Ezekiela
17 KUA tae maira oki te tuatua a Iehova kiaku nei, na ko maira,
2 E te tamaiti a te tangata na, ka tuku ana i tetai piri, e ka tuatua i tetai maseli, ki te ngutuare ra ia Iseraela;
3 Ka karanga atu ei, Te na ko maira te Atu ra ko Iehova; Tetai aeto maata, ma nga peau maata, uruuru roroa, e te ki oki i te uruuru, e manganui te tu, tei aere mai ki Lebanona, e kua rave oki i te rara teitei roa o te arezi:
4 Kua tope oki aia i te kauru o to reira au rara tupu ou ra, e kua apai atura kite enua oko ra; tuku iora aia i te reira ki roto i te oire o te aronga oko ra.
5 Kua rave iora oki aia i tetai kopura no taua enua ra, e kua tanu iora ki roto i te kainga uua ra; kua tuku iora aia ki vaitatao i te vai maata ra, kua tanu a rakau akaevaeva ua ra.
6 Tupu atura, riro akera ei vine akaaka toro aere ua ra, tei toro mai tona au rara kiaia ra, e tona au aka tei raro ake iaia: riro atura ei vine, e kua tupu tona au rara, e kao akera te kata.
7 E te vai atura tetai aeto maata, ma te peau maata, e te uruuru e manganui: e i na, kua ariu atura taua vine nei i tona au aka kiaia, kia tamauu aia i te reira ua te ruarua o to reira tanumanga ra.
8 I tanumia ki te ngai one meitaki ra, ki te pae o te vai maata ra, kia toro oki te au rara, e kia ua oki te ua ra, kia riro oki ei vine meitaki ra.
9 E karanga atu koe, Te na ko maira te Atu ra ko Iehova; Ka manuia ainei? Kare ainei e kiriti tumuia tona au aka, ka kokoti ke atu ei i tona ua, kia mae atura? ko te rau tupu ou nona ra te ka mae, kare ra e raveia e te rima ririnui, e kare ra e rainga te tangata, kia kiriti tumuia.
10 E i na, tanu oti ïa, ka tupu ainei? kare ainei e mae takiri, kia akatukia uaia ake e te maoake ra? ka mae rai i tona uaorai ruarua i tupu ei ra.
11 Kua tae maira oki te tuatua a Iehova kiaku nei, na ko maira,
12 Ka karanga atu ki tenana ngutuare meameaau ra, Kare ainei kotou i kite i teia? e karanga atu kia ratou, I na, kua tae mai te ariki o Babulonia ki Ierusalema nei, e kua rave aia i tona ariki, e tona ui ariki katoa, e kua riro katoa ratou ma ia ki Babulonia;
13 E kua rave akera i te uanga o te ariki ra, e kua papau i te koreromotu iaia ra, e kua akataputou atura iaia ra: kua rave katoa oki aia i te aronga tutara o te enua nei:
14 Kia riro taua basileia nei i te akaaka rava, kia kore e tika kia akateitei, kia mou marie ra i te akono anga i te koreromotu nana ra.
15 Kua meameaau ra aia kiaia, i te tono anga i tana au karere ki Aiphiti, kia oronga mai ratou i te au oroenua e te tangata e manganui nona. E manuia ainei tana? e ora ainei aia ko tei akapera ra? e akaatikau ainei oki aia i taua koreromotu ra, e kia ora atu?
16 Te tuatua maira te Atu ra ko Iehova, Te ora nei au ra, ei te ngai tikai i nooia e te ariki, ko tei akariro iaia ei ariki ra, nana te taputou i akavaavaaia e ia ra, e nana te koreromotu i akaatikauia e ia ra, ei iaia rai ei rotopu ia Babulonia aia e mate ei.
17 Kare oki aia e manuia ia Pharao, e tana nuku ririnui, e te urupu maata, i te tamaki anga, i te āū anga i te ngai teitei ki runga, e te patu anga i te punanga, kia pou te tangata e manganui ra:
18 No te mea kua akavaavaa aia i te taputou i te akaatikau anga i te koreromotu, e i na, kua oronga aia i tona rima, e kua fave oki aia i taua au mea katoa nei, kare oki aia e ora.
19 E teianei, te na ko maira te Atu ra ko Iehova; Te ora nei au, taua taputou naku tana i akavaavaa ra, e taku koreromotu tana i akaatikau ra, e tutaki atu ïa au i te reira ki runga i tona uaorai mimiti.
20 E oora au i taku kupenga ki runga iaia, e e mou aia ki roto i taku ereere, e naku aia e arataki ki Babulonia, e ei reira au e maro atu ei iaia i tana ara i rave iaku nei.
21 E te aronga ati katoa nona ra, e te au takanava katoa nona ra, e inga ïa i te koke; e te aronga i toe ra, e akapueurikiriki ïa ki nga matangi katoa ra: e kite oki kotou e ko au teia ko Iehova e tuatua nei.
22 Te na ko maira te Atu ra ko Iehova; E rave katoa au i to runga i te rara teitei, i te arezi teitei ra, ka tanu ei; e tope oki au i te kauru o tona ra au rara ou, i tei paruparu ra, ka tanu ei ki runga i tetai maunga teitei e te roa.
23 Ki runga i tetai maunga teitei i Iseraela nei au tanu ei i te reira; e e tupu tona au rara, e ua oki te ua i rungao, e riro oki ei arezi meitaki: e noo oki te au manu peau tu ke ke ravarai nei ki raro ake; ei roto i te marumaru o tona ra au rara ratou noo ei.
24 E kite oki te au rakau ravarai o te kainga ra e, naku, na Iehova i tuku akaaka i te rakau teitei, e kua akateiteia i te rakau akaaka, e kua akamarōi te rakau mata, e kua akaruperupe i te rakau marō: naku, na Iehova i tuatua na, e naku e rave.