1 Ariki

15 E TAE akera ki te ngauru ma varu o to te ariki ra o to Ieroboama te tamaiti a Nebata ra mataiti, i ariki ei a Abiama ki runga ia Iuda.

2 E toru ona mataiti i te ariki anga i Ierusalema. Ko Maaka te ingoa o tona metua vaine, e tamaine na Abisaloma.

3 Aere atura aia na te au ara katoa a tona metua, i tei raveia e ia i mua ake iaia ra: kare oki tona ngakau i tau ki tona Atua ki Iehova ra, mei te ngakau o tona tupuna o Davida.

4 No Davida ra, kua oronga maira tona Atua ko Iehova i tetai lamepa nana i Ierusalema, e kia akateiteiia tana tamaiti i muri ake iaia, kia akatinamouia Ierusalema:

5 No te mea kua rave a Davida i te mea tika ki mua i te aroaro o Iehova, e kare i anga ke i te au me ravarai tana i akaue mai kiaia ra, e ope rava ake ona au rā i te ora anga nei, mari ra i te tuatua ia Uria ngati Heta ra.

6 E tamaki rai ta Rehoboama e Ieroboama e ope rava akera ona au rā.

7 E te toenga o te tuatua ia Abiama, e te au mea katoa i raveia e ia ra, kare ainei kua tataia ki roto i te buka, te tuatua no te au rā o te ui ariki o Iuda ra? E tamaki oki ta Abiama raua ko Ieroboama.

8 Moe iorā Abiama ki o tona ra ai metua; kua tanumia iora aia i te oire o Davida: tupauia akera aia i te au e tana tamaiti ra e Asa.

9 E tae akera ki te mataiti e tai takau o te ariki o Iseraela o Ieroboama, i riro ei a Asa ei ariki no Iuda.

10 E rua takau akera ona mataiti okotai ara i te ariki anga i Ierusalema. Ko Maaka te ingoa o tona tupuna vaine, e tamaine na Abisaloma.

11 E kua rave a Asa i te mea tika ki mua i te aroaro o Iehova mei ta tona metua katoa ra mei ta Davida.

12 Apai ke atura aia i te au sodoma i taua enua ra, e kua akaruke atura i te au idolo i angaia e nga metua nona ra.

13 E tona tupuna vaine ko Maaka, kua akangere aia iaia i te au, no te mea kua anga aia i tetai tiki no Asetoreta; kua pou akera ia Asa taua tiki ra, taʼu iora ïa ki te ai i te pae kauvai ra i Kiderona.

14 Kare ra i ope te au ngai teitei i te apai keia: kua tika rava ra to Asa ra ngakau ia Iehova e ope rava akera ona au rā.

15 E kua apai maira aia i te au apinga i akatapuia e tona ra metua, e te au apinga i akatapuia e ia uaorai, i te ario e te auro, e te au āriki, ki roto i te are o Iehova.

16 E tamaki rai ta Asa raua ko te ariki o Iseraela ko Baasa, e ope rava akera to raua au rā.

17 Aere atura oki te ariki o Iseraela ko Baasa e rave ia Iuda, e kua patu iora ia Rama, kia kore rava e tangata e tae ki vao e e aere ki te ariki o Iuda kia Asa ra.

18 Kua rave iorā Asa i te ario ravarai e te auro i toe i te au apinga i te are o Iehova, e te au apinga i te are o te ariki ra, e kua tuku atura ki te rima o te au tavini nona ra: e kua akau atura te ariki ra ko Asa i te reira kia Bene-adada te tamaiti a Taberimona, te tamaiti a Heziona ra, ki te ariki o Arama i noo i Damaseko ra, na ko atura,

19 Ei koreromotu ta taua, mei ta toku metua e toou ra metua; i na, tera mai te apinga naau, i te ario e te auro; e aere mai, e akaatikau i te koreromotu naau i te ariki o Iseraela ia Baasa ra, kia aere ke aia iaku nei.

20 Kua akarongo mairā Bene-adada, i te ariki ra ia Asa, e kua tono akera aia i te au rangatira o te au nuku nana ra, e tamaki i te au oire i Iseraela, e ta iora ratou ia Iiona, e ia Dana, e ia Abela-bete-maaka, e ia Kinerota katoatoa, e te enua katoa o Naphatali.

21 E kite akerā Baasa i te reira, kore akera i te patu ia Rama, noo iora i Tireza.

22 Kua akakite akera te ariki ko Asa i tana tuatua kia Iuda katoatoa ra; kare tetai i vaooia: kua rave akera ratou i te au toka i Rama, e te rakau i tei patuia e Baasa ra; kua rave iora te ariki ra ko Asa i te reira, kua patu iora ia Geba i o Beniamina, e Mizepe.

23 Te toenga o te au tuatua katoa ia Asa ra, e tona ririnui katoa, e te au mea katoa i raveia e ia ra, e te au oire i akatuia e ia ra, kare ainei kua tataia ki roto i te buka, te tuatua no te au rā o te au ariki o Iuda ra?

24 Moe iorā Asa ki o tona ra ai metua, e tanumia iora ki o tona ra ai metua i te oire o tona metua ra ko Davida; tupauia akera aia i te au e tana ra tamaiti e Iehosaphata.

25 E tae akera ki te rua o te mataiti o Asa ariki no Iuda ra, i ariki ei a Nadaba te tamaiti a Ieroboama ki runga ia Iseraela, e rua akera ona mataiti i te ariki anga ki runga ia Iseraela.

26 Kua rave iora aia i te kino ki mua i te aroaro o Iehova, aere atura na te arataa o tona metua, e tana ara i ara a Iseraela iaia.

27 E ko Baasa te tamaiti a Ahia, no te ngutuare o Isakara, kua kotikoti kupenga akera iaia. Mate iora aia ia Baasa i Gibetona, no te Philiseti ïa oire; kua tamaki atura oki a Nadaba e Iseraela katoa ia Gibetona.

28 Tei te toru o to Asa ariki no Iuda mataiti, i mate ei aia ia Baasa, e riro akera te au iaia ra.

29 E riro akera aia ei ariki ta atura aia i te ngutuare ravarai o Ieroboama; kare akerai aia i akatoe i to Ieroboama i uti i te aʼo, pou takiri rava iaia, mei te tuatua oki a Iehova, i tuatuaia mai e ia i tona tavini ko Ahia i Silo ra:

30 No te ara a Ieroboama i raveia e ia, e ta Iseraela i rave i te tuatua nana ra, i te akakoko oki tana i akakoko mai i te Atua o Iseraela ia Iehova kia riri.

31 E to taenga o te tuatua i Nadaba, e tana katoa i rave ra, kare ainei kua tataia i rato i te buka te tuatua no te au rā o te au ariki o Iseraela?

32 E tamaki rai ta Asa raua ko Baasa ariki o Iseraela, e ope rava akera to raua puke rā.

33 Tei te toru o to Asa ariki no Iuda mataiti, i riro ei a Baasa te tamaiti a Ahia ei ariki no Iseraela katoatoa i Tireza, okotai takau akera mataiti e a ara.

34 Kua rave aia i te kino ki mua i te aroaro o Iehova, aere atura na te arataa o Ieroboama, e tana ara i ara ai Iseraela iaia.