Salamo

42 MEI te aili e aue aere i te au vai peka ra, koia katoa toku vaerua i te aue aere anga ia koe, e te Atua e.

2 Te kaki nei toku vaerua i te Atua, i te Atua ora ra; aea ra au e tae atu ei, e akakite atu ei ki mua i te aroaro o te Atua?

3 Toku roi-mata nei, taku ïa kai i te po e te ao, i tuatua mai ei ratou i te au rā katoa nei, Teiea to Atua na?

4 Te akamaara nei au i taua au mea ra, e te riringi nei i toku vaerua i roto iaku nei: iaku oki i aere ma te tangata katoa ra, kua aere marie atu matou ki te are o te Atua ra, ma te reo rekareka e te akameitaki; ma te maata katoa o te tangata i te akono anga i te oroa tapu ra.

5 Eaa koe i taitaiaʼi, e taku vaerua? eaa oki koe i ngarepurepu ei i roto iaku nei? e irinaki i te Atua; ka akameitaki rai au iaia, tei mua oki i tona aroaro te ora.

6 E taku Atua e, kua taitaia toku vaerua i roto iaku nei; E teianei, te akamaara nei au ia koe mei te enua maira mei Ioridana; mei ko i nga Heremona, e te maunga ra ko Mizara.

7 Te kapiki nei tetai moana ki tetai moana i te aruru anga o to au vai rere; to au kare katoa ra, e to au ngaru ra, kua na runga ua iaku nei.

8 Ka akaue mairā Iehova i tona takinga-meitaki i te ao, e i te po ka vai rai tana imene iaku nei; taku pure i te Atua e oraʼi au nei.

9 Ka tuatua atu au ki te Atua, E taku mato, eaa koe i akapoinaʼi iaku nei? eaa au i aue aere ei i te takinga-kino o te enemi nei?

10 Mei te atiati anga o toku nei au ivi, te akakino o toku au enemi nei; i tuatua ua mai ei ratou i te au rā katoa, Teiea to Atua na?

11 Eaa koe i taitaiaʼi, e toku vaerua? eaa koe i ngarepurepu ei i roto iaku nei? e irinaki i te Atua; ka akameitaki rai au iaia, ei ora ïa no toku nei mata, e ei Atua noku.