Genese
43 TE maata rava ra te onge i taua enua ra.
2 E pou akera te sitona i te kaingaia, ta ratou i apai mei Aiphiti maira, kua tuatua akera to ratou metua tane kia ratou, Ka aere rai kotou, e oko rai i tetai manga kai na tatou.
3 Kua karanga aturā Iuda kiaia, na ko atura, Kua tuatua tika tikai maira taua tangata ra kia matou nei, na ko maira, Kia kore to kotou teina e tae katoa mai, kare rava kotou e kite mai i toku nei mata.
4 Kia tuku mai koe i to matou teina e aere katoa matou ra, ka aere ïa matou ki raro e oko i te kai naau:
5 Kia kore ra koe e tuku mai iaia kia aere, kare matou e tae ki raro: kua tuatua mai oki taua tangata ra kia matou e, Kia koe e tae katoa mai to kotou teina, kare kotou e kite mai i toku mata.
6 Kua tuatua mairā Iseraela, Eaa kotou i takinga-kino mai ei iaku, i akakite atu ei kotou i taua tangata ra e, te noo ra tetai taeake rai no kotou?
7 Kua karanga atura ratou, Kua ui maē mai taua tangata ra i te tuatua ia matou, e to matou ra kopu-tangata, na ko maira, Te ora na to kotou metua tane? e e taeake rai to kotou? e kua akakite atura matou i taua tuatua ra: kitea atu e matou e, e tuatua mai aia, E arataki mai i to kotou teina ki raro nei?
8 Kua karanga aturā Iuda ki tona metua tane kia Iseraela. Tuku mai ana i taua tamaiti na kiaku nei, e tu matou e aere; kia ora oki tatou, auraka kia mate, ko matou, e ko koe, e ta matou au tamariki.
9 Ei tutaki au iaia; ko au taau e umuumu mai iaia: kia kore au e akaoki mai iaia kia koe, ka tuku atu ei au ki mua i toou aroaro na, ei iaku ïa ara vai ei e tuatau ua atu.
10 Naringa matou kare i tavare, mei teianei kua oki mairai matou, ko te tu rua ïa o te oki anga mai.
11 Kua tuatua maira to ratou metua ko Iseraela kia ratou, Ko te reira ra, teia ta kotou e rave; e rave kotou i te kai memeitaki o te enua nei i roto i ta kotou au āriki, ka apai ei na taua tangata ra ei taoonga-rima, i tetai manga balama, e tetai manga meli, te kai kakara, e te mura, te au ua rakau, e te au sekadi:
12 Kia taki rua atu kou moni kia apai kotou; e akaoki atu oki i te moni i apaiia mai i roto i te vaa o ta kotou au pute ra: peneiake e ē ua anga:
13 E rave katoa oki i to kotou teina, e tu, e oki atu kotou ki taua tangata ra:
14 E kia aroaia mai kotou ki mua i te aroaro o taua tangata e te Atua Mana katoatoa ra, kia tuku mai aia i tetai tuakana o kotou, e ia Beniamina nei: e kia ngere au ra, kua ngere rai ïa.
15 Kua rave iora taua au tangata ra i taua taoonga-rima ra, e kua tataki rua atura i te kou moni i te rima, e Beniamina; tu akera ratou, aere atura ki Aiphiti, tu atura ki mua i te aroaro o Iosepha ra.
16 E kite akerā Iosepha e, ko ratou katoa ma Beniamina, kua tuatua akera aia ki te akaaere o tona are, Ka arataki i taua au tangata nei ki te ngutuare, e ko i te puaka, e ka akonokono; ka kaikai oki te au tangata nei ki oku ra kia avatea.
