Te Au Akava

10 E MURI ake ia Abimeleka kua tupu akerā Tola, te tamaiti a Pua, te tamaiti a Dodo, i te tangata Isakara ra, ei akaora ia Iseraela; e noo aia i Samira, i te maunga ra ko Epheraima.

2 E nana i akatika ia Iseraela e rua akera ngauru e toru ara i te mataiti, mate iora aia, e tanumia atura i Samira.

3 E muri ake iaia ra kua tupu akerā Iaira, e ngati Gileada, e kua akatika aia ia Iseraela e rua akera ngauru anga e rua ara i te mataiti.

4 E toru ngauru ana tamariki tamaroa, e toru ngauru oki asini ou ta ratou i akaoro, e toru ngauru oki o ratou vila, ko tei tuatuaia ra i Havota-iaira e tae ua akenei ki teianei rā, tei te enua ra i Gileada.

5 E mate iora oki a Iaira, e tanumia iora i Kamona.

6 Kua rave akaou iora oki te tamariki a Iseraela i te kino ki mua i te mata o Iehova, e kua araara i te au Baala, e te au Asetoreta, e te au atua o Arama, e te au atua o Sidona, e te au atua o Moabi, e te au atua o te tamariki a Amona, e te au atua o te Philiseti; e kua akaruke ratou ia Iehova, kare ratou i akamori iaia.

7 Tupu akera te riri o Iehova ia Iseraela, e kua tuku atura aia ia ratou ki te rima o te Philiseti, e te rima o te tamariki a Amona ra.

8 Kua taeko ratou e kua tinai-mate i te tamariki a Iseraela i taua tuatau ra, e okotai ngauru e varu ara i te mataiti, te au tamariki katoa a Iseraela i tetai pae Ioridana, i te enua o te ngati Amori i Gileada ra.

9 E kua aere oki te tamariki a Amona ki tetai pae Ioridana, e tamaki katoa ia Iuda, e ia Beniamina, e te ngutuare o Epheraima; tumatetenga maata rava atura to Iseraela.

10 Kua kapiki iora te tamariki a Iseraela kia Iehova, na ko atura, Kua ara matou ia koe, no te mea kua akaruke matou i to matou Atua, e kua araara katoa i te au Baala.

11 Kua tuatua mairā Iehova ki te tamariki a Iseraela, Kare ainei au i akaora ia kotou i to Aiphiti ra, e te ngati Amori ra, e te tamariki a Amona ra, e te Philiseti ra? 12 E to Sidona oki, e to Amaleka, e kua tinaimate mai to Maona ia kotou, e kua tautopa mai kotou iaku, kua akaora iora au ia kotou i to ratou rima.

13 Kua akaruke rai kotou iaku, kua araara i te au atua ke: e teianei kare au e akaora akaou ia kotou.

14 Ka aere, ka kapiki atu ki te au atua ta kotou i iki ana; ka akaoraʼi ratou ia kotou i to kotou tumatetenga ra.

15 Kua karanga atura te tamariki a Iseraela kia Iehova, Kua ara matou: ka rave koe i taau e anoano i te rave ia matou nei; teia ra ta matou tuatua kia koe, ka akaora ua mai ana koe ia matou i teianei rā. 16 Kua akaruke iora ratou i te au atua ke i rotopu ia ratou ra, e kua akamori ia Iehova ra; tangi atura tona ngakau i te mate maata o Iseraela.

17 Kua uipa te tamariki a Amona, e kua patia i te puakapa i Gileada, kua akaputuputu iora oki te tamariki a Iseraela, e kua patia i te puakapa i Mizepa.

18 Kua tuatua akera te aronga mamaata i Gileada, ratou ratou uaorai, Koai te tangata e tiki e tamaki i te tamariki a Amona? ei runga ïa tangata i to Gileada katoatoa ra.