Iobu

33 E TENANA, e Iobu, ka akarongo mai koe i taku tuatua nei; e te au tuatua katoa naku nei, ko taau ïa e akarongo marie mai.

2 I na, kua akaamama au i toku vaa i teianei, tei roto i toku vaa toku arero i te tuatua anga.

3 Tei tika i taku ngakau, ko taku ïa e tuatua: e taku i kite ra, ko ta toku vaa ïa e tuatua atu ma te apa kore.

4 Na te Vaerua o te Atua au i anga, e na te aʼo o te Mana katoatoa toku ora.

5 Te tika ra ia koe, ka patoi mai; ka akatupati marie na i taau tuatua ki mua iaku nei, ka tu ketaketa ua mai na koe.

6 I na, ko taau rai oki i inangaro, ei kauono au na te Atua: e karakaraea katoa oki au i te anga angaia.

7 I na, kare koe e mataku mai i toku nei mekameka, kare oki toku rima e teiaa ki runga ia koe.

8 Koia tika rai, i tuatua ana koe i roto i oku nei pukai taringa, e kua rongo au i te aruru o taau tuatua, i te na ko anga e,

9 E viivii kore toku, kare e kino, kare aku ara; kare oki e kino i roto iaku:

10 I na, te kimi ra aia i te tapepe anga iaku, e enemi au nona i tona manako anga;

11 Te momono nei aia i oku vaevae ki roto i te patiti, e te akara matariki maira aia i toku nei au aerenga ravarai.

12 I na, kare koe e akatikaia i tenana tuatua, tera taku tuatua kia koe, e maata to te Atua i te tangata nei.

13 Eaa iora oki koe i māro atu ei iaia? kare oki aia e akakite mai i te au tuatua katoa nana.

14 E tataki tai ra ta te Atua tuatua anga mai, e tataki rua oki, kare ra i akonoia e te tangata nei.

15 I na roto i te moe, i te orama i te po ra, kia rokoia te tangata e te moe tinainai, i te takoto ua anga ki runga i te roi;

16 Ei reira aia e akapuataʼi i to te tangata nei taringa, e kua tuku mai i te ako ia ratou,

17 Ei akaariu anga mai nana i te tangata i tana angaanga, e kia ngaro atu te nengonengo o te tangata nei.

18 Te akaora nei aia i tona vaerua i te vaarua, e tona ora i te riro anga i te koke.

19 Kua akoia oki aia i te mamae i runga i tona roi, e te katikati anga o tona ra au ivi kare i tukumoe:

20 Te toanu ua ra tona manava i te kai, e tona ngakau i te kai meitaki roa.

21 Kua pou tona kiko, kare rava e kitea atu; e tona au ivi i kitea koreia ra, te tu ua nei ïa ki vao.

22 Te akavaitata ra oki tona vaerua ki te vaarua, e te ora nona ki te aronga akapou.

23 Naringa tei iaia tetai angela ei akakite i te tuatua, taki tai to roto i te tausani katoa ra, ei akakite ki te tangata i tona tiratiratu:

24 Ei reira aia e aroa mai ei iaia, e kua karanga e, E akaora iaia auraka kia tae ki te vaarua: kua kiteia e au te tapokiangaara.

25 E maata oki te poria o tona ra kopapa i to te tamariki ra: e oki aia ki te au rā o tona ou anga ra:

26 E pure aia ki te Atua, e ka aroa mai aia iaia: e akara oki aia i tona mata ma te rekareka: e tutaki mai oki aia i te tangata nei i tei tau i te tuatua-tika nana.

27 E te imene maira aia ki mua i te aroaro o te tangata nei, e te karanga nei aia e, Kua ara au e kua akamingi i te mea tika, e kare ua aku puapinga i rauka;

28 E akaora maira aia i tona vaerua i reira kia kore e tae ki te vaarua, e ka kite tona ora i te mārama.

29 I na, te rave nei te Atua i taau au mea katoa nei, kua tu rua, kua tu toru, i te tangata nei,

30 Ei akaoki mai i tona vaerua mei te vaarua mai, kia akamāramaia ki te mārama o tei ora nei.

31 E akono meitaki mai, e Iobu, e akarongo mai iaku: e noo muteki ua mai koe, kia karanga atu au.

32 E te vai na taau tuatua, ka tuatua mai: e tuatua koe, te inangaro nei oki au i te akatika ia koe.

33 E kare ra, e akarongo mai koe iaku; e muteki ua mai koe, e naku e apii atu ia koe i te pakari.