anga ia Iehova; e akamori ra kotou ia Iehova ma to kotou ngakau katoa ra;

21 Auraka oki kotou e anga ke, kia aru i te au mea puapinga kore ra, kare a ratou e puapinga, kare oki e tika kia akaora; e mea puapinga kore oki te reira.

22 No tona ra ingoa maate e kore ei a Iehova e akaruke i tona iti-tangata: kua tika oki ia Iehova i te akariro ia kotou ei iti-tangata nona.

23 Kareka au nei, auraka rava au e tukumoe i te pure ia kotou, ka ara ai au ia Iehova ra; ka apii rai au ia kotou i te arataa meitaki e te tikaoruua:

24 Kia mataku ra kotou ia Iehova, e akamori oki iaia ma te tuatua mou, ma to kotou ngakau katoa: e akamaara oki i te mea maata i raveia e ia no kotou na.

25 Kia rave tamou ra kotou i te mea kino ra, ka pou kotou i te mate, e to kotou ariki katoa ra.