Numero
35 KUA tuatua mairā Iehova kia Mose i te ngai mataataa i Moabi, i te pae Ioridana i aite ki Ieriko ra, na ko maira, 2 E akaue atu koe i te tamariki a Iseraela, e apai ratou i te au oire no te ngati Levi, ei nooanga no roto i ta ratou ra tuanga i rauka ra; e ei kainga katoa to vao mai i taua au oire no ratou ra ta kotou e apai no te ngati Levi ra. 3 Ei nooanga taua au oire ra no ratou, e te au kainga i vao ake no ta ratou au puaka, e te au apinga, e te au puaka ravarai na ratou ra.
4 E te au kainga i vao mai i te au oire ra, ta kotou e apai no te ngati Levi ra, kia okotai tausani ïa i te kubiti ki vao mai i te patu o te oire e pini ua ake.
5 E na kotou e anga i vao mai i te oire kia rua tausani i te kubiti, i te pae i te itinga o te rā ra, e kia rua tausani i te kubiti i te pae i apatonga, e kia rua tausani i te kubiti i te pae i te opunga o te rā, e kia rua tausani i te kubiti i te pae i apatokerau ra; e ei rotopu oki te oire: ko ta ratou ïa ei au kainga no vao mai i te au oire.
6 E akataka oki kotou i e ono puke oire no roto i te au oire ta kotou e apai no te ngati Levi ra, ei oire akapuanga ïa no te ta tangata, kia oro aia ki reira, ko te reira au oire e a ngauru ma rua ta kotou e o atu katoa atu. 7 Ko te au oire katoa ta kotou e apai no te ngati Levi ra, e a ïa ngauru e varu ara; ko te reira, e te au kainga katoa i vao ake.
8 E taua au oire ta kotou e apai no roto i te tuanga a te tamariki a Iseraela ra; ko ta te aronga e maata to ratou ra, kia maata ta kotou e apai; ko ta te aronga ra e iti to ratou ra, kia iti katoa ta kotou e apai: ka akono rai te tangata ravarai i tana e oronga i roto i tona au oire no te ngati Levi, kia tau tikai ki tana tuanga i rauka iaia.
9 Kua tuatua mairā Iehova kia Mose, na ko maira,
10 E karanga atu ki te tamariki a Iseraela, e na ko atu kia ratou, Kia tae kotou ki tetai pae Ioridana ki te enua ra ko Kanaana;
11 Ei reira kotou ka iki ei i te au oire no kotou ei oire akapuanga; kia oro te ta tangata i reira, ko tei mate te tangata iaia kare aia i kite ra.
12 E ei oire akapuanga te reira ia kotou i te akamopuku; kia kore te ta tangata e mate, kia tae ra aia ki mua i te aroaro o te uipaanga i te akava anga ra.
13 Kia ono rai o kotou oire akapuanga i te au oire ta kotou e apai no te ngati Levi ra. 14 Kia toru o kotou oire e oronga i teia pae Ioridana, e kia toru oki o kotou oire e oronga i te enua ra i Kanaana, ko te ka riro ïa ei oire akapuanga.
15 E aua nga oire e ono ra, ei oire akapuanga ïa no te tamariki a Iseraela, e no te tangata ke, e no te tangata i tuitarere ua i roto ia ratou, ei oroanga no te tangata i mate te tangata iaia ra, e kare aia i kite. 16 Kia ta ra aia i te tangata ki te taoonga auri, e mate roa akera aia, e ta tangata ïa aia: ka tamate ravaia taua ta tangata ra. 17 E kia pepe te tangata iaia i te peî anga i te toka ka mate ei aia ra, e mate rai oki aia, e ta tangata ïa aia; ka tamate ravaia taua ta tangata ra. 18 E kia ta aia i te tangata ki tetai taoonga rakau ka mate ei aia ra, e mate rai oki aia, e ta tangata ïa aia; ka tamate ravaia taua ta tangata ra. 19 Na te akamopuku uaorai e ta i taua ta tangata ra: kia aravei atu aia iaia ka ta ai aia.
20 E kia opara makitakita ua aia i te tangata ra, e kia moe tapapa aia e titiri apaka ua i tetai mea iaia, e mate iora aia; 21 E kia moto makitakita ua iaia ki te rima, e mate iora aia: ko tei ta iaia ra, ka tamate ravaia ïa; e ta tangata aia; na te akamopuku e ta i taua ta tangata ra, kia aravei aia iaia ra. 22 Kia opara pu ua ra aia iaia ma te makitakita kore, e kia titiri apaka ua i tetai mea iaia kare aia i moe tapapa iaia, 23 E kia peî oki i tetai toka e mate ei te tangata ra, ma te kite kore iaia, e mate iora aia, no te mea ra kare aia i te enemi nona, kare oki i kimi i tona kino: 24 Na te uipaanga e makitoro marie i te tuatua i taua tangata i mate ei te tangata ra, e te akamopuku, kia tau i teianei au tuatua-tau: 25 E na te uipaanga e akaora i taua tangata i mate ei te tangata ra i te rima o te akamopuku, e na te uipaanga e akaoki iaia ki te oire akapuanga nona, tana i oro ra: ei reira oki aia noo ei, e kia mate te taunga maata ra, i tei akatainuia e te manongi tapu ra. 26 Kia aere ua mai taua tangata i mate te tangata iaia ra ki vao mai i te kotinga o taua oire akapuanga nona, i tana i oro ra; 27 E rokoia iora aia e te akamopuku ki vao mai i te kotinga o taua oire akapuanga nona ra, e kua ta iora taua akamopuku ra i taua tangata i mate ei te tangata ra; kare aia e ara i reira: 28 No te mea e noo tika aia ki roto i te oire akapuanga nona ra, e kia mate te taunga maata: kia mate te taunga maata ra, ka oki ua ïa taua tangata i mate ei te tangata ra ki tona kainga tikai. 29 Ei akonoanga tuatua-tau teianei au mea na kotou, e ope ua ake to kotou au uki ra, i to kotou katoa au nooanga.
30 Ko tei tamate roa i te tangata ra, ka taia te ta tangata i te vaa o nga kite ra; kare ra e tika kia ta i te tangata i te kite okotai ra.
31 Auraka oki kotou e rave i te tutaki kia ora te ta tangata ra, tei tau iaia te mate ra; ka tamate ravaia ra aia.
32 Auraka oki kotou e rave i te tutaki na te tangata i oro ki te oire akapuanga nona ra, kia oki akaou aia ki te enua e noo, kia mate ra te taunga ra.
33 Auraka kotou e akaviivii i te enua ta kotou e noo ra: e viivii oki te enua i te ta tangata; kare oki te enua e mā i taua toto i akataʼeia ra, mari ra i te toto o taua tangata i akataʼe ra. 34 E tenana, auraka kotou e akaviivii i te enua ta kotou e noo ra, e taku katoa oki e noo: ka noo oki au nei ko Iehova i rotopu i te tamariki a Iseraela.