1 Ariki

6 TEI te a o te anere anga e varu ngauru ara o te mataiti, ka aere mai ei te tamariki a Iseraela mei te enua maira mei Aiphiti, tei te a ra o te mataiti i te au o Solomona i runga ia Iseraela, i te marama ko Zifa, koia te rua o te marama, i patu ei aia i te are o Iehova.

2 E taua are i akatuia e te ariki ra e Solomona no Iehova ra, e ono ïa ngauru i te kubiti i te roa, e rua ngauru i te pararauare, e toru ngauru i te kubiti i te teitei.

3 E te tomoanga i mua i te nao i taua are ra, okotai takau ïa kubiti i te roa, i aite katoa i te pararauare o te are; te pararauare okotai ïa ngauru i te kubiti ki mua atu i taua are ra.

4 E kua anga aia i te māramārama no taua are ra, kua akamouia ki te mea kopekapeka.

5 Kua anga oki aia i te pia rikiriki e pini ua ake, kua topiriia ki te pae patu are e kako rava ake, i to te nao e to te ngai-tuatua katoa; kua akapia aereia e ia e pini ua ake.

6 Ko te pia ki ko nei atu, e rima ïa kubiti i te pararauare, e tei rotopu atu, e ono ïa kubiti i te pararauare, e te toru ra, e itu ïa kubiti i te pararauare: i te pae i vao mai i taua are ra i akatoe akera aia i tetai ngai e pini ua ake, kia kore te au rango e akamouia i roto i te patu o taua are ra.

7 I te patu angaia oki taua are ra, i patuia ïa ki te toka akamaneaia, ou i apiia mai ei ra; e kare atura e amara, e te toki, e te au auri katoa, i te kitea anga i te kokina i roto i taua are ra, ka patuiaʼi ra.

8 Tei tei rotopu ake pia ra, e tomoanga ïa tei te pae katau i taua are ra: aere takanimo ua atura ratou ki runga e tae atura ki te pia i rotopu ra, e mei taua pia i rotopu ra e tae atura ki te toru ra.

9 I pera oki aia i te akatu anga i taua are ra, e oti akera; e kua tapoki i taua are ra ki te rango e te tapaanga arezi.

10 Kua anga iora oki aia i te au pia e pini ua ake taua are ra, e rima kubiti i te teitei: e akairi uaia iora ki rungao i taua are ra i te rango arezi.

11 Kua tae maira te tuatua a Iehova kia Solomona, na ko maira,

12 I tenana are taau e akatu ra, i aere koe i taku ra au akonoanga, e i rave koe i taku ra tuatua-tau, e kua akamako tikai koe i taku katoa au akauenga, kia tau to aerenga ki te reira; ka akatupu au i taku tuatua ia koe i reira, taku i tuatua ki to metua ra kia Davida.

13 E ka noo rai au i rotopu i te tamariki a Iseraela, kare oki au e akaruke i toku ra iti-tangata ia Iseraela.

14 Kua akatu akerā Solomona i taua are ra, e oti rava akera.

15 E oti akera te patu o taua are ra i te patuia, kua vaî akera aia i roto ki te rakau, ki te au tapaanga rakau arezi, mei te taua mai i taua are ra e tae rava akera ki rungao; kareka te taua i raro i taua are ra, kua tapoki aia i te reira ki te tapaanga berusi.

16 Kua tapoki akera aia i nga pae o taua are ra, ko te taua i raro e to runga katoa i nga paruru ra ki te tapaanga arezi, e okotai takau akera i te kubiti: i rave oki aia i te reira ei ngai-tuatua i roto ra, koia oki ei ngai-tapu rava ra.

17 Toe iora e a ngauru i te kubiti no te are i vao, no te nao.

18 I akatikitikiia te arezi i te are i roto ra, ei ponapona, e ei tiare puera: e arezi anake; kare rava e toka i kitea.

19 E taua are i roto ra, ko tei akonoia e ia ei ngai-tuatua ra, ei reira te aruna koreromotu a Iehova vai ei.

20 Tei mua atu nei pae i taua ngai-tuatua ra, e tai takau ïa kubiti i te roa, okotai takau oki ïa kubiti i te pararauare, okotai takau oki kubiti i te teitei: e kua tapokiia e ia ki te auro meitaki; e kua tapoki katoa aia i te atarau arezi.

21 I tapokiia a roto i taua are ra ki te auro meitaki e Solomona: e kua anga oki aia i te pirianganaoa auro no te paruru ki mua i te ngai-tuatua ra; e kua tapokiia te reira ki te auro.

22 E kua tapoki katoaia taua are katoa ra e ia ki te auro, e oti rava akera te are; e taua atarau katoa i vaitata i te ngai-tuatua ra, kua tapoki katoaia ki te auro.

23 E i roto i taua ngai-tuatua ra kua anga iora aia i nga kerubi olive e rua, okotai ngauru te kubiti i te teitei.

24 Okotai peau i taua kerubi ra, e rima ïa kubiti, e tetai peau i taua kerubi ra, e rima ïa kubiti; ko te peka o tetai peau e tae ua atu ki te peka o tetai peau, okotai ngauru ïa kubiti.

25 Okotai ngauru ïa kubiti to tetai kerubi: okotai rai ariteanga nga kerubi e rua ravarai, okotai rai tu.

26 Okotai ngauru kubiti te teitei i te kerubi okotai, e mei te reira katoa tetai kerubi.

27 Kua tuku akera aia i nga kerubi i rotopu i taua are i roto ra: e kua totoa akera nga peau o aua nga kerubi ra, e tukia atura te peau o tetai i te pae pia, e kua tukia katoa te peau o tetai kerubi i tetai pae pia; e kua tukia oki to tetai ra peau e to tetai i rotopu i taua are ra.

28 E kua tapokiia e ia aua nga kerubi ra ki te auro.

29 E kua akatikitiki aereia e ia taua paruru pia ra e mei te kerubi te tu, e mei te nu tamara, e te tiare puera, to roto e to vao katoa ra,

30 E kua tapokiia e ia te taua o taua are ra, to roto e to vao katoa, ki te auro.

31 Kua tarai iora aia i nga pa olive no te tomoanga i taua ngai-tuatua ra; te rakau no rungao i nga kopa ngutupa ra, e rima aiteanga e tau ïa i taua are ra.

32 E nga pa ra e olive ïa; e kua akatikitikiia e ia a rungao ki te kerubi, e te nu tamara, e te tiare puera ra, e kua tapoki i aua nga pa ra ki te auro; e kua akaauro katoa ki runga i nga kerubi, e nga nu tamara ra.

33 E kua tarai katoa oki aia i nga kopa olive no te pa o taua nao ra e a aro.

34 E berusi aua nga pa e rua ra: e rua kapaanga i tetai pa ka eeu ei, e rua oki kapaanga ki tetai pa ka eeu ei.

35 Kua akatikitiki iora aia i te kerubi ki rungao, e te nu tamara, e te tiare puera; e kua tapoki akera i te reira ki te auro akaaiteiteia ki ruangao i tei akatikitikiia ra.

36 Kua patu iora aia i te paepae i roto ra, e toru ïa tupati toka i taraiia ra, okotai oki tupati rango arezi.

37 Tei te a o te mataiti te tamou angaia te tango o taua are o Iehova ra, i te maram ara ko Zifa;

38 E tae akera ki te ngauru ma tai o te mataiti, i te marama ra ia Bula, koia oki te marama varu ra, oti rava akera taua are ra kare e vaʼi toe, ma tona ra oki tu tikai i akonoia ra. E itu akera ona mataiti i te akatu anga.