Ruta

4 KUA aere iorā Boaza ki te ngutupa oire, noo iora i reira: e i na, kua aere maira taua tane i karangaia e Boaza ra na te pae; kua karanga aturu aia kiaia, E tama, e ko mea; ka anga mai ana, ka noo ana ki raro i ko nei. Kua anga maira aia, e kua noo iora ki raro. 2 Kua karanga atura aia ki nga tangata pakari o taua oire ra tino ngauru ra, na ko atura, Ka noo ana kotou ki raro i ko nei. E kua noo iora ratou ki raro.

3 Kua karanga atura aia ki taua tane ra, Ko Naomi, i oki maira mei te enua maira mei Moabi, te oko nei aia i te manga kainga o to tatou taeake o Elimeleka;

4 I manako akenei oki au e, e akakite atu kia koe, e na ko atu, e oko koe i taua kainga ra ki mua i te aroaro o te tangata o te oire nei, e ki mua i te aroaro o te aronga pakari i toku nei au tangata. Kia tika ia koe i te oko ra, ka oko: kia kore ra e tika ia koe i te oko ra, ka akakite mai kiaku kia kite au: kare atu oki e tangata e tau ei kia oko mari ra ko koe; e ko au oki i muri ake ia koe. Kua tuatua maira aia, Naku ïa e oko. 5 Kua karanga aturā Boaza, I te rā e oko ei koe i te kainga i te rima o Naomi ra, ko Ruta ngati Moabi katoa ïa, ko te vaine a tei mate ra, i te oko katoa angaia e tikaʼi, kia iri te ingoa o tei mate ra ki runga i tona kainga.

6 Kua tuatua taua tane ra i reira, Kare atura e tika iaku kia oko noku, ko te kino aea toku nei kainga: e oko koe i toku ra noou; kare e tika iaku nei kia oko.

7 Teia oki ta to Iseraela peu i muatangana ra, i te oko anga, e te o atu o mai anga oki, kia mou te au tuatua katoa ra; e kiriti tetai i tona tamaka, ka tuku atu ei ki tetai: e riro atura te reira ei kite tikai ia Iseraela nei. 8 I tuatua mai ei taua tane kia Boaza ra e, Ka oko koe i taua kainga noou. E kua kiriti i tona tamaka. 9 Kua karanga akerā Boaza ki te aronga pakari, e te au tangata katoa ra, Kua riro kotou ei kite i teianei rā e, kua oko au ia Naomi i te au mea ravarai a Elimeleka, e te au mea katoa a Kiliona e ta Mahalona katoa.

10 Kua oko katoaia e au te vaine a Mahalona ko Ruta ngati Moabi, ei vaine naku, kia iri te ingoa o tei mate ki runga i tona kainga, kia kore e ngaro te ingoa o tei mate ra i roto i tona ai taeake, e i te ngutupa o tona oire: ko kotou nga kite i teianei rā.

11 Kua tuatua maira te au tangata ravarai i noo i taua ngutupa oire ra, e te aronga pakari, Ei kite ïa matou: kia akariro a Iehova i tenana vaine e aere mai ki to are na, mei ai Rahela e mei ia Lea ra, i nga vaine i maataʼi te ngutuare o Iseraela ra; e kia apinga nuiia koe i Epherata, e kia rongonui koe i Betelehema nei. 12 E kia riro toou ngutuare mei te ngutuare o Phareza, ta Tamara i anau ia Iuda ra, i te tamariki ta Iehova e oronga mai naau i teianei vaine ou.

13 Kua rave iorā Boaza ia Ruta, riro maira aia ei vaine nana: e kia moe aia iaia ra, kua oronga mairā Iehova i te nui iaia, e anau maira tana e tamaiti.

14 Kua karanga atura te au vaine ra kia Naomi, Kia akameitakiiā Iehova, koia kare i akaruke ia koe i teianei rā ma te tauturu kore, e ka rongonui tona ingoa i Iseraela nei:

15 E riro aia ei akapumaana ia koe, e ei tauturu ia koe i to ruaine anga; na to unonga oki, na tei aroa ia koe ra, e te meitaki maata ia koe i te tamariki e kia itu ua atu, nana aia i anau. 16 Kua rave iorā Naomi i taua tamaiti ra, e tuku akera ki runga i tona umauma, e riro atura aia ei ikiiki iaia.

17 E na te au vaine tupu ra i tapa i tona ingoa, tuatua akera, E utaro ta Naomi kua anau; e tapa iora ratou i tona ingoa ko Obeda: ko te metua aia no Iese, i te metua no Davida ra. 18 Teia oki te uanga o Phareza: anau akera ta Phareza ko Hezerona,

19 E anau akera ta Hezerona ko Rama, e anau akera ta Rama ko Aminadaba,

20 E anau akera ta Aminadaba ko Naasona, e anau akera ta Naasona ko Salamona,

21 E anau akera ta Salamona ko Boaza, e anau akera ta Boaza ko Obeda,

22 E anau akera ta Obeda ko Iese, e anau akera ta Iese ko Davida.