2 Paraleipomeno

25 KUA tae a Amazia ki te mataiti tai takau ma rima i ariki ei aia, okotai takau ma iva ona mataiti i te ariki anga i Ierusalema. Ko Iehoadana te ingoa o tona metua vaine no Ierusalema.

2 Kua rave aia i te mea tika i mua i te aroaro o Iehova, kare ra i tika meitaki rava te ngakau. E akatinamouia akera te au iaia ra, kua ta atura aia i nga tavini nona, tei ta i tona metua i te ariki ra.

3 Kare ra aia i ta i ta ratou au tamariki, i tei tataia oki ki roto i te ture i te buka a Mose, i ta Iehova i akaue maira, i te na ko anga mai e,

4 Auraka te metua kia taia i te ara a te tamariki, e auraka te tamariki kia taia i te ara a te metua; ka mate ra te tangata katoa i tana uaorai ara.

5 Kua akaputuputu mairā Amazia ia Iuda, e kua akariro atura ia ratou ei rangatira no runga i te au tausani, e ei rangatira no runga i te au anere, no te au are o to ratou ai metua e pini ua ake Iuda e Beniamina katoa: e tei tae ki te mataiti okotai takau e runga atu, tei tatauia ïa, e te kitea anga iora e toru anere i te tausani anga i te tangata memeitaki, e tika kia aere kite karo tamaki, ko tei rave i te korare e te paruru.

6 Kua ou atura oki aia okotai anere i te tausani anga i te tangata i te aronga toa anake no roto ia Iseraela, i te au taleni ario okotai anere.

7 Kua aere maira ra tetai tangata no te Atua kiaia ra, na ko maira, E te ariki e, auraka te nuku o Iseraela kia aru ia koe; kare oki a Iehova i tau ia Iseraela, te au tamariki katoa a Epheraima.

8 Kia aere ra koe ra, e pera rai, e akamaroiroi i tenana tamaki: ka inga koe i te Atua i mua i te enemi: e tika oki i te Atua kia tupae mai, e kia akainga ki raro.

9 Kua tuatua mairā Amazia ki taua tangata no te Atura ra, E akapeea ra matou i te au taleni ario okotai anere i orongia atu e au ki te nuku o Iseraela? Kua karanga atura te tangata no te Atua ra, E tika ia Iehova kia akaoki mai e maata ua atu ra.

10 Kua akataka aturā Amazia ia ratou, koia taua aronga mei Epheraima maira, kia oki ki te ngutuare: riri rava akera ratou ia Iuda, oki atura ratou ki te ngutuare ma te riri maata.

11 Kua akamaroiroi iorā Amazia iaia uaorai, e kua arataki i tona ra au tangata, aere atura ki te o tai ra, e kua ta atura i to Seira okotai ngauru i te tausani.

12 E okotai ngauru oki i te tausani i raoo ora uaia, kua arataki tuikaaia e te tamariki a Iuda, e ka kave ia ratou ki runga rava i te mato ra, e kua uri atura ia ratou ki raro mei runga mai i taua mato ra, paîî rava akera ratou.

13 Kareka te aronga toa i akaokiia e Amazia ra, kia kore ratou e tae katoa ki te tamaki, kua aere atura ïa ki te au oire i Iuda, e Samaria, e tae ua atura ki Bete-horona, ta iora i te au tangata e toru tausani, e manganui te apinga i noniia ra.

14 E tae mairā Amazia mei te tainga i te ngati Edoma, kua apai katoa maira i te au atua o te au tamariki o Seira, e kua akatu akera ia ratou ei atua nona, e kua tupou iora aia ki raro ki mua ia ratou, e kua tutungi i te atinga kakara kia ratou.

15 Tupu atura te riri o Iehova ia Amazia, e kua tono atura aia i tetai peroveta kiaia, ko tei karanga atu kiaia e, Eaa te mea i kimi ei koe i te au atua o te au tangata, kare i akaora i to ratou uaorai au tangata i toou na rima?

16 E te tuatua ua ra aia kiaia, kua tuatua maira te ariki kiaia, Kua akonoia ainei koe ei ako i te ariki? ka muteki ana; eaa koe kia taiaʼi? Kua muteki ua iora taua peroveta ra, kua tuatua akera ra, Kua kite au e kua akakoro tikai te Atua ia koe kia mate rava, no te mea ko koe i akapera mai, e kare i akarongo mai i taku i ako atura.

17 Kua kimi iora te ariki o Iuda ra ko Amazia i te tuatua, e kua tono akera i te karere kia Ioasa, te tamaiti a Iehoahaza, te tamaiti a Iehu, ariki no Iseraela ra, karanga atura, E aere mai, taua e akarakara i to taua mata.

18 Kua tono maira te ariki o Iseraela ko Ioasa ki te ariki o Iuda kia Amazia, tuatua maira, Na tetai ngangaere i Lebanona i tono mai i te karere ki tetai arezi i Lebanona, na ko maira, O mai ana i to tamaine ei vaine na taku tamaiti: kua aere ua maira tetai puaka momoavao no Lebanona, takatakaiia iora taua ngangaere ra.

19 Te tuatua ua ana koe, I na, kua pou te ngati Edoma iaku; e kua parau to ngakau na kia akatietie: e noo marie ua koe i to ngutuare na; eaa koe e māro mai ei kia kino, e kia inga atu koe, ko koe e Iuda katoa rai?

20 Kare akerai a Amazia i akarongo: no ko mai oki i te Atua kia riro ratou ki te rima o to ratou au enemi no te mea te kimi ra ratou i te au atua no Edoma ra.

21 Kua aere atura te ariki ko Ioasa ki runga, e kua akarakara oki raua i to raua puke mata, koia e te ariki o Iuda ko Amazia, i Bete-semesa i o Iuda ra.

22 Eke iora Iuda i mua ia Iseraela; e kua oro anake iora ratou, te tangata katoa ki tona uaorai puakapa.

23 Kua rave iora te ariki o Iseraela ko Ioasa i te ariki o Iuda ia Amazia, te tamaiti a Ioasa, te tamaiti a Iehoahaza, i Bete-semesa, e kua apai mai ki Ierusalema, e ka vavaʼi i te patu i Ierusalema, mei te ngutupa i Epheraima e tae ua atura ki te ngutupa i te poo patu, e a anere i te kubiti.

24 E kua rave aia i te auro e te ario, e ope rava ake, e te au āriki katoa i kitea i roto i te are o te Atua, tei Obeda-edoma, e te au apinga o te are o te ariki ra, e te tangata oki, e kua oki atura ki Samaria.

25 Te ora ua rā Amazia, te tamaiti a Ioasa, ariki no Iuda ra, i muri ake te matenga o Ioasa te tamaiti a Iehoahaza ariki no Iseraela ra, okotai ngauru ma rima i te mataiti.

26 E te toenga o te tuatua ia Amazia ra, tei mua ra e te openga, i na, kare aina kua tataia i roto i te tuatua a te ui ariki no Iuda e no Iseraela?

27 E i muri ake i to Amazia anga ke anga i te aru anga ia Iehova, kua kotikoti kupenga iora ratou iaia i Ierusalema; kua oro iora aia ki Lakisa: kua tono atura ra ratou i te tangata na muri iaia ki Lakisa, ta atura iaia i reira.

28 Kua akauta maira ratou iaia na runga i te au oroenua; e kua tanu atura iaia ki o tona ra ai metua i te oire i Iuda.