1 Samuela

30 E TAE aturā Davida e tona au tangata ki Zikelaga kia tae ki te toru o te rā, kua kite akera e kua aere mai te ngati Amaleka ki Iuda ki te pae i apatonga, e ki Zikelaga, e kua taia Zikelaga, e kua taʼuia ki te ai;

2 E kua rave ke atu i te au vaine i roto ra ei tuikaa: kare ratou i ta i te tangata maata e te tangata iti, kua apai keia ïa, e kua aere ki to ratou ra aerenga.

3 Kua tae mairā Davida e tona au tangata ki taua oire ra, e i na, kua taʼuia ki te ai; e kua apaiia ta ratou ra au vaine, e ta ratou ara au tamaroa, e ta ratou au tamaine, ei tuikaa.

4 Kua akateitei akerā Davida e te au tangata ki ona ra i to ratou reo, kua aue iora, e kare atura o ratou maroiroi kia aue.

5 Kua riro oki nga vaine a Davida, ko Ahinoama i Iezereela, e ko Abigaila, te vaine a Nabala i Karamela.

6 Maata rava akera to Davida tumatetenga; kua tuatua oki te au tangata e, e peî iaia ki te toka, no te mea, kua aue ngakau ua iora te au tangata katoa, ko te tangata katoa i tana ra au tamaroa, e tana ra au tamaine: kua akamaroiroi rā Davida iaia uaorai i tona ra Atua ia Iehova.

7 Kua karanga aturā Davida ki te taunga ra kia Abiatara, te tamaiti a Ahimeleka ra, Teia taku tuatua kia koe, e apai mai ana i te tiputa i ko nei kiaku nei. Kua apai mairā Abiatara i te tiputa kia Davida.

8 Kua ui aturā Davida kia Iehova, karanga atura, E aru ainei au i teianei takanava, ka rokoia atu e au? Kua tuatua maira aia kiaia, E aru: e rokoia atu rai ïa ratou e koe ra, e ka rauka rai kare e toe.

9 Aere aturā Davida, koia, e te au tangata e ono katoa anere i ona ra, e tae atura ki te kauvai ra ko Besora, i te ngai i nooia e te aronga i vaooia ra.

10 Aru atura rā Davida e te au tangata e a katoa anere: ko e rua anere ra kua nooia ki muri, kua maata oki to ratou roiroi, kare atura e tika ia ratou kia aere na runga i taua kauvai ra ko Besora.

11 Kite atura ratou i tetai tangata no Aiphiti i roto i tetai kainga, e kua arataki maira ratou iaia kia Davida ra, e kua o atu oki ratou i te faraoa e kua kai iora; e kua akainu atu ratou iaia ki te vai;

12 Kua o atu oki ratou i tetai manga suke, e nga kaui vine marō e rua; e kai iora aia, io akera te aʼo; kare oki aia i kai i te kai, kare oki inu i te vai, e toru akera po e toru oki ao.

13 Kua karanga aturā Davida kiaia, Noai koe na? mei ea mai oki koe? Kua tuatua maira aia, E tangata au no Aiphiti, e tavini no tetai ngati Amaleka; e kua akarukeia io nei au e toku pu, no te mea ka po toru akenei au i te matenga i te maki.

14 Tae atura matou ki te Kereti i te pae i apatonga ra, e te pae i apatonga ra i Iuda, e te pae i apatonga ra, i Kaleba; e kua ka Zikelaga ia matou ki te ai.

15 Kua karanga aturā Davida kiaia, E tae ainei au ia koe ki taua takanava ra? Kua tuatua maira aia, E taputou mai ana koe i te Atua iaku, e kare koe e ta mai iaku nei, kare oki koe e tuku iaku ki te rima o toku pu, e naku koe e arataki ki taua takanava ra.

16 E tae atura aia iaia ki raro, e i na, kua kapi te enua katoa ia ratou, te kaikai ra, e te inu ra, e te ura ra, no te maata o te apinga ta ratou i noni ra i te enua o te Philiseti, e no te enua o Iuda.

17 Kua ta aturā Davida ia ratou mei taua aiai ra e tae ua atura ki te aiai i tetai rā; kare rava tetai tangata i ora, mari ra ko te au tangata ou, e a anere, ko tei oro na runga i te kamela e kua ora.

18 Kua rauka maira ia Davida te au mea katoa ta to Amaleka i apai ke: e nga vaine ana toko rua kua rauka ïa ia Davida.

19 E kare rava a ratou ra apinga i toe, i te mea maata, e te mea ngiti, i te tamaroa e te tamaine, i te apinga e te au mea katoa ta ratou i apai katoa ra; rauka anake iorā ia Davida.

20 Kua rave iorā Davida i te au mamoe katoa, e te au puakatoro a te ngati Amaleka; ko tei îaia e ratou na mua i tei rauka ou ra, e kua tuatua akera, Ko ta Davida teia apinga.

21 Kua oki mairā Davida ki te au tangata e rua anere ra, ko tei roiroi e kare atura e tika kia aru mai ia Davida, ko tei akanooia i taua kauvai ra ko Besora: kua aere atura ratou kia aravei akera oki i te au tangata ki ona ra: e tae mairā Davida i vaitata ki te au tangata, kua aroa atura aia ia ratou.

22 Kua tuatua akera te au tangata kikino katoa ra e te akono kore, ko tei aere katoa i taua tere o Davida ra, na ko akera, Auraka tatou e apai ua atu i te au apinga i rauka ia tatou nei, ko ratou kare i tae katoa, mari ra ko te tangata ko tana vaine e te tamariki, kia arataki ke atu ratou e kia riro atu.

23 I reira to Davida tuatua anga e, Auraka kotou kia pera, e taku au taeake, i ta Iehova oki i oronga mai no tatou, e kua tikai mai ia tatou nei, e kua oronga mai i te aronga e tamaki mai ia tatou nei ki roto i to tatou nei rima.

24 Koai oki te ka akarongo atu ia kotou i tenana? Koia ïa mei te tuanga katoa o tei aere ki te tamaki ra, e te tuanga katoa o tei tikai i te apinga: kia okotai rai a raua ra taunga.

25 E mei taua rā maira e tae rava akenei ki teianei rā, kua akariro aia i taua tuanga nei ei ture, e ei akonoanga na Iseraela.

26 E tae aturā Davida ki Zikelaga, kua apai aia i tetai pae i tei noniia ra, ki te aronga pakari o Iuda ra, i te au taunga nona ra, na ko atura, I na te apinga na kotou no te noni o te au enemi o Iehova;

27 Ki to Betela, e to Ramota i te pae i apatonga ra, e to Iatira,

28 E ki to Aroera, e to Siphumota, e to Esetemoa,

29 E to Rakala, e to te au oire o te Ierameeli, e to te au oire i te au Keni,

30 E to Horama, e to Korasana, e to Ataka,

31 E to Heberona, e te au ngai katoa ta Davida e tona au tangata i mātau i te pipini.