1 Samuela

18 E KIA akaoti akera aia i taua tuatua anga kia Saula ra, piri rava akera te ngakau o Ionatana ki te ngakau o Davida, aroa aturā Ionatana iaia mei te mea ko tona uaorai vaerua.

2 Kua rave maira Saula iaia i taua rā ra, kare akerai i tuku iaia kia aere ua ana ki te ngutuare o tona metua ra.

3 Kua papau iorā Ionatana raua ko Davida i tetai koreromotu, no te mea kua inangaro rava atura aia iaia mei te mea ko tona uaorai vaerua. 4 Kua tatara akerā Ionatana i tona kakau i runga iaia uaorai, e kua apai atura kia Davida, te au kakau nona, e te koke katoa nana, e te ana katoa nana, e te tatua katoa nona.

5 E kua aere iorā Davida ki te au ngai katoa kia tonokia e Saula ra, akono tika atura aia: kua tuku akerā Saula iaia ki runga i te au tangata tamaki ra, e kiteia maira aia e te au tangata ravarai, e te au tavini katoa o Saula ra.

6 E te aere maira ratou, i to Davida oki anga mai mei te tainga mai o taua Philiseti ra, kua aere maira te au vaine mei roto mai i te au oire katoa no Iseraela, ma te peʼe e te ura, e aravei atu i te ariki ia Saula, ma te tophe, e te rekareka, e te au mea akatangi ra.

7 Kua karanga atura te au vaine i to ratou akatangi anga, na ko atura, Kua mate ta Saula e kua tausani, kua ngauru ra te tausani i ta Davida.

8 Riri rava akerā Saula, e mea mainaina nana taua tuatua ra; e kua tuatua akera aia, Kua akangauru ratou i ta Davida tausani, e taku ra ko te tausani ua anake ra ïa: eaa atu rai te toe mari ra ko te au nei?

9 Mei taua rā mairai a Saula i te akara matariki anga ia Davida.

10 E ao akera tei runga maira te vaerua kino no ko mai i te Atua ia Saula, kua totou iora aia i roto i taua are ra: kua akatangi iora te rima o Davida mei tei muatangana ra: e tao oki tei te rima o Saula.

11 Kua vero mairā Saula i taua tao ra; kua tuatua akera oki aia, E vero au e piri ua atu a Davida ki runga i te pae are. Kape akera rā Davida e rua akera kapenga.

12 Mataku akerā Saula ia Davida, no te mea tei iaiā Iehova, e kua akaruke iora aia ia Saula.

13 No reirā Saula i tuku ke atu ei iaia, e kua akariro atura iaia ei rangatira ki rungao i te tausani okotai ra, e na mua aia i te au tangata i te aere ki vao, e te oki mai ki roto. 14 E kua akono meitaki aturā Davida i tona au aerenga katoa, e tei iaiā Iehova.

15 E kia akara mai a Saula e te akono meitaki roa aia ra, mataku atura aia iaia.

16 Kareka Iseraela e Iuda katoa ra, te inangaro maira ratou ia Davida, no te mea i na mua aia ia ratou i te aere ki vao e te oki mai ki roto.

17 Kua tuatua mairā Saula kia Davida, I na, ko taku tamaine tama mua ra ko Merabi, koia taku e oronga atu naau ei vaine; kia maroiroi ra koe iaku nei, e karo i te tamaki a Iehova ra. I tuatua ana oki a Saula e, Auraka toku rima e rave iaia, na te rima ra o te Philiseti e rave iaia.

18 Kua karanga aturā Davida kia Saula, Koai oki au nei? e eaa toku nei ora, e te kopu-tangata o toku metua i Iseraela nei, i akariroiaʼi au ei unonga na te ariki?

19 Kia tae ra ki te rā e orongaiaʼi te tamaine a Saula ra ia Merabi kia Davida ra, orongaia atura ïa ei vaine na Aderiela i Meholati.

20 E kua inangaro oki te tamaine a Saula ra ko Mikala ia Davida: e kua akakite atura ratou kia Saula, e e mea taurekareka atura iaia.

21 E kua tuatua mairā Saula, E oronga au iaia ei vaine nana, kia riro aia ei maunu iaia, kia rave mai te rima o te Philiseti iaia. I karanga atu ei a Saula kia Davida, Ka riro koe i teianei rā ei unonga naku i tetai o raua ra.

22 Kua karanga aturā Saula ki tona au tavini, na ko atura, E karangaranga poiri atu kotou kia Davida, e na ko atu, I na, te taurekareka maira te ariki ia koe, e te inangaro maira tona au tavini ravarai ia koe ra: e teianei ei unonga koe na te ariki nei.

23 Kua karanga atura te au tavini o Saula i taua tuatua ra ki te taringa o Davida. E kua tuatua mairā Davida, E ana nei ainei kotou e mea iti i te tangata apinga kore mei iaku nei kia riro ei unonga na te ariki?

24 E kua akakite maira te au tavini o Saula ra kiaia, na ko maira, Teia ta Davida tuatua.

25 Kua karanga aturā Saula, E na ko atu kotou kia Davida, Kare te ariki i inangaro i te ōra, kareka e kiri i mua no te Philiseti kia okotai anere ei tutaki anga atu i te enemi o te ariki ra: te manako ra oki a Saula kia ingā Davida i te rima o te Philiseti ra.

26 E tei te akakite anga te au tavini ra kia Davida i te reira tuatua, mareka rava aturā Davida kia akariroia aia ei unonga na te ariki ra, kare ra te au rā i ope.

27 Kua tu akerā Davida, aere atura aia ma tona au tangata, e kua ta atura i to te Philiseti e rua anere atura i te tangata; e kua apai mairā Davida i to ratou kiri i mua, e kua tuku katoa atura ratou ki te ariki ra, kia riro oki aia ei unonga na te ariki. E kua oronga mairā Saula i tana tamaine ia Mikala nana ei vaine.

28 Akara aturā Saula, e kite atura e, te piri mairā Iehova kia Davida, e te inangaro ra te tamaine a Saula ra ko Mikala iaia.

29 Maata rava atura to Saula mataku ia Davida; riro aturā Saula ei enemi no Davida i te au rā katoa.

30 Kua aere maira te au tutara o te Philiseti ki vao i reira; e kia tae maira ratou, e ravenga karape maata ta Davida i ta te au tavini ravarai o Saula ra; tutuki rava atura tona rongo.