1 Paraleipomeno
11 KUA akaputuputu maira to Iseraela katoatoa kia Davida ra ki Heberona, tuatua maira, I na, ko toou ra ivi ko matou ïa e toou ra kiko.
2 I muatangana iora oki, ka ariki ei a Saula ra, ko koe tei arataki ia Iseraela ki vao, e naau i akaoki mai ia Iseraela: e kua tuatua mai oki to Atua ra ko Iehova kia koe, Naau e angai i toku iti-tangata ia Iseraela; e ei tutara oki koe i toku ra iti-tangata ia Iseraela.
3 Kua aere anake maira te aronga pakari o Iseraela ki te ariki ra ki Heberona ki mua i te aroaro o Iehova; kua akatainu iora ratou ia Davida ei ariki ki runga ia Iseraela, i te tuatua oki a Iehova ia Samuela ra.
4 Kua aere iorā Davida e Iseraela ravarai ki Ierusalema, koia oki Iebusi; tei reira te ngati Iebusi, te aronga uenua ra, i te noo anga.
5 Kua tuatua maira to Iebusi kia Davida. Kare koe e aere mai i ko nei. Rauka iora ra te punanga o Ziona ia Davida, koia oki te oire no Davida.
6 Kua karanga aturā Davida, Ko tei pou ana iaia te ngati Iebusi ra, ka riro ïa ei maata e te rangatira. E ko Ioaba te tamaiti a Zeruia tei riro ana ki runga, e koia tei maata.
7 Kua noo iorā Davida ki roto i taua punanga ra; tapaia iora e ratou ko te oire o Davida.
8 Kua patu akera aia i taua oire ra e pini ua ake, mei Milo mai e pini ua ake: ko te toenga ra o taua oire ra, kua patu akaouia ïa e Ioaba.
9 Te tupu ra oki to Davida mana e maata ua atura: no te mea tei iaiā Iehova Sabaota.
10 Teia oki nga tangata toa maata i o Davida ra, ko tei tauturu mai iaia, ratou e to Iseraela katoa oki, kia rauka iaia te basileia, i te akaariki anga atu iaia, i ta Iehova oki i tuatua mai ia Iseraela ra.
11 Teia oki te tatau anga i taua aronga toa i o Davida ra; Ko Iasobeama ngati Hakemoni, ko tei maata ïa i nga rangatira ra: kua tāki atura i tana korare, ta atura i te aronga tangata e toru anere i te tainga okotai.
12 E muri ake iaia, ko tetai i aua nga tangata toa toko toru ra, ko Eleazara te tamaiti a Dodo e ngati Ahohi.
13 I vaitata aia ia Davida i Pasa-damima, ka putuputu ei te Philiseti ki reira i te tamaki ra, i reira tetai kotinga kainga i ki i te kerite; oro atura te tangata i mua i te aroaro o te Philiseti.
14 Tu iora ratou i roto i taua kainga ra, e kua akaora atura, ta iora i te Philiseti; ora rava atura ratou ia Iehova, e ora maata rava atura.
15 Aere atura e toko toru no taua aronga mamaata ra e toru ngauru ra, e tae atura ki raro kia Davida ra ki te mato ra, ki te ana a Adulama; te puakapaia ra te nuku Philiseti i te o ra i Rephaima.
16 Tei roto a Davida i taua punanga ra, e tei Betelehema te Philiseti i te tiaki anga.
17 Kua kaki akerā Davida i te vai, e kua tuatua akera, Naringa tetai e oronga mai i tetai manga vai i te ruavai i Betelehem, i te pae ngutupa ra e!
18 Kua tiki ua atura aua nga tangata toko toru ra na roto ua atura i te nuku Philiseti ra, e kua uti iora i te vai i taua ruavai i te pae ngutupa i Betelehema ra, kua rave maira, e kua apai maira kia Davida ra; kare akerā Davida i inu, kua riringi ra ki mua ia Iehova.
19 E kua tuatua akera aia, Auraka rava au, e taku Atua, kia akapera; ka inu ainei oki au i te toto o eianei puke tangata, ko tei akaruru ua i to ratou mate? Kua akaruru oki ratou i to ratou mate, i te apai anga mai i teianei vai. Kare akera aia i inu. I pera aua nga tangata toa toko toru ra.
