Ezekiela

27 KUA tae maira oki te tuatua a Iehova kiaku nei, na ko maira,

2 E tenana, e te tamaiti a te tangata na, ka atu koe i tetai peʼe tangi ia Turia;

3 Ka karanga atu ei kia Turia, E tei noo i te tuku anga na tai ra, ko te tangata oko na te au tangata o te pa enua e manganui ra, Te na ko maira te Atu ra ko Iehova; E Turia e, kua karanga oki koe e, Kua meitaki rava au i te purotu.

4 Tei rotopu i te moana toou ra au kotinga, kua akamanea ravaia koe i te purotu e tei patu ia koe ra.

5 E berusi anake toou au rakau pai, no Senira i te pari angaia e ratou: kua rave ratou i te au arezi no Lebanona ei tira pai naau.

6 E ale no Basana taau aronga oe i te tarai angaia e ratou; kua anga ratou i toou au nooanga ki te nio elephana i tarotoia ki te rakau manea no te enua o te Kitima ra.

7 Te orongā meitaki e te purepure no Aiphiti mai, tei ooraia ei kie naau; te kakau kerekere, e te uriuri, no te au enua o Elisa, ko toou ïa tapoki.

8 Te au tangata no Sidona e no Aravada, ko te oe ïa ia koe: toou aronga pakari i roto ia koe, e Turia e, ko toou ïa au pailoti.

9 Te aronga taito no Gebala, e te aronga karape no reira ra, ko toou ïa totamu i roto ia koe na: te au pai katoa o te moana, e to ratou aonga pai katoa ra, ko roto ïa ia koe e oko i taau ra okoanga.

10 To Pereia, e to Luda, e to Phuta, ko roto ïa i toou nuku, ko toou ïa au tangata tamaki: na ratou i akauta i te paruru e te pare-kotaa i roto ia koe; ko toou ïa akamekameka, to ratou.

11 Te au tangata no Aravada e toou katoa ra nuku, tei runga ïa i toou ra patu e pini ua ake, e tei roto te au Gamadi i toou ra au punanga: kua akauta ratou i to ratou au paruru ki runga i to au patu e pini ua ake, kua manea rava koe ia ratou.

12 Ko Taresisa taau tangata oko, no te rai o toou ra au apinga tumatatini; i te ario, te auri, te punu, e te tapou, ko ta ratou ïa i apai mai ki taau au oko anga.

13 Ko Iavana, ko Tubala, e ko Meseka, ko taau ïa aronga oko: kua apai ratou i te tangata, e te au āriki veo, ki taau ra oko anga.

14 To te ngutuare o Togarama tei taki i te au oroenua ma te au tangata akaoro, e te au mule, ki taau ra oko anga.

15 Te au tangata no Dedana, ko taau ïa aronga oko; e manganui te pa enua, e aronga oko anake ïa i to rima: kua o mai ratou i te nio elephana, e te eboni, ei taoonga-rima kia koe.

16 Ko Arama taau tangata oko, no te rai o te au mea i angaia e koe ra; i te emaradino, e te kakau kerekere, te kakau tata, e te orongā meitaki, e te punga muramura, e te kadekade, ko ta ratou ïa i apai mai ki taau ra oko anga.

17 Ko Iuda, ma te enua o Iseraela, ko taau ia aronga oko: i te sitona no Minita, e te kai meitaki, e te meli, e te mori, e te balama, ko ta ratou ïa i apai mai ki taau oko anga.

18 Ko Damaseko taau ra tangata oko, i te rai o te au mea i angaia e koe ra, i te maata o te au apinga nui katoa ra; i te wina Helebona, e te uru-mamoe teate ra.

19 Kua apai mai Vedana raua ko Iavana i te ao iro ki taau oko anga, e tei taau oko anga te auri tupakiia, te kiri-rakau kakara e te to venevene ra.

20 Ko Dedana taau tangata oko i te kakau akaieie no te aronga akaoro oroenua ra.

21 Ko Arabia, e te au ariki katoa o Kedara, e aronga oko anake ratou i to rima, i te au punua mamoe, e te au mamoe toa, e te au puaka-nio: ko taau ïa aronga oko i te reira.

22 Te au tangata oko no Seba, e no Rama, ko taau ïa aronga oko, i te au rakau i tu ke rava i te kakara ra, e te au toka memeitaki ravarai ra, e te auro, ko ta ratou ïa i apai mai i taau ra au oko anga.

23 Ko Harana, e ko Kane, e ko Edena, te au tangata oko no Seba, ko Asura, e ko Kilemada, taau ïa aronga oko.

24 Ko ratou taau aronga oko i te au apinga memeitaki ra, i te kakau kerekere, e te purepure ra, e te au pia kakau memeitaki ra, i ruruia ki te taura, e e arezi te rakau, i roto i taau ra au apinga oko.

25 Kua akapaapaaia koe e te au pai no Taresisa i taau ra oko anga, kua akakiia oki koe e manea rava akera i rotopu i te moana.

26 Kua oe ravaia koe e to aronga oe ra ki raro i te vai maata ra: kua ngaangaa koe i te maoake i rotopu i te moana ra.

27 To apinga nui, e taau ra au oko anga, taau apinga oko ra, toou aronga aonga pai, e taau ra au pailoti, taau aronga totamu, e te aronga i oko aere i taau ra au apinga, e toou aronga tangata tamaki ravarai, i roto ia koe ra, e i roto i to uipa anga ravarai i rotopu ia koe ra, e inga anake ïa i rotopu i te moana i te rā e ingaʼi koe ra.

28 I te aruru aue o to au pailoti e ngaueue ei te au kainga i vaitatao ra.

29 E te aronga ravarai e rave i te oe ra, te aonga pai e te au pailoti katoa o te tai ra, e eke anake mai ïa ki raro, mei runga mai i to ratou au pai, ka tu ua ratou i taatai;

30 E ka akakite nui ratou i to ratou reo ia koe, ma te aue maata, ma te āū i te one ki runga i to ratou au mimiti, ka takaviri ei ia ratou uaorai i roto i te reu:

31 E mangore teatea rava ia ratou uaorai ia koe, e ka tatua ratou ki te kakau paoa, e aue oki ratou ia koe ma te mamae ngakau, e ma te mii maata.

32 E atu oki ratou i te peʼe tangi i to ratou aue anga ia koe, ma te mii ua ki runga ia koe, i te na ko anga e, Koai ïa oire e aite kia Turia, e aite ki tei pou i rotopu i te moana ra?

33 Ka utaiaʼi taau ra au apinga mei te au tai maira, kua akamerengo koe i te au tangata e manganui; no te maata o taau ra apinga, e te apinga oko naau ra, i apingaiaʼi te au ariki o te enua nei.

34 I te tuatau e akangaangaaiaʼi koe e te tai i roto i te oonu anga o te moana ka topa anake taau apinga oko, ma toou uipa anga katoa i rotopu ia koe ra.

35 Ka tumatetenga te au tangata katoa o te pa enua ia koe, e to ratou au ariki ka rokoia e te mataku maata, ka purautea ua to ratou au mata.

36 Ka riro te aronga oko i rotopu i te au tangata i te akavaavaa ia koe; ka riro koe ei rikarika anga, e ka kore atura koe e tuatau ua atu.