1 Ariki

10 E KITE akera te ariki vaine i Seba i te rongo ia Solomona i te ingoa o Iehova, kua aere maira aia e ui kiaia i te tuatua pikipiki ra.

2 Koia ma te urupu maata rava i te tae anga mai ki Ierusalema; ma te kamela i te apai anga mai i te rakau kakara, e te auro maata ua atu, e te toka memeitaki; e tae atura aia kia Solomona, kua karangaranga atura aia iaia i te au tuatua ravarai i roto i tona ngakau.

3 Kua matara maira ia Solomona te au mea ravarai tana i ui maira, kare rava ana tuatua ngaro i te ariki tei kore i akakiteia atu kiaia.

4 E kite akera taua ariki vaine i Seba ra i to Solomona pakari maata, e te are i akatuia e ia,

5 E te kai i tana ra kaingakai, e te nonoo anga o tona au tavini, e te tu anga o te aronga i piri kiaia ra, e to ratou kakau, e te aronga apai kapu nona; e te kakenga nona i aere ei aia ki runga ki te are o Iehova; kare atura e vaerua o roto iaia.

6 Kua karanga atura aia ki te ariki, E tuatua-mou rai taku i rongo i toku ra enua, i taau ravenga e toou pakari.

7 Kare ra au i akarongo i taua au tuatua ra, e kia tae maira au, e kite pu akenei oku mata nei: e i na, kare rai te afa i akakiteia mai kiaku nei: kua maata rava atura toou pakari e toou mana i tei akarongoia e au ra.

8 E ao to te au tangata noou nei, e ao to teia au tavini noou, e tu ua rai i vaitata ia koe nei, ka akarongo ei i te tuatua pakari naau ra!

9 Kia akameitakiia to Atua, ko Iehova, ko tei mataora mai ia koe, e kua akanoo ia koe ki runga i te terono o Iseraela nei; no to Iehova aroa mutu kore ia Iseraela, i akariro ei aia ia koe ei ariki, ei rave i te tuatua-tau e te tuatua-tika.

10 E kua oronga atura aia i te auro na te ariki okotai anere e rua ngauru i te taleni, e te rakau kakara e mea maata, e te toka memeitaki: kare atu e rakau kakara i te maata i tae mai, mari ra ko tei orongaia mai e te ariki vaine i Seba, ki te ariki ra kia Solomona.

11 E te au pai katoa o Hirama, i tei uta mai i te auro mei Ophira mai, kua uta katoa mai i te rakau ra, i te alamuga, mei Ophira mairai, e mea maata roa, e te toka memeitaki.

12 Kua rave iora te ariki i taua rakau ra i te alamuga ei toko no te are o Iehova, e no tona uaorai are, e te kinura, e te nabala, na te aronga imene ra: kare ïa alamuga i te tae anga mai, e te kitea anga, e tae rava akenei ki teianei rā.

13 Kua oronga atura te ariki ra ko Solomona i ta te ariki vaine i Seba i anoano ra, i te au mea ravarai tana i pati ra, taka atura ta Solomona i oronga atu kiaia i tei tau ki te ariki ra. Oki atura aia, aere atura ki tona uaorai enua, koia ma tona au tavini.

14 E te teiaa o te auro i tae mai kia Solomona i te mataiti okotai ra, e ono ïa anere e ono ngauru ma ono i te taleni auro:

15 Te taka atura tei rauka mai iaia i te aronga i akaputuputu ra, e ta te aronga i oko i te rakau kakara ra, e ta te ui ariki i Arabia ra, e te aronga tutara o te enua ra.

16 Kua anga iora te ariki ra ko Solomona i te paruru e rua anere, e auro tupakiia; okotai paruru ra e ono ïa anere sekela auro.

17 Kua anga iora oki aia i e toru anere paruru, e auro tupakiia; okotai paruru e toru ïa mina i te auro: kua tuku akera te ariki i te reira ki roto i te are i te vaorakau i Lebanona ra.

18 Kua anga iora te ariki i te terono maata nio elephana ra, e kua vaî ki te auro meitaki ra.

19 E ono takainga to taua terono ra, e mea takapuna ïa i muri mai: e te vai ra te mouranga-rima i te nooanga i tetai pae, e tetai pae, e nga liona e rua i te tu anga i vaitata i aua nga mouranga-rima ra.

20 E te au liona okotai ngauru ma rua i tetai pae e tetai pae i te tu ua anga ki runga i nga takainga ra e ono ra. Kare rava ïa mea i te anga angaia i te au basileia katoa ra.

21 E te au kapu inu ravarai a te ariki ra, a Solomona, e auro anake ïa, e te au āriki ravarai i te are i te vaorakau i Lebanona, e auro meitaki anake ïa; kare rava e mea ario; kare i akonoia ei apinga i te au rā o Solomona ra.

22 E pai Taresisa to te ariki tei te moana, e te au pai katoa o Hirama i Taresisa ra; okotai rai riro anga e toru katoa mataiti; i te apai anga mai i te auro, e te ario, e te nio elephana, e te kuri-tangata, e te pipi manea.

23 Tu ke rava atura te ariki ra ko Solomona i te apinga e te pakari i te ui ariki katoa i te ao nei.

24 Kua kimi maira to te ao katoa nei ia Solomona, kia akarongo ratou i tana tuatua pakari i tukuia mai e te Atua ki roto i tona ngakau.

25 E kua apai ratou, te tangata katoa ra, i tana uaorai taoonga-rima, i te au mea ario, e te au mea auro, e te kakau, e te taoonga tamaki, e te rakau kakara, e te oroenua, e te mule, ei apinga, to tera mataiti, to tera mataiti.

26 Kua akaputuputu iorā Solomona i te kariota, e te au tangata akaoro oroenua; okotai tausani e a anere ona kariota, e okotai ngauru ma rua i te tausani i te au tangata akaoro oroenua; ko tei akanooia e ia i roto i te au oire kariota, e i te ariki i Ierusalema.

27 Riro atura te ario i te ariki, mei te toka ra te tu i Ierusalema: e te arezi mei te sukamino i te o ra, i te maata.

28 E aronga oroenua tei apaiia mai mei Aiphiti maira na Solomona; na te urupu tangata oko o te ariki i rave i taua anana oroenua ra ma te akono i te oko mou ra.

29 E rauka maira e kua apaiia maira te kariota okotai mei Aiphiti mai i te au sekela ario e ono anere, e te oroenua ra, okotai ïa anere e rima ngauru; e mei te reira katoa kia apaiia mai e ratou na te au ariki ngati Heta ra, e te au ariki i Arama ra.