Exodo

35 KUA akaputuputu iorā Mose i te uipaanga katoa ra i te tamariki a Iseraela, e karanga atura kia ratou, Teia te tuatua i akaueia mai e Iehova, kia rave kotou i te reira.

2 E tika kia rave i te angaanga i nga rā e ono ra, kareka te rā itu ra, ei rā tapu ia no kotou, e sabati akaangaroi anga no Iehova: ko te rave i te angaanga i te reira rā, ka tamate ravaia ia.

3 Auraka roa kotou e taʼu i te ai i te rā sabati i to kotou au are katoa e pini ua ake.

4 Kua karanga atu rai a Mose ki te uipaanga katoa o te tamariki a Iseraela ra, na ko maira, Teia ta Iehova tuatua i akaue mai, na ko maira,

5 E rave kotou i te atinga na Iehova no roto ia kotou uaorai nei: ko te tangata ngakau oronga, e apai mai aia i te reira, koia te atinga na Iehova; i te auro, e te ario, e te veo,

6 E te kakau kerekere, e te purapura, e te muramura, e te orongā, e te uru puakanio,

7 E te kiri mamoe i rapakau muramuraia ra, e te kiri tutu, e te rakau ra e sitima,

8 E te mori no te lamepa, e te rakau kakara no te manongi tainu ra, e no te atinga kakara ra,

9 E te au toka sema, e te au toka ei taroto, no te tiputa, e te tapoki umauma.

10 E ka aere mai oki te au tangata ngakau pakari katoa i roto ia kotou, e anga i te au mea ravarai i akaueia mai e Iehova ra;

11 I te puakapa, tona are, e tona tapoki, tona au tapeka, e tona au tapaanga rakau, tona au tea, tona au pou, e tona au turanga;

12 I te aruna, e nga amo, te tapoki, e te paruru ei arai ra;

13 Te kaingakai, e nga amo, e te au mea ravarai no te reira, e te areto o te aroaro ra;

14 Te vairanga lamepa oki ei akamārama, e te au mea ravarai no te reira ra, e te au lamepa e te mori ei turama,

15 E te atarau atinga kakara ra, e nga amo, e te manongi akatainu, e te atinga kakara ra, e te paruru ngutupa no te tomoanga o te puakapa ra;

16 Te atarau atinga karakaratio, e tona paata veo ra, nga amo, e te au mea ravarai no te reira ra, te āriki vai e tona vaevae;

17 Te au paruru paepae ra, te au pou e te au turanga, e te paruru no te ngutupa paepae ra;

18 Te au titi no te puakapa, e te au titi no te paepae, e te au taura;

19 Te au kakau taoonga, kia rave i te taoonga ki roto i te ngai-tapu ra, te kakau tapu no te taunga ra no Aarona, e te au kakau no tana au tamariki, no te rave anga i te taoonga taunga ra.

20 Aere anake atura taua uipaanga tamariki a Iseraela mei mua atu i te aroaro o Mose.

21 E kua aere maira ratou, te tangata katoa i tae tona ngakau, te aronga katoa i tika to ratou ngakau, kua apai maira ratou i te atinga na Iehova, no te angaanga i te Are uipaanga ra, te au peu ravarai oki no te reira ra, e no te au kakau tapu ra.

22 Ko te tane, e te vaine katoa, tei tae te ngakau ra, kua aere katoa mai ïa, kua apai maira i te tapeka, e te poe, e te momonorima, e te ei, e apinga auro anake; e ko te au tangata katoa i apai i te atinga ei atinga auro anake ta ratou na Iehova.

23 E te aronga e kakau kerekere to ratou, e te purapura, e te muramura, e te orongā, e te uru puakanio, e te kiri mamoe rapakau muramuraia, e te kiri tutu, kua apai mai ïa ratou.

24 E te aronga i apai mai i te atinga ario, e te veo, kua apai mai i te atinga na Iehova; e te aronga e rakau sitima tei ia ratou, e tau i taua angaanga katoa ra, kua apai mai ïa.

25 E te au vaine ngakau kamaatu katoa ra, kua iro to ratou rima i te ao, e kua apai mai i tei irokia e ratou ra, i te ao kerekere, e te purapura, e te muramura, e te orongā.

26 E te au vaine katoa i kamaatu, tei tae te ngakau ra, kua taviriviri ratou i te uru puakanio.

27 E kua apai maira te aronga tutara i te au toka sema, e te au toka ei taroto, no te tiputa, e te tapoki umauma;

28 E te rakau kakara e te mori, no te mārama e no te manongi akatainu ra, e no te atinga kakara ra.

29 E apinga ngakau tae ta te tamariki a Iseraela i apai mai na Iehova, te au tane, e te au vaine katoa, tei anoano te ngakau i te apai mai, no te au angaanga ravarai ta Iehova i akaue mai ia Mose kia raveia.

30 Kua karanga aturā Mose ki te tamariki a Iseraela, I na, kua tuatua akenei a Iehova i te tamaiti a Uri te tamaiti a Hura, no te kopu o Iuda, i tona ingoa, ia Bezaleela;

31 E kua akaki aia iaia ki te Vaerua o te Atua, i te karape, te pakari, e te kite i te angaanga tini ravarai ra;

32 Ei kimi oki i te angaanga pakari ra, ei rave i te angaanga auro, e te ario, e te veo;

33 E kokoti oki i te toka, kia akamouia ki roto i te vairanga ra, ei kokoti rakau oki, e ei rave i te au angaanga manea ravarai nei.

34 E kua akakite aia iaia kia apii aia i etai ke ra, raua ko Aholiaba, te tamaiti a Ahisamaka, no te kopu o Dana ra.

35 Ko tana ïa i akaki i te pakari ngakau, ei rave i te angaanga tini ravarai ra, i ta te kokoti toka ra, e ta te taunga karape ra, e ta te akamanea kakau ra, i te kakau kerekere, e te purapura, e te muramura, e te orongā, e ta te raranga kakau ra; tei rave i te au angaanga ravarai, e tei kimi i te au ravenga karape.