Salamo

44 E TE Atua e! kua rongo to matou taringa, kua akakiteia mai matou e to matou ai metua, i taau i rave i to ratou puke rā, i te au rā taito ra.

2 Na to rima i tuaru ke i te au etene, o kua tanu mai koe ia ratou ei tupau; kua tairipoti koe i taua aronga ra, kua akatupu ra koe ia ratou.

3 Kare oki i rauka te enua i ta ratou uaorai koke, kare oki ratou i ora i to ratou uaorai rima; ko toou ra rima katau, e to rima, e te mārama o to mata: no te mea kua tau roa koe ia ratou.

4 E te Atua, ko koe rai toku ariki, e akaue koe i te ora no Iakoba:

5 Ko koe ra ka opara atu ei matou i to matou au enemi; ka takatakai matou i tei māro mai i toou ra ingoa:

6 Kare oki au e irinaki i taku uaorai ana, kare oki au e ora i taku uaorai koke.

7 Ko koe tika rai tei akaora ia matou i to matou au enemi, e ko tei akaakama atu i te aronga i makitakita mai ia matou nei.

8 Tei te Atua to matou nei akatietie anga e po ua atu te rā, e toou te ingoa ta matou e akapaapaa kare e vata. Sela.

9 Kua kopae ra koe, e kua akaakama mai koe ia matou, e kare ua koe i te aere katoa anga ma to matou au nuku.

10 Te akaoki nei koe ia matou ki muri i mua i te aroaro o te au enemi, e te pou nei matou i te aronga e makitakita mai ia matou nei.

11 Kua tuku koe ia matou, kia pou, mei te mamoe ra, e kua akangaoro ia matou i roto i te au etene.

12 Te oko nei koe i toou ra tangata i te apinga kore, e kare oki taau e maata ra i te oko ia ratou.

13 Kua akariro koe ia matou ei akakinoanga na to matou au tangata tupu, ei akavaavaanga, e ei avirianga, na te aronga e takako mai ia matou nei.

14 Kua akariro koe ia matou ei tuatua anga na te au etene, e ei takirikiri anga upoko na te au tangata nei.

15 Te vai ua nei rai toku aringaringa ki mua iaku nei, e te tapokiia nei au e toku mata akama;

16 I te reo o te akavaavaa e te akakino; i mua i te aroaro oki o te enemi ra, e te ukeumu ra.

17 Kua rokoia mairai matou i taua au mea katoa ra; kare rava koe i ngaropoina ia matou; kare oki i pikikaa i te koreromotu naau ra.

18 Kare to matou ngakau i oki ki muri ia koe ra, kare oki to matou takainga i tatipake i toou arataa.

19 Kua akaatiati ra koe ia matou i te ngai taae ra, e kua oora koe i te maru-mate ki runga ia matou.

20 Naringa i ngaropoina ia matou te ingoa o to matou Atua, naringa oki i akatika ana to matou rima ki te atua ke,

21 Kare aina te Atua e kimi i te reira? tei kitea e ia te au munangaro katoa o te ngakau.

22 Noou ra matou i taiaʼi i te au rā katoa ra; kua akonoia mei te mamoe no te mate ra.

23 E ara! eaa koe i moe ei, e te Atu? ka tu, auraka matou e akaruke takiri ravaia!

24 Eaa koe i tapoki ei i to mata, kua akapoina koe i to matou tumatetenga, e to matou takinga-kino angaia?

25 Kua tuku akaakaia matou ki raro i te one: kua piri to matou kopu ki raro i te enua.

26 Ka tu ki runga, ei tauturu no matou; e akaora ia matou i te aroa noou ra.