Esetera

4 KITE akerā Moredekai i taua au mea katoa i akatupuia ra, kua aae iorā Moredekai i ona kakau, e kua kakau iora ki te kakau paoa e te reu ai, aere atura i rotopu i te oire, kakaoa ua atura ma te aue maata ua atu;

2 E kua aere rava maira ki mua tikai i te ngutupa o te ariki ra: kare oki te tangata e tomo i te ngutupa o te ariki ma te kakau paoa.

3 E te au enua katoa, i tae atu ei te tuatua e te ture a te ariki ra, e aue maata to te au ngati Iuda i reira, e te akakore i te kai e te aue roi-mata, e te eva kaku; e manganui te moe ua ma te kakau paoa e te reu ai.

4 Kua aere atura te ui vaine e te au tavini o Esetera, e kua akakite atura kiaia. Aue rava akera te ariki vaine ra; e kua akau atura aia i te kakau e akakakau ia Moredekai, ka rave ke mai ei i tona kakau paoa ra: kare akerai aia i rave atu.

5 Kua karanga aturā Esetera kia Hataka, tetai tavini a te ariki, tei akonoia ei tavini iaia ra, kua tuku atura te tuatua iaia kia Moredekai, kia kite aia e, eaa tena? e no te aa?

6 Aere aturā Hataka kia Moredekai ki te arataa o te oire ra, ki mua i te ngutupa o te ariki ra.

7 Kua akakite mairā Moredekai i taua au mea i rokoia mai ei aia ra, e te rainga o te moni ta Hamana i akakite e, nana e apai ki te uipa anga apinga a te ariki ra, kia mate te au ngati Iuda iaia.

8 Kua oronga maira oki aia i tetai tu o taua ture i tataia i Susana e ta ia ratou ra, kia akakite atu aia kia Esetera, e kia akakite pu tikai atu kiaia, e kia ikuiku mamate atu iaia kia aere aia ki roto i te ariki ra, kia pati akatenga atu iaia, e kia akateni atu iaia, kia ora tona au tangata.

9 Kua aere aturā Hataka, e kua akakite atura kia Esetera i te au tuatua a Moredekai.

10 Kua tuatua akaou mairā Esetera kia Hataka, e kua tuku maira kiaia i te tuatua kia Moredekai,

11 Kua kite te au tavini ravarai o te ariki, e te tangata katoa no te au enua o te ariki ra, e ture teia te vai nei, e te tangata te tane e te vaine katoa kia aere ua mai ki te ariki ra ki te paepae i roto ra, kare i tuatuaia, e taia ïa, kia kore te ariki e akatika atu i te sepeta auro kia ora: kare ra au i tuatuaia mai e aere ki roto ki o te ariki ra e toru akenei ngauru anga o te rā.

12 Kua akakite atura ratou kia Moredekai i te au tuatua na Esetera.

13 Kua karanga aturā Moredekai e na ko atu kia Esetera, Auraka koe e manako e, ko koe te ka ora i te ngati Iuda katoa ra, i te mea tei roto koe i te are o te ariki ra.

14 Kia muteki ua rai oki koe i tenana, ka tupu mai te tauturu no te ngati Iuda e te ora na tetai ngai ke mai; kareka koe e te ngutuare o to metua, ka pou ïa; i kite aai e, ko te mea teia i raukaʼi ia koe te au i teianei tuatau?

15 Kua tuatua mairā Esetera kia ratou, e karanga atu ki Moredekai,

16 E tiki, e akaputuputu mai i te au ngati Iuda katoa i kitea i Susana nei, e e akakore kotou i te kai iaku nei, auraka e kai, auraka oki e inu, e kia po toru ake, i te po e te ao: e akakore katoa au i te kai e te au vaine katoa i oku nei; kare ua atu rai te tau ki te ture, ka aere rai au ki roto i te ariki ra: e kia mate au, mate ua atu au.

17 Aere aturā Moredekai e kua pera aia i ta Esetera i akaue mai iaia ra.