2 Paraleipomeno

8 E OPE akera te au mataiti okotai takau ra, kua oti akera ia Solomona te are o Iehova, e te are nona uaorai,

2 Kua patu akerā Solomona i te au oire i akaokiia mai e Hirama kia Solomona, e kua akanoo i te tamariki a Iseraela i reira.

3 Kua aere iorā Solomona ki Hamata-zoba, e rauka iora iaia.

4 Kua akatu iora aia ia Tadamora i te medebara ra, e te au oire vairanga apinga katoa, i patuia e ia i Hamata.

5 Kua akatu oki aia ia Bete-horona i runga ra, e ia Bete-horona i raro ra, ko nga iore akaketaketaia ki te au patu, e te au ngutupa, e te au tea;

6 E ia Baalata, e te au oire vairanga apinga katoa na Solomona, e te au oire katoa no te au kariota, e te au oire no te aronga akaoro oroenua ra, e te au mea katoa ta Solomona i anoano i te patu i Ierusalema, e i Lebanona, e i te enua katoa o tona ra basileia.

7 Ko te au tangata katoa i toe i te ngati Heta, e te ngati Amori, e te Perizi, e te ngati Heva, e te ngati Iebusi, kare i to Iseraela ra,

8 E tamariki ra na te aronga i vaooia i runga i te enua ra, tei kore i pou i te tamariki a Iseraela, ko ta Solomona ïa i akataka ei tautaūnga e tae rava akenei ki teianei rā.

9 Kareka te tamariki a Iseraela, kare i akataviniia ratou e Solomona kia rave i tana angaanga; ei tangata ïa no te tamaki, e ei aronga tutara no te au rangatira nona, e ei aronga rangatira no te au kariota, e no te aronga akaoro oroenua nona ra.

10 E maata te au rangatira no te ariki ra no Solomona, e rua ïa anere e rima ngauru, ko tei rungao ïa i te tangata.

11 Kua arataki mairā Solomona i te tamaine a Pharao mei roto mai i te oire o Davida, ki te are i akatuia e ia nona ra: i karanga oki aia e, Auraka taku vaine e noo i te are o te ariki o Iseraela o Davida, no te mea kua tapu ïa are i te aruna a Iehova i tae mai i reira.

12 Kua apai aturā Solomona i te au atinga karakaratio na Iehova, ki runga i te atarau a Iehova, i akatuia e ia ki mua i te tomoanga ra;

13 I te au rā katoa i te apai anga i tei akaueia mai e Mose, i te au sabati, e te au marama ou, e te au rā oroa tapu, e toru apai anga i te mataiti okotai, i te oroa i te areto akaopue kore, e te oroa no te au ebedoma, e te oroa no te patia anga puakapa ra.

14 Kua akataka atura i tei akonoia e tona metua e Davida i te au pupu taunga i ta ratou ra taoonga, e te ngati Levi i ta ratou i ikuikuia mai, kia akameitaki e kia rave i ta ratou angaanga i mua i te aroaro o te kau taunga ra, i tei akonoia i te au rā katoa ra: e te au tiaki ngutupa i to ratou ra au pupu, i te au ngutupa katoa ra: kua pera mai oki te tangata no te Atua ra ko Davida i te akaue anga mai.

15 E kare ratou i akaruke i te akaue a te ariki ki te kau taunga e te au ngati Levi, i te au mea katoa ra, e te au apinga.

16 Kua oti i te akonoia te au angaanga ravarai a Solomona, mei te rā mairai i akamouiaʼi te tango o te are o Iehova, e tae ua atu ki te akaoti takiri anga ra. Kua oti takiri rava oki te are o Iehova ra.

17 Kua aere aturā Solomona ki Eziona-gebera, e ki Elota i te pae i taatai ra i te enua ra ko Edoma.

18 Kua akau aturā Hirama i te au pai nana, i te rima o tona au tavini, e te aronga karape i te angaanga moana; e kua aere atura ratou e te au tavini katoa o Solomona ki Ophira, e kua rave maira i te au taleni auro e a anere e rima ngauru, e kua apai maira ki te ariki ra kia Solomona.