1 Ariki

7 KAREKA i te akatu anga a Solomona i tona uaorai are, okotai ïa ngauru i te mataiti e toru ara. E oti rava akera taua are nona ra.

2 Kua akatu akera i te are no te vaorakau i Lebanona ra: okotai anere kubiti i te roa, e rima oki ngauru kubiti i te pararauare, e toru ngauru kubiti i te teitei, i tukuia ki rungao i nga pou arezi e a tupati, e nga tea arezi ki rungao i taua au pou ra.

3 E i tapokiia i rungao i te arezi i runga i taua au tea i tukuia ki rungao i te au pou e a ngauru ma rima ra, okotai ngauru ma rima i te tupati okotai.

4 E toru oki tupati māramārama, e aua nga tupati e toru ra, kua anga tikai tetai māramārama ki tetai māramārama.

5 E te au ngutupa ravarai, e te au pou no taua au māramārama ra, i tarai akaaroaroia; e kua anga tikai tetai māramārama ki tetai māramārama e toru katoa tupati.

6 Kua anga iora aia i te tomoanga i te au pou ra; e rima ngauru te kubiti i te roa, e toru ngauru te kubiti i te pararauare: tei mua te tomoanga i taua au pou ra; e tetai pae pou e te rango patapatatue tei mua ïa.

7 E kua anga iora aia i tetai tomoanga no te terono ei reira aia akavaʼi i te tangata, koia te tomoanga akava anga: e kua tapokiia ki te arezi mei tetai pae taua e tae rava akera ki tetai pae.

8 E tona uaorai are e nooia e ia ra, e pia ïa tei muri mai i taua tomoanga ra, okotai rai tu angaanga. Kua anga iora oki a Solomona i tetai are no te tamaine a Pharao i moeia e ia ra, okotai rai tu e taua tomoanga nei.

9 E toka memeitaki anake aua nga are nei, e toka taraiia, i aiteia, kua kekeia ki te keke, to roto e to vao, mei te tango mai e tae ua mai ki runga i te oka ra, e kua pera katoa i vao ake i te paepae maata.

10 E toka memeitaki oki tei taua tango ra, e au toka mamaata, okotai ngauru te kubiti i te toka okotai, e varu kubiti i tetai toka.

11 E i rungao ra, e toka memeitaki ïa, e au toka taraiia, i aiteia, e te arezi.

12 E te paepae maata i vao ake, e toru ïa tupati toka tarai, okotai tupati tea arezi, no te paepae i roto i te are o Iehova ra, e no te tomoanga o taua are ra.

13 Kua tono akera te ariki ra ko Solomona, kua tiki maira ia Hirama mei Turi mai.

14 E tamaiti aia na tetai vaine takaua, no te kopu o Naphatali, no Turia ra te metua tane: ko tei kite ïa i te rave i te veo; kua ki rava aia i te karape, e te kite, e kua pikipiki aia i te rave i te au angaanga veo katoa ra. E kua aere maira aia ki te ariki ra kia Solomona, e kua rave iora i te au angaanga katoa nana.

15 Kua akato iora aia i nga pou veo e rua, okotai ngauru ma varu i te kubiti i te teitei i te pou okotai; okotai ngauru e rua ara te kubiti te taura e kako ei te pou okotai.

16 Kua anga iora oki aia i e rua tapoki veo akatoia ra, e tuku ki rungao i aua nga pou ra: e rima kubiti te teitei i tetai tapoki, e rima kubiti te teitei i tetai tapoki:

17 E te au kupenga kopekapeka, e te ei pirianganaoa, no aua nga tapoki ra i rungao i nga pou ra; e itu no tetai tapoki, e itu oki no tetai tapoki.

18 Kua anga iora oki aia i nga pou, ma te remuna e rua tupati, no rungao i nga tapoki i vai i runga i te kauru o nga pou ra, i akapiniia i te kupenga no tetai tapoki; e kua pera katoa oki i tetai.

19 E nga tapoki i rungao i nga pou ra, e a ïa kubiti, e angaanga akatiareia i roto i te tomoanga ra.

20 E i rungao ra, i te ngai i puengunu i vaitata i te kupenga, i runga i nga tapoki i vaoo i rungao ei nga pou e rua ra, e puke tupati remuna ïa; e rua anere i runga i tetai tapoki, e rua anere i runga i tetai tapoki.

21 E kua akatu akera aia i nga pou i roto i te tomoanga o te nao ra; e kua akatu akera aia i te pou i te pae katau, tapa iora i tona ingoa ko Iakina; e kua akatu akera aia i te pou i te pae kaui, tapa iora i tona ingoa ko Boaza.

22 E tei rungao i aua nga pou ra te angaanga akatiareia: oti rava akera te angaanga i nga pou ra.

23 Kua anga oki aia i tetai āriki-vai maata akatoia, tetai nia e tae ua atu ki tetai nia, okotai ngauru ïa kubiti, e mea takapuna ïa, e rima kubiti i te teitei; e toru ngauru te kubiti i te taura e pini ei kia akapini.

24 E i raro ake i taua nia ra, e ponapona i te akapini anga ïa, okotai ngauru i te kubiti okotai, i te akapini anga i taua āriki-vai maata ra: e rua tupati i taua au ponapona ra, okotai rai akato angaia, ka akatoaʼi te āriki-vai maata ra.

25 Ki runga i nga puakatoro okotai ngauru ma rua te vaio angaia; ko e toru ra, te akara tika ra ïa ki te pae i apatokerau, ko e toru oki, te akara tika ra ïa ki te pae i te opunga o te rā, ko e toru ra, te akara tika ra ïa ki te pae i apatonga, e ko e toru ra oki, te akara tika ra ïa ki te pae i te itinga o te rā ra: kua tukuia taua āriki-vai maata i rungao i aua nga puakatoro ra, tei roto anake nga toe ra.

