2 Samuela

13 E I MURI ake i te reira, e tuaine purotu to te tamaiti a Davida to Abasaloma, ko Tamara tona ingoa; e te inangaro ra te tamaiti a Davida ra ko Amanona iaia.

2 E pekapeka maata to Amanona, akamaki iora aia i taua tuaine nona ra ia Tamara: no te mea e paretenia aia, e mea kino ia Amanona kia rave ua atu iaia.

3 E oa ra to Amanona ko Ionadaba te ingoa, e tamaiti na Simea, e taeake no Davida: e tangata pakari roa oki a Ionadaba.

4 E kua tuatua maira aia kiaia, Eaa na koe, i te tamaiti a te ariki na, i ikoke ei i tera rā i tera rā? auraka koe e akakite mai kiaku nei? Kua karanga aturā Amanona kiaia, Te inangaro nei au i te tuaine o taku taeake nei o Abasaloma ia Tamara.

5 Kua tuatua mairā Ionadaba kiaia, Ka akāvai ana koe ki runga i to roi na, e tapiki maki koe: e kia aere mai to metua tane e akara ia koe ra, e karanga atu koe kiaia, Teia taku tuatua kia koe, e tuku mai ana koe i toku tuaine nei ia Tamara, e apai mai i te kai naku, ka rave ei i taua kai ra i mua iaku nei, kia akara atu au, ka kai ei au ra, na tona rima e apai mai.

6 Kua moe iorā Amanona ki raro, kua akatapiki maki iora aia: e kia aere mai te ariki e akara iaia, kua karanga aturā Amanona ki te ariki, Teia taku tuatua kia koe, e tuku mai ana koe i taku tuaine ia Tamara, kia aere mai ana, e kia roi e rua ake tupe faraoa rikiriki naku, kia akara atu au, ka kai ei au, na tona rima e apai mai.

7 Kua tono akerā Davida i te tiki ia Tamara, kua tuatua akera, Ka aere ana ki te are o to tungane ra ko Amanona, ka rave ei i te kai nana.

8 Kua aere aturā Tamara ki te are o tona tungane ra ko Amanona, rokoia atu te moe ua ra aia. Kua rave iora aia i te faraoa, kua oi iora, e kua roi i te kai ki mua iaia, e kua tunu iora i taua kai ra.

9 Kua rave iora aia i te pani, kua riringi iora ki mua iaia; kare akera aia i kai. Kua tuatua akerā Amanona, E tuku atu i te au tangata katoa ki vao. Kua aere anake atura te au tangata ki vao.

10 Kua karanga aturā Amanona kia Tamara, Ka apai mai ana i te kai ki roto i te pia nei, kia kai atu au i ta to rima i rave nei. Kua rave akerā Tamara i aua nga tupe faraoa i roiia e ia ra, kua apai atura ki roto i te pia ki tona tungane ra kia Amanona.

11 E kia apaiia e ia aua nga mea ra nana e kai, kua opu maira aia iaia, e kua karanga atura, E aere mai, e moe taua, e taku tuaine.

12 Kua tuatua maira aia kiaia, Auraka, e taku tungane, auraka koe e rave māro mai iaku; kare oki e akaperaia i Iseraela nei: auraka koe e rave i teianei mea neneva.

13 E ruri tika oki au i toku nei akama kiea? e riro oki koe mei tetai o te aronga neneva i Iseraela nei. E teianei, teia taku tuatua kia koe, e karanga atu koe ki te ariki; kare oki aia e tāpu iaku ia koe na.

14 Kare akerai aia i akarongo i tona reo; e no te mea e ririnui tona, rave iora, moe atura.

15 Kua maata rava atura to Amanona makitakita iaia i reira; ko te makitakita tana i makitakita iaia ra, kua maata roa atura i te anoano tana i anoano iaia ra. E kua karanga aturā Amanona kiaia, Ka tu, ka aere.

16 Kua tuatua maira aia kiaia, Kare e tika tena: kua pera koe i te tono iaku ra, e kino maata ïa i taau i rave iaku nei. Kare akerai aia i akarongo iaia.

17 Kua kapiki atura aia ki tona tavini tei raverave iaia ra, e kua karanga atura, Ka tuku atu i tera ra vaine ki vao, ka tamou atu ei i te pa i murio iaia.

18 Tei runga iaia tetai kakau purepure; ko te tu ïa o te kakau o te au tamaine paretenia a te ariki ra. Kua arataki maira te tavini nona iaia ki vao, e kua tamou iora i te pa i murio iaia.

19 Kua tuku iorā Tamara i te reu ai ki runga i tona mimiti, e kua aeae iora i tona kakau purepure ra, e kua tuku iora i te rima ki runga i tona mimiti, e kua aere ua atura ma te aue.

