Ruta

2 E TAEAKE to te tane a Naomi, e tangata apinga maata; no te kopu-tangata o Elimeleka, ko Boaza tona ingoa.

2 Kua karanga aturā Ruta ngati Moabi kia Naomi, E tuku ake ana koe iaku ki te kainga, e koi aere i te kerite na muri atu i te tangata e kite aroa ua mai iaku. Kua tuatua maira aia kiaia, Ka aere, e taku unonga e. 3 Aere atura aia, e tae atura ki roto i te kainga e koi aere ua atura i muri i te aronga e kokoti ra: e tapae ua atura aia i ta Boaza ra pae i taua kainga ra, no te kopu-tangata o Elimeleka ra aia:

4 E i na, kua aere mairā Boaza mei Betelehema mai, e kua tuatua maira ki te aronga e kokoti ra, Kia ora kotou ia Iehova. E kua karanga atura ratou kiaia, Kia ora koe ia Iehova.

5 Kua tuatua mairā Boaza ki tona tavini tei akataoongaia ki rungao i taua aronga e kokoti ra, Naai teianei tamaine?

6 Kua karanga atura taua tavini i akataoongaia ki rungao i te aronga e kokoti ra, na ko atura, Ko te vaine Moabi ra teia, ko tei aere katoa mai raua ko Naomi mei te enua maira mei Moabi:

7 E kua tuatua maira aia, Teia taku tuatua kia kotou, e tuku ana kotou iaku kia koi aere ua ana au na muri i te au kokoti na, na roto i te au ruru ra: e kua aere maira oki aia, e i ko nei rai aia mei te popongi mairai, e teia noaʼi, akaangaroi iti uaorai nei aia ki roto i te are nei.

8 Kua tuatua mairā Boaza kia Ruta, Te rongo maira koe, e taku tamaine? Auraka koe e aere e koi aere i roto i tetai kainga ke, auraka e aere ke, ka noo rai i ko nei i vaitata katoao i toku au tavini vaine nei: 9 E akara ua atu oou mata i te kainga ta ratou e kokoti ra, ka aru atu ei koe ia ratou; kare kua oti te au tangata ou nei i te akoia e au e auraka rava e rave ua atu ia koe? e kia kaki vai ra koe e aere ua koe ki te au āriki ra, inu ua atu ei i ta te au tavini i tiki ra.

10 Kua tipapa iora aia ki raro i tona mata i reira, e kua tupou iora aia ki raro i te one, e kua karanga atura kiaia, Eaa au nei i kite aroaia mai ei e koe, i kite mai ei koe iaku, e vaine ke oki au nei?

11 Kua tuatua mairā Boaza, na ko maira kiaia, Kua akakite puia mai au i toou takinga i to metua ongoai vaine, mei te matenga mairai o to tane ra: e kua akaruke oki koe i to metua tane, e to metua vaine ra, e te enua i anau ei koe ra, e kua aere mai nei koe ki te aronga kite koreia e koe i muatangana ra.

12 Kia tutaki mai a Iehova i taau angaanga, e kia orongaia mai taau tutaki maata e te Atua o Iseraela nei, e Iehova, taau i aere mai e akaruru i raro ake i tona peau ra.

13 Kua karanga atura aia, Kia kite aroaia mairai au e koe, e taku pu; kua akamaru mai oki koe iaku, kua tuatua meitaki koe i to tavini vaine nei, kore oti au e aite ki tetai o to au tavini vaine na.

14 Kua tuatua mairā Boaza kiaia, i te tuatau kaingakai, Aere mai koe i ko nei kai ei i te areto, e tutou ei i taau manga kai ki roto i te vinega. Noo iora aia ki te pae o te aronga e kokoti ra; kua tuku atura aia i te sitona tunu nana; e kua kai iora aia e pangia akera, e toe iora te kai. 15 E kua tu akera aia ki runga e koi aere rai, kua akaue mairā Boaza ki te au tangata ou nona ra, na ko maira, E vaoo ua atu kotou iaia kia koi aere ua ana na roto katoa i te au ruru ra, auraka e taakama ua atu iaia:

16 E akatopa uaorai oki i etai aoanga rikiriki nona, ka vaoo uaʼi kia koi aere aia i te reira, auraka e kauvae ua atu.

17 Koi aere iora aia i roto i taua kainga ra e aiai ua atura, e pāpā iora aia i tei koiia e ia ra; e kua tu aite taua kerite ra ki te epha okotai.

18 Kua rave akera aia i taua kerite ra, e kua oki maira ki roto i te oire: e kua akakite maira ki tona metua ongoai i tei koiia e ia ra: e kua apai maira oki i te kai i toe iaia ka pangiaʼi aia ra, e kua o ake nana. 19 Kua karanga atura tona metua ongoai kiaia, Noea koe i te koi aere anga i nakonei? e ko ea taau rave angaanga? kia ora ïa tangata i kite mai ia koe na e. Kua akakite maira aia ki tona metua ongoai i tana rave anga angaanga, kua tuatua maira, Ki o tetai tangata ko Boaza te ingoa taku rave anga i te angaanga i nakonei.

20 Kua karanga aturā Naomi ki tana unonga, Kia akameitakiia aia e Iehova, i tei kore i tivata i te takinga-meitaki mai i tei ora nei, e tei mate ra. E kua karanga aturā Naomi kiaia, No to tatou kopu-tangata taua tangata ra, ko tetai tane ïa no tatou.

21 Kua tuatua maira taua ngati Moabi ra ko Ruta, I tuatua mai oki kiaku e, Ei vaitata katoao koe i toku au tavini nei, kia ope ua atu taku akaū nei i te kokotiia e ratou. 22 Kua karanga aturā Naomi ki tana unonga kia Ruta, E mea meitaki, e taku unonga e, kia aere katoa koe e te au tavini vaine nona ra, kia kore ratou e aravei ua atu ia koe i roto i tetai kainga ke. 23 Piri tika atura aia ki te pae o te au tavini vaine o Boaza ra, i te koi aere anga, e tae ua atu ki te openga o taua akaū kerite ra, e te akaū sitona katoa; te noo ra aia i o te metua ongoai ra.