Exodo
6 KUA karanga aturā Iehova kia Mose i reira, Ei teianei koe e kite ei i taku rave ia Pharao ra: tei te rima marōrō oki aia e tuku ei ia ratou, e ei rima marōrō oki e tuaru ke ei aia ia ratou i tona ra enua.
2 Kua tuatua mairai te Atua kia Mose, na ko maira kiaia, Ko au ko Iehova:
3 I mama atura oki au kia Aberahama, kia Isaaka, e kia Iakoba, ko te Atua Mana katoatoa, kare ra au i kitea e ratou i toku ingoa nei, ko Iehova.
4 Kua akatinamou ra au i taku ra koreromotu kia ratou, e oronga atu i te enua ra ko Kanaana kia ratou, i te enua o to ratou tuitarere ua anga i noo tangata ke ei ra.
5 Kua akarongo oki au i te ngengeti anga o te tamariki a Iseraela, ta to Aiphiti i akaao ua na; e kua maara oki au i taua koreromotu naku ra.
6 E tenana, e karanga atu ki te tamariki a Iseraela, Ko au ko Iehova, e naku kotou e arataki ke mai i te au apainga a to Aiphiti ra, e e matara mai kotou iaku i ta ratou akaao anga mai, e ka akaoraia kotou e au i toku rima i akatikaia nei, e ma te tutaki maata:
7 E ka rave oki au ia kotou ei tangata noku uaorai, e ka riro au ei Atua no kotou; e ka kite kotou e ko Iehova au to kotou Atua ra, ko tei arataki ke mai ia kotou i te apainga a to Aiphiti ra.
8 E ka arataki au ia kotou ki te enua, taku i taputou atu e e oronga no Aberahama, no Isaaka, e no Iakoba; ko taku ïa e oronga no kotou ei nooanga: ko au ko Iehova.
9 Kua pera oki a Mose i te karanga anga atu ki te tamariki a Iseraela ra: no te tumatetenga ngakau ra, e te tinai-mate anga, kare akerai ratou i akarongo mai ia Mose.
10 Kua tuatua mairā Iehova kia Mose, na ko maira,
11 Ka aere, ka karanga atu ki te ariki o Aiphiti ra kia Pharao, kia tuku rai aia i te tamariki a Iseraela ki vao mai i tona enua.
12 Kua karanga aturā Mose ki mua i te aroaro o Iehova, na ko atura, I na, te tamariki a Iseraela kare i akarongo mai iaku; eaa oki a Pharao ka akarongo mai ei kiaku, kare oki toku i te vaa tukatau?
13 Kua akaperā Iehova kia Mose raua ko Aarona, e kua tuku mai i te tuatua kia raua ki te tamariki a Iseraela, e ki te ariki o Aiphiti ra kia Pharao ra, kia arataki mai raua i te tamariki a Iseraela mei roto mai i taua enua ra ko Aiphiti.
14 Teia te au mataipo tutara. Ko nga tamariki tamaroa a te tama mua a Iseraela ra a Reubena, ko Hanoka ïa, e ko Paulo, ko Hezerona, e ko Karemi: ko nga kopu-tangata teia o Reubena.
15 E ko ta Simeona puke tamariki tamaroa ra; ko Iemuela ïa, e ko Iamina, e ko Ohada, e ko Iakina, e ko Zohara, e ko Saula e tamaiti na tetai vaine ngati Kanaana: ko nga kopu-tangata teia o Simeona.
16 Teia oki te ingoa o nga tamariki tamaroa a Levi i to ratou anau anga; ko Geresona ïa, e ko Kohata, e ko Merari: e to Levi ra au mataiti i te ora anga nei, okotai ïa anere, e toru ngauru, e itu ara i te mataiti:
17 Ko ta Geresona puke tamariki tamaroa, i to ratou ra kopu-tangata; ko Libeni ïa, e ko Simi:
18 E ta Kohata puke tamariki tamaroa ra; ko Amerama ïa, e ko Izabara, e ko Heberona, e ko Uziela: e to Kohata au mataiti i te ora anga nei, okotai ïa anere, e toru ngauru, e toru ara i te mataiti:
19 E ta Merari puke tamariki tamaroa ra; ko Mahako ïa, e ko Musi: ko nga kopu-tangata teia o Levi, i to ratou anau anga ra.
20 Kua rave iora Amerama i te tuaine o tona metua tane ko Iokebeda ei vaine nana; i anau akera tana iaia ra ko Aarona, e ko Mose: e to Amerama au mataiti i te ora anga nei, okotai ïa anere, e toru ngauru, e itu ara i te mataiti.
21 E ta Izahara puke tamariki tamaroa ra; ko Kora ïa, e ko Nephega, e ko Zikiri.
22 E ta Uziela puke tamariki tamaroa ra; ko Misaela ïa, e ko Elizapana, e ko Sitiri.
23 Kua rave iorā Aarona i te tuaine o Naasona ia Elisepa, te tamaine a Aminadaba, ei vaine nana; e anau akera tana iaia ra, ko Nadaba, e ko Abihu, e ko Eleazara, e ko Itamara.
24 E ta Kora puke tamariki tamaroa ra; ko Asira ïa, e ko Elakana, e ko Abiasapa: ko nga kopu-tangata ngati Kora ïa.
25 Kua rave iorā Eleazara te tamaiti a Aarona i tetai i te au tamaine a Putiela ei vaine nana; e anau akera tana iaia ra ko Phinehaza. Ko nga mataiapo tutara eia o te ngati Levi ra, i to ratou au kopu-tangata ra.
26 Ko tauā Aarona ra teia raua ko Mose ta Iehova i tuatua maira e, E arataki mai i te tamariki a Iseraela mei Aiphiti mai, ma to ratou au nuku ra.
27 Ko raua rai tei karanga atu ki te ariki o Aiphiti kia Pharao, kia arataki mai i e tamariki a Iseraela mei Aiphiti maira: ko tauā Mose rai teia raua ko Aarona.
28 Taua rā ra i tuatua mai ei a Iehova kia Mose i te enua ra ko Aiphiti,
29 Ia Iehova i tuatua mai ei kia Mose ra, ka na ko mai ei ra ei, Ko au ko Iehova: e karanga atu koe ki te ariki o Aiphiti ra kia Pharao i te au mea katoa taku i karanga atu kia koe na;
30 E kua karanga atura oki a Mose ki mua i te aroaro o Iehova e, I na, kare toku i te vaa tukatau, eaa oki a Pharao e akarongo mai ei kiaku?