20 Kua tuatua maira tona tungane ko Abasaloma kiaia, I rave ana to tungane ko Amanona ia koe? e muteki ua ra koe, e taku tuaine: e tungane ïa aia noou; auraka koe e akono ua atu i tena. Noo meamea ua iorā Tamara i roto i te are o tona tungane o Abasaloma.

21 Kia kite rā Davida i taua au mea katoa nei, maata rava akera tona riri.

22 Karekā Abasaloma kare akera i karanga ua atu kia Amanona i te tuatua meitaki, e te tuatua kino: te makitakita rā Abasaloma ia Amanona, no te mea kua rave māro aia i tona tuaine ra ia Tamara.

23 E topa akera nga mataiti e rua ra, e pakoti anga mamoe ta Abasaloma i Baala-hazora, i vaitata i Epheraima: e kua tiki aturā Abasaloma i te au tamariki ravarai a te ariki ra.

24 Aere aturā Abasaloma ki te ariki ra, e kua karanga atura, I na oki, e pakoti anga mamoe ta to tavini nei, teia taku tuatua kia koe, taki aere katoa tatou, e te ariki, e te au tavini nona ra, e to tavini nei.

25 Kua karanga atura te ariki kia Abasaloma, Auraka, e taku tamaiti, auraka tatou e akaope i te aere i teianei, ka teimaa aea koe ia matou. Māro rava atura aia; kare akera aia i tae, kua akaora maira aia iaia.

26 Kua karanga aturā Abasaloma, E kare ra, teia taku tuatua kia koe, e tuku ua mai koe ia Amanona e aere matou. Kua tuatua maira te ariki kiaia, Eaa aia ka aru katoaʼi?

27 Māro rava aturā Abasaloma, e kua tuku ua mai aia ia Amanona, e te au tamariki katoa a te ariki ra, kia aere ua ana.

28 Kua akaue ana oki a Abasaloma i te au tavini nona, i tuatua ana e, E akara meitaki ana kotou, e kia rekareka marie to Amanona ngakau i te wina, e kia karanga atu au kia kotou e, Ka ta ia Amanona: ei reira ka ta ai, auraka e mataku: kare ainei kua akaueia atu kotou e au? e akamatutu e akamaroiroi tikai.

29 Kua pera atura te au tavini o Abasaloma ra ia Amanona i ta Abasaloma oki i akaue maira. Kua tu anake akera te au tamariki a te ariki ra ki runga, kake atura ki runga i te mule, tanao, tanao, e oro atura.

30 Te aere ua ra ratou na te arataa, i tae atu ei taua tuatua ra kia Davida ra, na ko atura, Kua ope rava te au tamariki a te ariki ra i te taia e Abasaloma, e kare e toe e okotai iti ake.

31 Kua tu akera te ariki ki runga, kua aeae atura i ona kakau, e kua moe iora ki raro i te one; e tu ua maira tona au tavini ravarai i vaitata ma te kakau ngaengae katoa.

32 Kua karanga aturā Ionadaba te tamaiti a Simea te taeake o Davida ra, na ko atura, Auraka koe e manako, e taku pu, e kua ta akaope ravaia e ratou te au tangata ou katoa ra, te au tamariki a te ariki; ko Amanona anake ra oki tei mate: e mea akakoroia ïa e Abasaloma mei te rā mai i rave māro ei aia i tona tuaine ia Tamara.

33 E tenana, auraka, e taku pu e te ariki, auraka e kinokino rava to ngakau, auraka e manako e kua pou takiri te au tamariki a te ariki i te mate: ko Amanona anake ra tei mate.

34 Kua oro ke rā Abasaloma. Kua nānā akera te mata o te tangata ou te tiaki ra, kua akara akera ki runga, e i na, te aere maira te tangata e manganui na te tumu maunga i muri mai iaia ra.

35 Kua karanga aturā Ionadaba ki te ariki, I na, te aere maira te au tamariki a te ariki: ko ta to tavini rai i karanga atu na, koia tera.

36 E tei te akaoti anga aia i taua tuatua nana ra, i na, kua aere maira te au tamariki a te ariki, kua akateitei maira i to ratou reo, aue iora; aue katoa iora te ariki, e te au tavini katoa oki nona, e aue maata ua atu.

37 Kua oro rā Abasaloma, e aere atura kia Talamai te tamaiti a Amiuda ra, ki te ariki o Gesura ra. Te aue ua rā Davida i tana tamaiti kare e rā i tukua.

38 Oro aturā Abasaloma, e kua aere ki Gesura ra, ka toru atura mataiti i reira.

39 E anoano maata to te ariki ra to Davida e aere kia Abasaloma: kua papa akera tona manava ia Amanona, kua mate oki aia.