26 E te patapatatue ra, mei te rima nei rai te pararauare, e te nia ra, mei te nia kapu ra ïa te tu i te anga angaia, mei te tiare lili ra. E rua tausani bato e ki ei.

27 Kua anga katoa oki aia i te turanga veo okotai ngauru: e a kubiti te roa i tetai turanga, e a oki kubiti te pararauare, e toru kubiti te teitei.

28 Teia te tu o te angaanga i aua nga turanga ra: te vai ra nga tea, e aronga tea ra teirotopuïa i nga tapa ra:

29 E taua aronga tea i rotopu i nga tapa ra, e liona ïa, e puakatoro, e te kerubi: e tei runga i aua nga tapa ra, i runga ake, e i raro ake oki i aua nga liona ra, e nga puakatoro, e puke ei tautau ua ïa.

30 E a porotata veo to te turanga okotai, e nga veo no roto ra: e tei nga poo e a ra, ko nga vaevae ïa, e vaevae akatoia i raro ake i taua āriki-vai ra, i te pae o nga topirianga katoa ra.

31 E te vaa ra tei roto ïa i te tapoki, okotai kubiti i te teitei: kareka te vaa i vao, aiteite ake okotai ïa kubiti, e kubiti toianga te rua, kua aite ki te angaanga o te turanga: e i vaitata i te vaa ra kua kotikotiia ïa e a aro, kare te mea takapuna, e te reira oki au tea.

32 E ko raro ake i taua au tea ra, ko nga porotata e a ïa; e kua akamouia nga pu i roto i taua turanga ra: te teitei o taua porotata ra, okotai ia kubiti, e kubiti toianga te rua.

33 E te angaanga i aua nga porotata ra, mei te angaanga porotata kariota te tu: ko nga pu i roto ra, e nga momonoanga ra, e nga tapa i vao ake, e nga tea, e mea akato anakeia ïa.

34 E a oki nga vaevae tei nga poo e a i taua turanga ra: e aua nga vaevae ra no te turanga tikai ïa.

35 E to rungao i taua turanga ra, kua akapiniia ïa ngai, okotai afa kubiti te teitei: e tei runga tikai i taua turanga ra, te au mangamanga, e te au tea, te vairanga.

36 E tei runga i te au tapaanga i rungao i te au mangamanga ra, e i runga katoa i te tapa, kua kokoti iora aia i te kerubi, e te liona, e te nu tamara, i te au ngai atea ra, ma nga ei tautau e pini ua ake.

37 I pera aia i te anga i nga turanga okotai ngauru ra: okotai ra akato anga, okotai rai aiteiteanga, okotai rai tu o aua nga mea katoa ra.

38 Kua anga iora aia i nga āriki-vai veo okotai ngauru: e a ngauru i te bato i te āriki-vai okotai: e a kubiti i te pararauare i te āriki-vai okotai: okotai āriki-vai ki runga i tona turanga okotai, i aua nga turanga okotai ngauru ra.

39 Kua tuku akera aia i nga turanga e rima ra i te pae katau o te are ra, e rima oki i te pae kaui i taua are ra: kua tuku akera aia i te āriki-vai i te pae katau i te poo i te itinga o te rā ra, e anga tika ki apatonga i taua are ra.

40 Kua anga katoa oki a Hirama i te au āriki-vai, e te au taipu, e te au kapu. Oti rava akera ia Hirama te au angaanga katoa tana i rave na te ariki ra na Solomona, no te are o Iehova:

41 Nga pou ra, e nga kapu no runga i nga tapoki i vaoo i runga i nga pou e rua ra; e nga kupenga ei tapoki i nga kapu i vaoo i runga i nga pou ra;

42 E a oki anere i te remuna no nga kupenga e rua ra, e rua tupati remuna no te kupenga okotai, ei tapoki i nga kapu e rua no runga i nga pou ra;

43 E nga turanga okotai ngauru ra, e nga āriki-vai i vaoo i runga i aua nga turanga okotai ngauru ra;

44 Okotai oki āriki-vai, e nga puakatoro okotai ngauru ma rua i raro ake i taua āriki-vai ra;

45 E te au pani, e te au taipu, e te au kapu ra: e taua au mea katoa nei, ta Hirama i anga na te ariki ra na Solomona, no te are o Iehova, e veo kakā anake ïa.

46 Tei te ngai mataataa i Ioridana te akato angaia ïa e te ariki, tei te ngai karakaraea i te va i Sukota e Zaretana.

47 E vaoo uaia iora taua au mea ravarai ra e Solomona, kare i aiteia, no te maata, kare oki i kitea te teiaa o taua veo ra.

48 Anga iora oki a Solomona i te au mea ravarai no te are o Iehova ra: te atarau auro ra, e te kaingakai auro, i vaooiaʼi te areto o te aroaro ra;

49 E nga vairanga lamepa auro meitaki ra, ei te pae katau e rima, ei te pae kaui e rima, i mua i te ngai-tuatua ra, e nga tiare, e nga lamepa, e nga pakoti auro,

50 Nga kapu ra, e nga matipi ra, e nga kapu i pipiia ra, e nga punu, e te āriki ai auro meitaki ra; e nga inere auro, no nga pa i te are i roto i te ngai-tapu roa ra, e no nga pa i te are o te nao ra.

51 Oti rava akera te au angaanga katoa i te raveia e te ariki ra e Solomona, no te are o Iehova. Kua apai mairā Solomona i te au mea i akatakaia e tona metua e Davida; i te ario, e te auro, e te au kapu, tei tukuia e ia ki roto i te uipaanga apinga no te are o Iehova.