2 Samuela

24 E KUA tupu akaou akera te riri o Iehova ia Iseraela, e kua akakokoia mairā Davida e Satani ia ratou, kia tuatua aia e Ka tu, ka tatau ia Iseraela e ia Iuda.

2 Kua karanga atura oki te ariki kia Ioaba i vaitatao iaia ra, ko te rangatira oki no te nuku ra, Ka aere na roto i te au kopu ravarai o Iseraela nei, mei Dana e tae ua atu ki Bereseba, ka tatau ei i te au tangata, kia kite au i te rainga o te au tangata.

3 Kua tuatua mairā Ioaba ki te ariki, Maata ua atu rai te tangata, kia akamaata mairai to Atua ra ko Iehova, e kia riro te tangata okotai ei anere, e kia kite oki to mata, e taku pu e te ariki, i te reira: eaa ra oki koe i mataora atu ei i te reira ravenga, e taku pu e te ariki?

4 Tupu atura ra ta te ariki ra tuatua, kare ta Ioaba, e ta te au rangatira o taua nuku ra. Aere aturā Ioaba e te au rangatira o te nuku ra ki vao mai i mua i te aroaro o te ariki ra, e tatau i te au tangata o Iseraela ra.

5 E aere atura ki tetai pae Ioridana, patia iora i te puakapa i Aroera i te pae katau o te oire, i rotopu i te kauvai i Gada ra i te pae Iazera.

6 Aere atura ratou ki Gileada, e te enua ra ko Taatima-hodesi; e tae atura ratou ki Dana-iaana, e riro atura oki ki Sidona.

7 E kua tae atura ratou ki te punanga etaeta o Turia ra, e te au oire ravarai o te ngati Hevi, e te ngati Kanaana; e aere atura ratou ki Bereseba ki te pae i apatonga ra i Iuda ra.

8 E pini rava akera ia ratou taua enua ra, kua tae maira ki Ierusalema, kua ope akera nga marama e iva e nga rā oki okotai takau.

9 Kua tuku mairā Ioaba i te rainga o taua au tangata i tatauia ra ki te ariki. To Iseraela e varu anere i te tausani i te tangata toa e koke te taoonga; e to Iuda ra e rima ïa anere anga i te tausani i te tangata.

10 Kua akaapa maira to Davida ngakau iaia, kua oti akera te au tangata i te tatauia. Kua karanga aturā Davida kia Iehova, Kua ara rava au ko au i akapera: e teianei, teia taku tuatua kia koe, e Iehova, e akakore mai koe i te ara a to tavini nei; e ravenga neneva oki taku i rave io nei.

11 E ao akera oki, kia tu mai a Davida ki runga, kua tae maira te tuatua a Iehova ki te peroveta ra kia Gada, ko ta Davida ïa akara, kua tuatua maira,

12 Ka aere, e karanga atu kia Davida, Te na ko mairā Iehova, E toru eia puke mea taku e akakite atu kia koe, ko tetai taau e rave kia akapera atu au kia koe.

13 Kua aere mairā Gada kia Davida, e kua akakite maira kiaia, e kua tuatua maira kiaia, Kia rokoia mai ainei koe e te onge e kia itu ake mataiti i to enua nei? e kia toru ainei oou marama i te oro anga ki mua i toou au enemi, te arumaki ua maira ratou ia koe? e kia toru ainei rā maki-mate i to enua nei? E tenana e akamaara, ka akara i taku ra tuatua kia akaoki atu au ki tei tono mai iaku nei.

14 Kua karanga aturā Davida kia Gada, E iroiro ngata maata toku: e teianei ei te rima o Iehova tatou; te maata nei tona aroa: auraka ra au ei te rima o te tangata nei.

15 Kua tuku mairā Iehova i te maki-mate ki runga ia Iseraela mei te popongi mai e tae ua atura ki te atianga i akonoia ra; mate iora te tangata e itu ngauru i te tausani, mei Dana mai e tae ua akera ki Bere-seba.

16 Kia akatika ra te angela i tona rima kia pou Ierusalema iaia, kua tataraara iorā Iehova i taua kino ra, e kua karanga atura ki te angela i ta i taua au tangata ra, Kua oti ua: ka tāpu ana i to rima i tenana. Tei vaitatao te angela a Iehova ki te ngai pāpā sitona a Arauna ngati Iebusi ra.

17 E kua karanga aturā Davida kia Iehova i te kite anga ake aia i taua angela i ta i te tangata ra, kua na ko atura, I na, kua ara au, kua rave au i te kino: kareka i teainei au mamoe, i aa ua ana ratou? teia taku tuatua kia koe, ei runga to rima iaku nei, e ei runga katoa i te ngutuare o toku metua.

18 Kua aere mairā Gada kia Davida i taua rā ra, e kua karanga atura kiaia, Ka aere ki runga, e akatu i tetai atarau na Iehova i runga i te ngai pāpā sitona a Arauna ngati Iebusi ra.

19 Aere aturā Davida ki runga, i ta Gada i tuatua maira, i ta Iehova i akaue maira.

20 Kua akara mairā Arauna, e kite maira i te ariki e tona au tavini i te aere anga mai kiaia, e aere aturā Arauna ki vao, e kua tupou atura ki te ariki i raro tona mata i te one.

21 Kua karanga aturā Arauna, Eaa te mea i tae mai ei koe, e taku pu e te ariki, ki to tavini nei? Kua tuatua mairā Davida, E oko i te ngai pāpā sitona naau nei, e akatu i tetai atarau na Iehova, kia moki te maki-mate i te tangata nei.

22 Kua karanga aturā Arauna kia Davida, E rave koe, e taku pu e te ariki, e apai i taau e anoano ra: i na, teia te puakatoro ei atinga karakaratio, teia oki te au pāpā, e te au apinga no runga i te au puakatoro, ei vaie.

23 Ko taua au mea katoa ra ta Arauna, e te ariki e, i apai ua na te ariki. E kua karanga aturā Arauna ki te ariki, Kia kiteia mai oki koe e to Atua e Iehova.

24 Kua tuatua maira te ariki kia Arauna, Auraka; ei oko rai au, e oko rava atu ia koe: auraka taku ei apinga i oko koreia e au kia apai ei atinga karakaratio na taku Atua ra na Iehova. Oko aturā Davida i taua ngai pāpā sitona ra, e nga puakatoro, i te au sekela ario e rima ngauru ra.

25 Kua akatu iorā Davida i tetai atarau na Iehova i reira, e kua apai i te atinga karakaratio, e te atinga au ra. Kua akarongoia akera ratou e Iehova i taua enua ra, moki akera te maki-mate ia Iseraela.