Iosua

23 E MANGANUI akera te au rā tei topa i muri ake i ta Iehova oronga anga mai i te au kia Iseraela i to ratou au enemi ravarai e pini ua ake; e kua ruaine a Iosua, kua raʼi roa tona au rā.

2 Kua tiki aturā Iosua ia Iseraela katoa ra, to ratou aronga pakari, e to ratou aronga mataiapo tutara, e to ratou aronga akava, e to ratou aronga rangatira katoa ra, e kua karanga atura kia ratou, Kua ruaine au, kua raʼi toku au rā:

3 Kua kite oki kotou i te au mea ravarai ta to kotou Atua ta Iehova i rave i teia katoa nei au iti-tangata no kotou; ko to kotou Atua ra oki ko Iehova tei tamakai i ta kotou tamaki.

4 I na, kua tua keleroia e au teianei au motia i toe nei no kotou, ei nooanga no to kotou na au kopu, e te au motia katoa i pou iaku, mei Ioridana mai e tae rava akenei ki te tai maata i te opunga o te rā ra.

5 E ka eke ratou i to kotou Atua ra ia Iehova, ki mua ia kotou, e nana ratou e tuaru ke atu e ngaro atura i to kotou mata, e ka riro mai to ratou enua kia kotou; ta to kotou Atua ta Iehova i tuatua mai kia kotou na.

6 E tenana, e akamaroiroi kotou i te akono e te rave i te au mea katoa i tataia i roto i te buka ture a Mose ra, auraka kotou e anga ke i te reira ki te pae katau e te pae kaui;

7 Kia kore kotou e iropu ua atu ki taua au iti-tangata nei, ki te aronga e toe i roto ia kotou nei; auraka oki e akaiki ua atu, auraka oki e taputou i te ingoa o to ratou ra au atua, auraka oki e araara ia ratou, auraka oki kotou e tupou ki raro ki mua ia ratou;

8 Kia piri ra kotou ki to kotou Atua kia Iehova, mei ta kotou rai oki i pera ua ana e tae rava akenei ki teianei rā.

9 I eke ei te au tangata mamaata e te ririnui ki mua ia kotou ia Iehova; ko kotou ra, kare oki e tangata i mou mai ki mua ia kotou e tae rava akenei ki teianei rā.

10 Na te tangata okotai o kotou na e arumaki i te tangata katoa e kia tausani; na to kotou Atua oki na Iehova e tamaki i ta kotou tamaki, i tana i tuatua mai kia kotou na.

11 E tenana, kia matakite ia kotou uaorai, kia inangaro tikai kotou i to kotou Atua ia Iehova.

12 Kia oki ua atura kotou ki muri, kia piri atu ki te toenga o teianei au iti-tangata tei toe i rotopu ia kotou nei, ka akaipoipo ei ia ratou, e kapiti pu uaʼi i roto ia ratou, e ratou oki i roto ia kotou;

13 Kare to kotou Atua ra ko Iehova e tuaru akaou i taua au iti-tangata nei na mua ia kotou, kia kite pu tikai oki kotou; kia riro ra ratou ei kupenga, e ei ereere ia kotou; ei koko i to kotou kaokao, e ei tara i roto i to kotou mata; e pou ua atu kotou i teianei enua meitaki, ta to kotou Atua ta Iehova i oronga mai no kotou na.

14 E i na, te aere nei au i teianei rā na te arataa o to te ao katoa nei: kua kite oki kotou ravarai i roto i to kotou ngakau, e i roto i to kotou katoa au vaerua, e kare rava tetai o te au mea meitaki ta to kotou Atua ta Iehova i tuatua mai ia kotou i poka; kua ope rava i te tupu ia kotou, kare rava tetai o te reira i toe.

15 E mei te au mea memeitaki ravarai, ta to kotou Atua ta Iehova i tuatua mai kia kotou, i ope rava i te tupu ia kotou nei; koia katoa, ka apai mai a Iehova i te au kino ravarai ki runga ia kotou, e kia pou kotou iaia i taua enua meitaki nei, ta to kotou Atua ta Iehova i oronga mai no kotou na.

16 Kia akaatikau kotou i te koreromotu a to kotou Atua ra a Iehova, tana i akaue mai kia kotou na e, e akono, e kia aere kotou, e araara i te au atua ke, e kia tupou kotou ki raro ki mua ia ratou; ei reira te riri o Iehova e tupu ei ia kotou, e pou vave iora kotou i taua enua meitaki nei, tana i oronga mai no kotou na.