Angaanga

22 E TĀMA, e te au taeake, e te ai metua nei, ka akarongo mai ana kotou i taku tuatua kia kotou iaku uaorai nei.

2 (E kia akarongo atura ratou iaia, i te tuatua Ebera anga mai kia ratou, maata atura to ratou muteki; kua karanga atura aia,)

3 E ngati Iuda tikai au, i Tareso i Kilikia toku anau anga, i teianei rai oire toku apii angaia i te vaevaeo o Gamaliela, i apii uaia oki au i te ture a to tatou ai metua ra, maroiroi oki au i ta te Atua, mei ia kotou ravarai na i teianei rā.

4 I takinga-kino oki au i teianei tuatua, i te ruru anga i te tane ma te vaine, e te tuku anga atu ki roto i te are tapekaanga, e kia mate rava atu.

5 Kua kite katoa oki te taunga maata nei iaku, e te aronga pakari katoa ra; na ratou taku au leta i te au taeake i te rauka anga mai, aere atura au ki Damaseko e taki mai i to reira ma te pirianganaoa ki Ierusalema nei, kia akautungaia.

6 Iaku ra i aere ua i taua tere noku ra, e vaitata atura au ki Damaseko, kare akera i mamia, kua pini iora au i te mārama maata i te kakā anga mai no runga i te rangi i te avatea.

7 Inga iora au ki raro i te one, akarongo atura au i tetai reo i te tuatua anga mai kiaku e, E Saula, e Saula, eaa koe i takinga-kino mai ei iaku?

8 Kua karanga atura au, E te Atu, koai koe? Kua tuatua maira aia kiaku, Ko au, ko Iesu i Nazareta ra, taau i takinga-kino mai nei.

9 Kua kite oki ratou, ko tei aere katoa ra, i taua mārama ra, e mataku iora; kare ratou i kite i tona reo, to tei tuatua mai kiaku ra.

10 Kua karanga atura au, E te Atu, e akapeea au? Kua tuatua maira te Atu kiaku, Ka tu, ka aere ki Damaseko; ei reira koe e akakiteia mai ei i te au angaanga katoa i akonoia naau e rave ra.

11 E kare akera i tika iaku kia akara i te kakā o taua mārama ra, i aratakiia au ki te rima e te aronga i aere katoa ra, e tae atura au ki Damaseko.

12 E tetai tangata ra ko Anania, e tangata akono i te Atua i te akonoanga i te ture ra e rongo meitaki oki tona i te ngati Iuda ravarai i noo i reira,

13 Aere maira, e tu maira i vaitata iaku, na ko maira, E taku taeake, e Saula, ka akara mai ana. Akara atura au iaia i taua ora ra.

14 E kua tuatua maira aia, Kua akonoia na koe e te Atua o to tatou ai metua, kia kite koe i tona anoano, e kia akara koe i taua Tangata Tuatua-tika ra, e kia akarongo oki koe i te reo i tona vaa.

15 Ei kite oki koe nona ki te tangata ravarai, i taau i akara, e taau i akarongo ana.

16 E teianei, eaa koe i tavare ei? ka tu, kia bapetizoia koe, e orei ke atu i taau au ara, i te kapiki anga atu i te ingoa o te Atu.

17 E oki akaou maira au ki Ierusalema nei, iaku ra oki i pure ki roto i te iero ra, tareuia maira au;

18 Kite atura au iaia i te tuatua anga mai kiaku e, E ngakoikoi, e aere ke atu koe i tenana, akaruke mai i Ierusalema nei: kare oki ratou e akarongo i taau tuatua iaku.

19 Kua karanga atura au, E te Atu, kua kite oki ratou e, i tapeka ana au e i pāpā ana oki au, i te aronga i akarongo ia koe i te au sunago katoa ra:

20 Ka maringi ei oki te toto o te kite noou ra, ko Setephano, te tu katoa ra au i vaitata i te akatika ua anga i tona mate, e naku oki i tapapa i te kakau o te aronga i ta iaia ra.

21 Kua tuatua maira aia kiaku, Ka aere ra, ka tono ke atu oki au ia koe ki te etene ra.

22 Kua akarongo oki ratou iaia e tae akera ki te reira reo, kua akateitei atura i to ratou reo, na ko atura, E apai ke atu i tenana tangata, eiaa e vaooia i teianei ao: kare e tau iaia te ora.

23 Te kapiki ua ra ratou ma te kiriti i to ratou kakau, e ma te āū i te one ki runga;

24 Kua akaue atura oki te rangatira maata e kave iaia ki roto i te punanga, karanga atura oki e, e ui atu kiaia ma te pāpā; kia kite aia i te ara i kapiki ua mai ei ratou iaia.

25 E te tākai ra ratou iaia ki te taura, kua karanga aturā Paulo ki te rangatira anere i tu i vaitata ra, E tau aina i te ture kia pāpā kotou i te tangata no Roma, kare i akaapaia ra?

26 Kite akera te rangatira anere, aere atura aia, karanga atura ki te rangatira maata, na ko atura, E matakite i taau e rave nei: no Roma oki teianei tangata.

27 Kua aere maira te rangatira maata, kua tuatua maira kiaia, E akakite mai koe kiaku, no Roma tikai koe? Kua karanga atura aia, A.

28 Kua tuatua maira te rangatira maata, E moni maata oki taku i riro ei au ei tangata no reira. Kua karanga aturā Paulo, E tangata anau tikai au.

29 E te aronga i vaitata i te ui atu kiaia ra, aere ke atura ïa i reira: mataku katoa iora oki te rangatira maata i tona kite anga e, no Roma aia, e koia oki i ruru iaia.

30 E ao akera, kua tatara akera aia i tona tapeka, akaue atura aia i te kau taunga nunui, e te Sunederi katoa ra, e akaputuputu mai, kia kite tikai aia i te ara i tapepeia mai ei aia e te ngati Iuda ra, kua arataki maira ia Paulo ki raro, kua tuku atura iaia ki mua i to ratou aroaro.