Salamo

27 KO Iehova toku mārama e toku ora: koai oki taku e mataku atu? ko Iehova te maroiroi o toku ora; e mataku oki au iaai?

2 I te aerenga mai o te au tangata kikino ra, e kai i toku kiko, toku ra au enemi, e tei māro mai iaku ra, kua turori iora ratou, inga iora.

3 Patia ua mairai te nuku i te puakapa iaku nei, kare toku ngakau e mataku: tupu ua mairai te tamaki iaku nei, e irinaki anga ïa toku i reira.

4 Okotai aku mea anoano ia Iehova ra, ko taku ï e umuumu ua nei; kia noo rai i roto i te are o Iehova e ope roa ake oku puke rā i te ora anga nei, kia akara au i te meitaki o Iehova, e kia ui marie au ki roto i tona nao.

5 I te rā tumatetenga oki, e uuna aia iaku i roto i tona puakapa; e akapipini aia iaku i roto i te ngai ngaro i tona ra are; e tuku aia iaku ki runga i te mato.

6 E i teianei aia akateitei ei i toku mimiti, ki runga i toku nei au enemi e pini rava ake: e e apai au ki roto i tona ra are i te atinga rekareka; e imene oki au, e imene akameitaki oki au ia Iehova.

7 E akarongo mai, e Iehova, kia kapiki atu au ma toku reo; e aroa mai oki koe iaku, e e akatika mai koe iaku.

8 Ia koe i tuatua mai e, E kimi mai kotou i toku mata; te karanga ra toku ngakau kia koe, Ka kimi ïa au i to mata, e Iehova.

9 Auraka koe e uuna ke atu i to mata iaku nei; auraka to tavini e kopae riri uaia: kua tauturu mai oki koe iaku; auraka au e akaruke keia, auraka koe e akatitima iaku, e te Atua o toku ora.

10 Akaruke ua toku metua tane e toku metua vaine iaku, ei reirā Iehova e rave mai ei iaku.

11 E apii mai koe, e Iehova, i toou ra arataa, e arataki iaku na te arataa tikai, no toku nei au enemi.

12 Auraka koe e oronga iaku ki te inangaro o toku au enemi: e aronga kite pikikaa oki tei tu mai e māro iaku, e to tei otooto maira te takinga-kino.

13 Te manako nei au e rauka iaku te meitaki o Iehova, i te enua o tei ora nei.

14 Tiaki ia Iehova: e akamaroiroi; e nana e akamaroiroi mai i to ngakau ra: e tenana e tiaki rai koe ia Iehova.