Deuteronomi

34 AERE aturā Mose mei te ngai mataataa i o Moabi ra ki runga i te maunga ra ko Nebo, ki runga i te take o Pisega ra, i aite ki Ieriko ra; E kua akakite mairā Iehova kiaia i te enua katoa ra i Gileada, e tae ua atura ki Dana.

2 E te enua katoa o Naphatali ra, e to Epheraima, e to Manase, e te enua katoa o Iuda, e tae ua atura ki te tai i te opunga o te rā ra,

3 E te pae i apatonga ra, e te ngai mataataa ra i te o i Ieriko ra, i te oire nu tamara ra, e tae ua atura ki Zoara.

4 Kua tuatua mairā Iehova kiaia, Ko te enua teia taku i taputou atu kia Aberahama, kia Isaaka, e kia Iakoba, i te tuatua anga atu e, E oronga au i te reira no toou uanga: kua akakite au kia koe i taua enua nei, kia kite to mata, kare ra koe e tae ki reira.

5 Kua mate iora te tavini o Iehova ra ko Mose i reira, i te enua ra i Moabi, i ta Iehova i tuatua maira.

6 E nana aia i tanu i tetai o, i te enua i Moabi ra, i vaitatao i Bete-peora: kare rava ra e tangata i kite i tona tanumanga, e tae rava akenei ki teianei rā.

7 Okotai akera anere e rua ngauru o Mose ra mataiti i mate ei aia: kare tona mata i avarevare, kare oki tona maroiroi i iti.

8 Aue iora te tamariki a Iseraela ia Mose i taua ngai mataataa i o Moabi ra e toru akera ngauru anga o te rā; ope akera taua au rā aue anga, e te akaevaeva anga ia Mose ra i reira.

9 E ki akerā Iosua te tamaiti a Nuna ki te vaerua pakari; kua tuku oki a Mose i tona rima ki runga iaia: e kua akarongo te tamariki a Iseraela kiaia, e kua akono ratou i ta Iehova i akaue mai kia Mose ra.

10 E mei reira mairai kare rava e peroveta i tupu i roto ia Iseraela mei ia Mose te tu, i ta Iehova i kite pu atu i te mata e te mata;

11 I te au akairo katoa e te au mea umere, ta Iehova i tono iaia e rave i te enua ra i Aiphiti, kia Pharao, e tona au tavini ravarai, e tona enua katoa ra;

12 E i taua rima mana katoa ra, e taua au mea mataku maata katoa ra, i ta Mose i rave ki mua i te aroaro o Iseraela katoa ra.