1 Paraleipomeno

21 KUA tu mairā Satani ia Iseraela, kua akakoko ia Davida kia tatau aia ia Iseraela.

2 Kua karanga aturā Davida kia Ioaba e te aronga mamaata i taua iti-tangata ra, E aere e tatau ia Iseraela, mei Bere-seba e tae ua atu ki Dana; ka apai mai ei i taua tatau ra ki ku nei kiaku nei, kia kite au.

3 Kua tuatua mairā Ioaba, Kia akamaata mai a Iehova i tona iti-tangata e kia riro tetai ei anere; e taku pu e te ariki, kare ainei ratou i te tavini anake no taku pu? eaa oki taku pu i anoano ei i te reira? eaa oki aia i anoano ei i te akatupu i te ara ia Iseraela nei?

4 Tupu atura ra ta te ariki ra tuatua, kare ta Ioaba. Riro aturā Ioaba, e pini ua ake Iseraela katoa, e kua oki maira ki Ierusalema.

5 Kua tuku mairā Ioaba i te rainga o taua au tangata i tatauia ra kia Davida. To Iseraela katoatoa ra okotai tausani ïa i te tausani anga, e okotai anere oki i te tausani, e koke te taoonga: to Iuda ra e a ïa anere anga i te tausani e itu oki ngauru tausani ara, e koke te taoonga.

6 Kare ra Levi e Beniamina i tatauia i o ratou ra: e tuatua viivii ia Ioaba ta te ariki i akaue mai ra.

7 Mainaina akera oki te Atua i taua mea ra; i ta ai aia ia Iseraela.

8 Kua karanga aturā Davidi ki te Atua, Kua ara rava au, ko au i akapera: e teianei, teia taku tuatua kia koe, e akakore mai koe i te ara a to tavini nei; e ravenga neneva oki taku i rave io nei.

9 Kua tuatua mairā Iehova ki te akara a Davida kia Gada, na ko maira,

10 E aere, e karanga atu kia Davida, e na ko atu, Te na ko mairā Iehova, E toru eia puke mea taku e akakite atu kia koe: ko tetai taau e rave kia akapera atu au kia koe.

11 Kua aere mairā Gada kia Davida, e kua tuatua maira kiaia, Te na ko mairā Iehova, E rave ana koe,

12 I te onge e kia toru ake mataiti; e kare ra, kia eke koe ki mua i te aroaro o to au enemi e kia toru marama to aru angaia e te koke a to au enemi; e kare ïa, i te koke a Iehova ra, i te maki ki runga i te enua nei, e te Angela a Iehova i te ta aere anga e pini ua ake te au tapere katoa o Iseraela nei. E teianei, e akamaara ana i taku ra tuatua kia akaoki atu au ki tei tono mai iaku nei.

13 Kua karanga aturā Davida kia Gada, E iroiro ngata maata toku; e teianei ei te rima o Iehova au; te maata nei tona aroa; auraka ra au ei te rima o te tangata nei.

14 Kua tuku mairā Iehova i te maki-mate ki runga ia Iseraela; pou iora to Iseraela i te mate e itu ngauru i te tausani.

15 Kua tono akera te Atua i tetai angela ki Ierusalema, kia pou iaia ra; te akapou ra oki aia, kua akera mairā Iehova, e kua tataraara i taua kino ra, e kua tuatua maira ki te angela i akapou ra, Kua oti ua, e tāpu ana i to rima i tenana. Te tu ua ra te Angela a Iehova i vaitata i te ngai pāpā sitona a Arauna, ngati Iebusi ra.

16 Kua nānā akera to Davida mata ki runga, kite akera i te Angela a Iehova i te tu ua anga i te va i rotopu i te rangi e te enua, ma te koke i te rima kua unuiia, te akatikaia ra ki runga ia Ierusalema. Kua tipapa iorā Davida ki raro te mata, e te aronga pakari katoa, ma te kakau paoa.

17 Kua karanga aturā Davida ki te Atua, Kare ainei ko au tei akaue i te au tangata nei kia tatauia? ko au tei araia e tei rave rai i te kino nei; kareka i teia au mamoe ra, i aa ua ana ratou? ei runga iaku nei to rima, e taku Atua e Iehova, vaoo ei, e ei runga katoa i te ngutuare o toku metua, ko taku ïa tuatua kia koe: auraka ra ei runga i to iti-tangata nei e kia mate ratou ra.

18 Kua akaue maira te Angela a Iehova ia Gada kia tuatua aia kia Davida e, e aere a Davida ki runga ka akatu ei i tetai atarau na Iehova, i roto i te ngai pāpā sitona a Arauna ngati Iebusi ra.

19 Aere aturā Davida i taua tuatua a Gada ra, i tuatuaia mai e ia i te ingoa o Iehova.

20 Kua ariu mairā Arauna, kite maira i te Angela: pipini iora aia e nga tamariki katoa toko a ana ra. Te pāpā rā Arauna i te sitona.

21 Te aere aturā David kia Arauna, kua akara mairā Arauna kite maira ia Davida, e kua aere maira aia mei roto mai i taua ngai pāpā sitona ra, e kua tupou maira kia Davida i raro te mata i te one ra.

22 Kua karanga aturā Davida kia Arauna, E o mai koe i te ngai pāpā sitona nei kiaku, ei te oko tikai taau ïa e o mai kiaku, kia akatu au i tetai atarau ki rungao na Iehova; kia moki te maki-mate i te tangata nei.

23 Kua tuatua mairā Arauna kia Davida, E rave ua atu noou, ka rave ei koe, e taku pu e te ariki, i tei tau meitaki ki ona mata ra. I na, kua oronga atu au i te au puakatoro ei atinga karakaratio, e te au pāpā ra ei vaie, e te sitona ei atinga kai; taua au mea katoa ra taku e oronga atu naau.

24 Kua karanga atura te ariki ra ko Davida kia Arauna, Auraka; ei oko tikai ra taku e oronga atu: kare oki au e rave i taau ra na Iehova, kare oki au e apai i te au atinga karakaratio oko kore.

25 Kua oronga aturā Davida kia Arauna ei oko i taua ngai ra, e ono anere sekela auro i te teiaa tikai ra.

26 Kua akatu akerā Davida i tetai atarau na Iehova i reira, e kua apai i te au atinga karakaratio, e te au atinga au, e kua tautopa atura ia Iehova; e kua kite maira aia iaia i te ai no te rangi mai ki rungao i taua atarau atinga karakaratio ra.

27 Kua akaue mairā Iehova i te angela ra; e kua momono akera aia i tana koke ki roto i te vaî.

28 I taua tuatau ra, kite akerā Davida e kua kite mai a Iehova iaia i roto i te ngai pāpā sitona a Arauna ngati Iebusi ra, kua apai atura aia i te atinga i reira.

29 Te puakapa oki a Iehova, i angaia e Mose i te medebara, e te atarau atinga karakaratio, tei te ngai teitei ïa i Gibeona i taua tuatau ra.

30 Kare akerai i tika ia Davida kia aere ki mua i te reira, ka ui ei ki te Atua: kua mataku oki aia i te koke a te Angela a Iehova.