Exodo

7 I REIRA ta Iehova tuatua anga mai kia Mose, I na, kua akariro au ia koe ei Atua kia Pharao ra; e toou tuakana ra ko Aarona ei peroveta ïa naau.

2 Ko koe te karanga atu i te au mea ravarai taku e akaue kia koe na: e na toou tuakana na Aarona e karanga atu kia Pharao, kia tuku aia i te tamariki a Iseraela ki vao mai i tona enua.

3 E akaketaketa ra au i te ngakau o Pharao, e ka akamaata au i taku au akairo, e taku ra au ravenga tu ke i taua enua ra i Aiphiti.

4 Kare oki a Pharao e akarongo mai kia korua, kia akatika ra au i toku rima ki rungao ia Aiphiti, e kia arataki mai au i toku au nuku, toku iti-tangata, te tamariki a Iseraela ra, mei roto mai i taua enua ra i Aiphiti, ma te tutaki maata.

5 E ka kite to Aiphiti e, ko au ko Iehova, kia akatika atu au i toku rima ki rungao ia Aiphiti, e kia arataki mai au i te tamariki a Iseraela mei roto mai ia ratou ra.

6 E kua pera oki a Mose raua ko Aarona: i ta Iehova i akaue mai ia raua ra, ko ta raua ïa i rave.

7 Kua tae a Mose ki te varu o te ngauru anga o tona mataiti, kua tae oki a Aarona ki te varu o te ngauru anga o tona mataiti e toru ara, i tuatuaʼi raua kia Pharao ra.

8 Kua tuatua anā Iehova kia Mose raua ko Aarona, kua na ko mai ana,

9 Kia tuatua mai a Pharao kia korua, kia na ko mai e, E akakite mai ana i tetai akairo: ei reira koe e tuatua ake ei kia Aarona e, Ka rave i te rakau naau, ka titiri ki raro ki mua i te aroaro o Pharao, e ka riro atura ïa ei ovi.

10 E aere aturā Mose raua ko Aarona ki roto kia Pharao ra, e kua pera oki raua i ta Iehova i akaue maira: kuā titiri atura oki a Aarona i tana rakau ra ki raro, ki mua i te aroaro o Pharao, e ki mua i te aroaro o tona ra au tavini, e riro atura ïa ei ovi.

11 Kua akaputuputu maira oki a Pharao i te au tangata pakari, e te aronga purepure: e mei te reira katoa ta te au purepure o Aiphiti i rave i ta ratou ra purepure.

12 Kua titiri anake oki ratou i ta ratou katoa ra au rakau ki raro, e riro atura te reira ei ovi anake: kareka te rakau a Aarona, apuku atura ïa i taua au rakau na ratou ra.

13 E paketaketa atura te ngakau o Pharao, kare akera aia i akarongo ia raua; ta Iehova rai oki i tuatua maira.

14 Kua tuatua mairā Iehova kia Mose, Kua paketaketa te ngakau o Pharao, kare aia e tuku i te au tangata nei.

15 E aere koe kia Pharao ra kia popongi; i na, ei reira aia e aere ei ki te vai, ei te pae o te vai koe tiaki ei iaia i te aere anga mai; e te rakau i akariroia ei ovi ra, e rave katoa atu i to rima.

16 E naau e karanga atu kiaia e, I tonokia mai au e te Atua o te ngati Ebera nei, e Iehova, kia koe na, te tuatua maira, E tuku mai koe i toku ra au tangata, kia akamori mai ratou iaku i te medebara ra: e i na, kare rai koe i akarongo mai;

17 Te na ko mairā Iehova, Teia te mea e kite ei koe e, ko Iehova au; i na, e ta au i te vai i te kauvai nei ki te rakau i toku rima nei, e ka riro taua vai nei ei toto;

18 E te ika i raro i taua vai nei, ka mate ïa, e ka aunga kino taua vai nei; e ka toanu to Aiphiti kia inu i te vai o te kauvai nei.

19 Kua tuatua mairā Iehova kia Mose, Ka tuatua ana kia Aarona, E rave i to rakau, e akatika i toou rima na rungao i te au vai o Aiphiti nei, ki runga i te au kauvai, e ki runga i te au vai puna, e ki runga i te au vairanga vai ravarai na ratou ra, kia riro ïa ei toto; kia pini te enua katoa nei ko Aiphiti i te toto, i roto i te au āriki rakau ra, e te au āriki toka katoa.

20 Kua pera oki a Mose raua ko Aarona, ta Iehova i akaue maira: kua tāki iora aia i taua rakau ra ki runga, ta iora i te vai i taua kauvai ra, ki mua i te aroaro o Pharao, e ki mua i te aroaro o tona au tavini; e riro atura taua vai katoa o te kauvai ra ei toto.

21 Mate iora te ika i raro i taua vai ra; e kua aunga kino iora taua vai ra, e kare atura i tika i to Aiphiti kia inu i te vai i taua kauvai ra; pini takakaiia ia taua enua ra ko Aiphiti ki te toto.

22 E mei te reira oki ta te au purepure o Aiphiti i rave i ta ratou ravenga ngaro: e paketaketa atura te ngakau o Pharao, e kare aia i akarongo ia raua; ta Iehova rai oki i tuatua maira.

23 Ariu ke ua maira rā Pharao, e oki maira ki tona ngutuare; kare katoa tona ngakau i akono ua atu i te reira.

24 Kua ko anake iora to Aiphiti i te rua na te pae o taua kauvai ra i te vai e inu; kare akerai oki i tika ia ratou kia inu i te vai i taua kauvai ra.

25 Ka itu akera rā i ope, ka ta ai a Iehova i taua vai ra.