17 Kua pera oki taua tangata ra ta Iosepha i akaue ra; kua arataki aia i taua au tangata ra ki roto i te are o Iosepha.
18 E mataku akera taua au tangata ra, i te mea ratou i aratakiia ki roto i te are o Iosepha; kua tuatua akera ratou, No te moni i akaokiia i roto i ta tatou au pute i muatangana ra i aratakiia mai ei tatou ki ko nei; kia rauka tana tapepe anga mai ia tatou, ka opu mai ei ia tatou ka rave ei ia tatou ei tuikaa, e ta tatou au asini.
19 Kua aere atura ratou i vaitata ki te akaaere i taua ngutuare o Iosepha ra, kua karangaranga iora kiaia i te pae ngutupa o taua are ra,
20 Na ko atura, E to matou rangatira e, e tere oko kai tikai to matou i aere mai ei matou i muatangana ra:
21 E tae atura matou ki te ngai moe anga, ko te tatara angaia ïa e matou i ta matou au pute, e i na, tera ake ta matou katoa ra au moni tei roto i te vaa o ta matou au pute, e moni aite ta matou: e kua akaoki maira matou i te reira ra i to matou rima.
22 E e moni ke tei apai katoaia mai e matou i to matou rima ei oko kai: kare matou i kite i te tangata i tuku i ta matou moni ki roto i ta matou au pute.
23 Kua tuatua maira aia, Kia ora kotou, auraka e mataku: kua oronga mai to kotou Atua, te Atua o to kotou ra metua, i te apinga na kotou i roto i ta kotou na au pute: i ko nei ta kotou moni iaku nei. Kua arataki maira aia ia Simeona kia ratou ra.
24 Kua arataki atura taua tangata ra ia ratou ki te are o Iosepha ra, e kua apai maira i te vai, ei orei i to ratou vaevae; e kua angai atura oki i ta ratou au asini ki te kai.
25 Kua akonokono iora ratou i ta ratou atinga, e kia tae mai a Iosepha i te avatea: kite akera oki ratou e, ei reira ratou e kai ei i te kai.
26 E tae mairā Iosepha ki te ngutuare, kua apai akera taua atinga ta ratou i taoi maira kiaia ra, ki roto i te are, e kua tupou iora ratou ki raro i te one ki mua iaia ra.
27 Kua ui maira aia kia ratou i te meitaki anga, kua tuatua maira, Te meitaki ra to kotou metua tane, te tangata ruaine ta kotou i tuatua maira? Te ora ra ainei?
28 Kua karanga atura ratou. Te ora ua rai toou tavini to matou nei metua tane, te meitaki rai.
29 Kua nānā maira tona mata, akara maira i tona teina ia Beniamina, i te tamaiti a tona uaorai metua vaine, e kua tuatua maira, Ko to kotou teina openga ra teia, ta kotou i tuatua mai kiaku ra? e kua tuatua maira oki aia, Kia aroa mai te Atua ia koe, e taku tamaiti.
30 Kua rapurapu ua iorā Iosepha; kua aue aroa oki tona ngakau i tona teina: e kua kimi i te ngai aue anga; kua tomo atura ki roto i te pia moe, aue iora i reira.
31 E kua orei iora i tona mata, e kua aere maira ki vao, akakoromaki ua iora, e kua karanga atura, E akanoonoo i te kaingakai.
32 Kua akanoonoo iora ratou i tana, koia anake uaorai, e ta ratou, ko ratou anake o, e ta to Aiphiti, ko tei kaikai i reira ra, ko ratou anake oki; kare oki to Aiphiti i kapiki katoa i ta ratou kaingakai i ta te ngati Ebera; e mea viivii oki te reira i ta to Aiphiti ra.
33 Noo iora ratou ki mua i tona aroaro, ko te tama mua ana, no te mea koia tei anau ana, e te tamaiti ou ra, no te mea koia te openga: kua va ua iora taua au tangata ra, ki tetai ki tetai.
34 Kua tua akera aia i te kai i mua i tona aroaro na ratou: kareka ta Beniamina tuanga, e tau ïa ki nga tuanga e rima katoa i ta ratou ra. E kua inu oki ratou ma ia katoa i te wina, e rekareka akera ratou.