20 E ko Abisai te taeake o Ioaba, ko tei maata ïa i nga tangata toko toru ra: kua tāki akera aia i tana korare ki runga, ta atura i te au tangata e toru anere; rauka iora iaia te ingoa i nga tangata toko toru ra.
21 Ko te tangata ïa i maata i aua nga tangata toko toru ra, riro atura aia ei rangatira i rungao; kare rai i taea iaia nga tangata toko toru i muatangana ra.
22 Ko Benaia te tamaiti a Iehoiada, e tamaiti aia na tetai tangata toa i Kabazeela, kua maata katoa tana au ravenga; e rua katoa ana puke liona tuputupua i ta i Moabi: e kua eke aia ki raro e kua ta rai i tetai liona i roto i te vaarua i te tuatau kiona.
23 Kua ta oki aia i tetai tangata Aiphiti, e tangata roa, e rima kubiti te roa; e karare rai oki tei te rima o taua tangata Aiphiti ra, mei te kautā maata a te raranga kakau ra; aere atura aia kiaia ra, ma te rakau tokotoko, kua aō iora taua korare ra i te rima o te Aiphiti ra, kua ta atura iaia ki te korare nana uaorai.
24 I akapera aturā Benaia te tamaiti a Iehoiada, i raukaʼi tona ingoa i nga tangata toa toko toru nei.
25 I na, kua maata rai aia i te au tangata e toru ngauru ra; kare ra i taea iaia nga tangata toko toru i muatangana ra. Tukuia akera aia e Davida no runga i tona ra pupu vaeau.
26 Ko Asahela oki tetai i taua aronga toa no te nuku ra, e taeake no Ioaba; ko Elihanana te tamaiti a Dodo i Betelehema ra,
27 Ko Samota i Harori, e ko Heleza i Peloni,
28 Ko Ira te tamaiti a Ikesa i Tekoa ra, ko Abiezera i Anatota,
29 Ko Sibekai i Husai, ko Hai i Ahohi,
30 Ko Maharai i Netopha, ko Heleda te tamaiti a Baana i Netopha,
31 Ko Itai te tamaiti a Ribai no ko i Gibea ra, no te au tamariki a Beniamina, ko Benaia i Piratoni,
32 Ko Hurai no ko i nga kauvai i Gaasa ra, ko Abiela i Araba,
33 Ko Azamaveta i Baraumi, ko Eliaba i Saalaboni,
34 Ko nga tamariki a Hasema i Gizoni, ko Ionatana te tamaiti a Sage i Harari ra,
35 Ko Ahiama te tamaiti a Sakara i Harari ra, ko Eliphala te tamaiti a Ura,
36 Ko Hephera i Mekera, ko Ahiia i Peloni,
37 Ko Hezero i Karamela, e ko Naarai te tamaiti a Ezibai ra,
38 Ko Ioela te taeake o Natana ra, ko Mibara te tamaiti a Hageri,
39 Ko Zeleka ngati Amona, ko Naharai i Beroti, e apai taoonga tamaki na Ioaba te tamaiti a Zeruia ra,
40 Ko Ira i Ituri, ko Gareba i Ituri,
41 Ko Uria ngati Heta, Ko Zabada te tamaiti a Ahalai,
42 Ko Adina te tamaiti a Siza e ngati Reubena, tetai ïa rangatira o te ngati Reubena, e te au tangata katoa oki e toru ngauru,
43 Ko Hanana te tamaiti a Maaka e ko Iosaphata i Mitini,
44 Ko Uzia i Asetera, ko Sama e ko Iehiela nga tamariki a Hotama i Aroera,
45 Ko Iediaela te tamaiti a Simeri, e tona taeake ko Ioa i Tizi,
46 Ko Eliela i Mahavi, e ko Ieribai, e ko Iosavia, nga tamariki a Elanaama, e ko Itema ngati Moabi,
47 Ko Eliela, e ko Obeda, e ko Iasiela i Mesoba.