2 Korinetia

3 E OKI ainei e akameitaki akaou matou ia matou uaorai? e ei leta akameitaki aina ta matou ia matou uaorai ia kotou na, mei ta tetai papaki ra, e tau ei, e te leta akameitaki ia matou no ko na mai ia kotou na?

2 Ko kotou oki ta matou leta, i tataia i roto i to matou ngakau, kua kitea e kua tatauia e te tangata katoa.

3 Kua akakite puia oki kotou e, ko te leta ïa a te Mesia i angaia e matou, kare ra i tataia i te inika, na te Vaerua ra o te Atua ora ra; kare ra i runga i te papa toka, i runga ra i te papa tangata ra i te ngakau.

4 Ko te tu ïa o to matou manako i te Atua i rauka i te Mesia ra.

5 Kare ra mei te mea e, e tau ia matou uaorai kia manako e, e tika tetai mea ngiti ia matou anake uaorai; no ko maira i te Atua ra to matou tika;

6 Ko tei akatau katoa ia matou ei taunga i te koreromotu ou nei; eiaa i te kopapa tuatua, i te vaerua ra: e mate oki tei te kopapa tuatua, e ora ra tei te vaerua.

7 E kakā oki to te tuku anga i te tuatua mate i kokotiia i runga i te toka ra, e kare atura i tika i te tamariki a Iseraela kia akara tamou atu i te mata o Mose, i te kakā o tona mata; e akakoreia ra taua kakā ra:

8 Kare aina e maata ua atu te kakā i te tuku anga mai i te tuatua a te vaerua?

9 E kakā oki to te tuku anga mai i te tuatua akaapa ra, e kakā maata atu ïa to te tuku anga mai i te tuatua-tika ra.

10 E taua mea kakā ra oki, kare atura ïa i kakā e ariteia ra, no taua kakā maata i maata ua ra.

11 E kakā oki to taua mea e akakoreia ra, e maata atu ïa te kakā i to te vai rai.

12 E teianei, no te mea, tei ia matou te manakonakoanga mei te reira te tu, te tuatua pu ua atu nei matou:

13 Kare oki mei ia Mose, ko tei arai i tona mata, kia kore te tamariki a Iseraela kia akara tikai i te openga o taua mea e akakoreia ra:

14 Kua akapoiriia ra to ratou ngakau: te vai ua nei rai taua arai ra e tae rava akenei i teianei rā i te tatau anga i te koreromotu taito, kare i kite e kua akakoreia te reira i te Mesia nei.

15 Te vai nei rai te arai i to ratou ngakau, kia tatauia Mose ra, e tae rava akenei i teianei rā.

16 Kia ariu ra te tangata i te Atu ra, e kiriti keia ïa taua arai ra.

17 E teianei ko te Atu taua Vaerua ra, e tei iaia te Vaerua o te Atu ra, tei reira te rangatira.

18 Te akara katoa nei tatou i te kakā o te Atu ma te mata arai kore ra, mei te mea e tei roto i te io ra, te akatu keia nei tatou ei tutu okotai, mei te kakā oki e tae ua atu ki te kakā, i te Vaerua o te Atu ra.