Levitiku

7 TEIA oki te ture no te tutakingaara: e mea tapu roa ïa.

2 Ei te ngai ta ratou e ta i te atinga karakaratio ra, ei reira ratou e ta ai i te tutakingaara; e ka pîpîia te toto ki rungao i te atarau e pini ua ake. 3 Ka apai aia i te matu katoa i te reira; te iku ra, e te matu i rungao i te au mea i roto ra,

4 E nga pukuatu ra, e te tongaua ki rungao, i te îo kaoko ra, e te ekaeka i rungao i te ate ra; ma nga pukuatu katoa, ka kiritiia ïa:

5 E na te taunga e taʼu ki runga i te atarau ra, ei atinga ai na Iehova: e tutakingaara oki te reira.

6 E kai te au tane katoa no roto i te kau taunga i te reira: ei roto ra i tetai ngai tapu ra kai ei: e mea tapu roa ïa.

7 Mei te tarangaara ra, koia katoa te tutakingaara; okotai rai ïa ture to te reira: na te taunga te reira, na tei apai i te reira ei tapokiangaara.

8 E te taunga e apai i ta te tangata katoa ra atinga karakaratio, ko te kiri ra o taua atinga karakaratio ra tana i apai ra, na te taunga uaorai ïa.

9 E te au atinga kai katoa i taonaia ki te umu ra, e tei tunuia i roto i te faraipane, e ki runga i te auri, na te taunga ïa na tei apai ra.

10 E te au atinga kai katoa i irokia ki te inu, e te mea marō katoa, na te au tamariki ravarai ïa a Aarona, e kia aite katoa ratou.

11 Teia oki te ture no te atinga au, ta te tangata e apai kia Iehova ra.

12 Ei akameitaki i apai ei aia i te reira ra, e apai aia i te areto rikiriki akaopue koreia e taua atinga akameitaki katoa ra, i irokia ki te inu ra, e te uefa akaopue koreia i tainuia ki te inu ra, e te areto faraoa pueu tamarōia, i irokia ki te inu.

13 Ko taua au areto ra, e te areto akaopue katoa tana e apai ei atinga nana, e te atinga au akameitaki katoa nana ra.

14 E tataki tai aia i te apai na Iehova i taua au mea katoa i taua atinga ra, ei atinga apaiia ki runga: na te taunga oki te reira, na tei pîpî i te toto o te atinga au ra. 15 E te kiko o te atinga au akameitaki ra, ei taua rā i apaiiaʼi ra ka kai ei; auraka roa ei manga mea ngiti e vaooia ki te popongi.

16 E tia taua atinga tana e apai ra, e e mea apai ua, ei taua rā ra i apai ei aia i tana atinga ka kai ei: e tika ra kia kai i te toenga ki te popongi:

17 Kareka te manga e toe i te kiko o taua atinga ra kia tae ki te po toru ra, e taʼuia ïa ki te ai.

18 E kia kai uaia tetai manga i te kiko o taua atinga au nana ra i te po toru, kare e ārikiia, kare oki e akonoia i te atinga nana na tei apai mai: e riro ra ei mea viivii, e te tangata i kai ra ei runga iaia uaorai tana ara. 19 Ko te kiko i tukia i te mea viivii ra, kare ïa e kaingaia; ka taʼuia ïa ki te ai: kareka te kiko atinga ra, ka kai te aronga viivii kore katoa i te reira. 20 Kareka te tangata i kai i te kiko o te atinga au na Iehova ra, ma te viivii katoa ki runga iaia ra, e tipu keia ïa tangata i tona uaorai iti-tangata.

21 E te tangata i akatukia i te mea viivii ra, mei te viivii o te tangata ra, e te puaka viivii, e te mea viivii kino roa ra, ka kai ei i te kiko o te atinga au na Iehova ra, e tipu keia ïa tangata i tona uaorai iti-tangata.

22 E kua tuatua mairā Iehova kia Mose, na ko maira,

23 E karanga atu koe ki te tamariki a Iseraela, e na ko atu, Auraka roa kotou e kai i te tongaua, i to te puakatoro, e to te mamoe, e to te puakanio.

24 E te tongaua no te puaka mate ua, e te tongaua no tei etietiia e te puaka taae, e tika kia rave no tetai mea ke; auraka roa ra kotou e kai.

25 Ko tei kai oki i te tongaua o te puaka, e apaiia ei atinga ai na Iehova ra, ko taua tangata i kai i te reira ra, ka tipu keia ïa i tona iti-tangata. 26 Auraka katoa kotou e kai i te toto, i to te manu, e to te puaka, i to kotou au nooanga ravarai.

27 Ko tei kai i te toto ra, ka tipu keia te reira tangata i tona iti-tangata.

28 Kua tuatua maira oki a Iehova kia Mose, na ko maira,

29 E karanga atu koe ki te tamariki a Iseraela, na ko atu, Ko te apai i tana atinga au kia Iehova ra, aia uaorai te apai i te atinga no tana atinga au na Iehova ra.

30 Na tona uaorai rima e apai i te atinga ai na Iehova, ko te tongaua e te uma, tana ïa ka apai, ko te uma, kia ruruia ki mua i te aroaro o Iehova ei atinga ruru.

31 E na te taunga e taʼu i te tongaua ki runga i te atarau ra: kareka te uma, na Aarona ïa e tana au tamariki.

32 E te ūā mua katau no ta kotou au atinga au ra, e apai kotou i te reira na te taunga ei atinga apaiia ki runga.

33 To te tamariki a Aarona, tei apai i te toto e te tongaua no te au atinga au ra, nana taua ūā mua katau ra ei tuanga.

34 Kua rave oki au i te uma i ruruia, e te ūā mua i apaiia ki runga, no te au atinga au a te tamariki a Iseraela, e kua oronga au i te reira na te taunga ra na Aarona, e na tana au tamariki, ei peu vaoo tamouia i roto i te tamariki a Iseraela ra.

35 Ko ta Aarona teia tuanga i tona akatainu angaia, e te akatainu angaia o tana au tamariki, no roto i te au atinga ai a Iehova, i te rā i akonoiaʼi ratou ei rave i te taoonga taunga ia Iehova; 36 I ta Iehova i akaue e na te tamariki a Iseraela e apai na ratou, i te rā i akamainuiaʼi ratou ra; ei akonoanga tamou e ope ua ake to ratou au uki ra.

37 Ko te ture teia no te atinga karakaratio, no te atinga kai, e no te tarangaara, e no te tutakingaara, e no te akataonga, e no te atinga au ra;

38 Ta Iehova i akaue mai kia Mose i te maunga ra i Sinai, i te rā i akaue ei aia i te tamariki a Iseraela e apai i ta ratou au atinga kia Iehova ra, i te medebara ra o Sinai.