Genese

31 KITE akera aia i te tuatua a nga tamariki a Labana, i te na ko anga e, Kua ope roa ta to tatou metua ia Iakoba; no roto i ta to tatou metua ra taua apinga katoa nana akera i raukaʼi.

2 E te akara aturā Iakoba i te mata o Labana, e i na, kare mei tei muatangana ra.

3 E kua tuatua mairā Iehova kia Iakoba e, Ka oki koe ki te enua o to ai metua ra, e ki tou ra kopu-tangata; ei vaitata katoa au ia koe na.

4 Kua unga aturā Iakoba i te tiki ia Rahela raua ko Lea, e aere mai ki te kainga ki te anana nana ra,

5 E kua karanga atura aia kia raua. Te akara nei au i te mata o to korua metua tane, kare mei tei muatangana ra; i vaitata katoa iora te Atua o toku metua kiaku nei.

6 Kua kite oki korua e, kua akaope au i toku maroiroi i te rave anga i te angaanga a to korua metua na.

7 Kua pikikaa mai oki to korua metua iaku, e kua ngauru akenei i te akatu ke anga i taku nei tutaki; kare ra i tika i te Atua kia kino au iaia.

8 Kia tuatua mai aia e, Ko te ma tipurepure ko taau ïa tutaki; kua anau maira te au puaka katoa, e mea tipurepure anake: e kia tuatua mai aia e, Ko te mea kotiatia taau ïa tutaki; kua anau maira te au puaka katoa i te mea kotiatia anake.

9 E kua rave io nei te Atua i te apinga a to korua metua, e kua oronga mai kiaku nei.

10 Tei te tuatau i kapiti aere ei te au puaka ra, toku ïa kite anga i te moe naku ra, i nānā akera au i toku mata ki runga, e i na, kite atura au i te au toa i kake ki runga i te au puaka ra e, e kotiatia, e te tipurepure, e te koinaina anake.

11 E kua tuatua maira te Angela a te Atua kiaku i taua moe naku ra, na ko maira, E Iakoba e: kua karanga atura au, Teia au.

12 E kua tuatua maira aia, Ka nānā ana i to mata ki runga, e akara i te au toa e rere ki runga i te au puaka, e kotiatia, e te tipurepure, e te koinaina anake; kua akara oki au i ta Labana i rave ia koe na.

13 Ko au te Atua i Betela, i te ngai taau i akatainu i te tuaau, i taau oki i tia mai i te tia kiaku ra: ka tu i tenana, e akaruke mai i teianei enua, e ka oki ki te enua i anau ei koe na.

14 Kua tuatua mairā Rahela raua ko Lea, na ko maira kiaia, E puapinga iti ake ainei ta maua i rauka i te are o to maua nei metua?

15 Kare ainei kua akariro aia ia maua ei tangata ke ke? kua oko oki aia ia maua, e tana oko ia maua ra, kua pou roa ïa aia.

16 Ko te au apinga katoa oki a to maua metua i raveia e te Atua ra, na tatou ïa, e ta tatou au tamariki; e tenana, e akono koe i ta te Atua i tuatua katoa mai kia koe ra.

17 Kua tu akerā Iakoba ki runga, e kua tuku akera i tana au tamariki, e nga vaine nana ra, ki runga i te au kamela;

18 E kua rave aia i te au apinga ravarai i rauka iaia, koia te au puaka i rauka iaia i Padana-arama ra, e aere ki tona metua kia Isaaka, ki te enua ra ki Kanaana.

19 Kua riro aturā Labana e pakoti i te au mamoe nana ra. Kua keia iorā Rahela i te au tiki no tona metua.

20 Aere poiri atura oki a Iakoba, kare a Labana ngati Arama ra i kite, kare oki aia i akakite ua atu i taua aerenga nona ra.

21 Riro atura aia, e tona katoa ra au apinga; tu akera aia ki runga, aere atura na runga i te vai, e kua ariu atura tona mata ki te maunga ra ki Gileada.

22 E tae akera ki te po toru, i akakiteia atu ei a Labana e, kua riro a Iakoba.

23 Kua akaputuputu maira aia i tona kopu-tangata, e aru atura iaia, e po itu akera te aerenga; rokoia atura ki runga i te maunga ra i Gileada.

24 Rokoia iorā Labana ngati Arama e te Atua i te moe i te po, e kua tuatua maira kiaia, E matakite ia koe, auraka koe e tuatua ua atu kia Iakoba i te kino, e te meitaki katoa.

25 Ka rokoia atu ei a Iakoba e Labana ra, kua patiā Iakoba i tona puakapa ki runga i te maunga: e kua patia katoa aturā Labana e tona ra kopu-tangata i to ratou puakapa ki runga i taua maunga ra ko Gileada.

26 E karanga aturā Labana kia Iakoba, Eaa koe i akaperaʼi, i aere poiri mai ei koe, kare au i kite; e kua riro mai nei oki aku puke tamaine ia koe, mei te tuikaa i riro i te tamaki ra?

27 Eaa koe i aere poiri ua mai ei, i aere keia mai ei; e kare i tuatua mai kiaku, kia tuku mai oki au ia koe ma te rekareka, e te peʼe, e te tophe, e te kinura?

28 Kare akenei oki i tika ia koe kia ongi ua au i aku puke tamariki tamaroa, e aku puke tamariki tamaine. E ravenga neneva taau i akapera.

29 E tika ua iaku kia rave kino atu ia kotou na: kua tuatua maira te Atua o to kotou metua ra kiaku inapo, na ko maira, Kia matakite ia koe, auraka koe e karanga ua atu kia Iakoba i te kino, e te meitaki katoa.

30 E tenana, te rapurapu na koe e aere, no te mea, te anoano na koe i te ngutuare o toou metua na, eaa ra oki koe i keiaʼi i taku au atua nei?

31 Kua tuatua mairā Iakoba, na ko maira kia Labana, No te mea, i mataku au; i manako oki au e, ka riro koe i te aō mai i to puke tamaine nei.

32 Ko te au atua noou na, ko te tangata kia kitea atu tei iaia ra, kia mate atu ïa. Ka kimi ana koe i taau na apinga i ko nei iaku nei, ki mua i te aroaro o to tatou nei, e kitea atu ka rave. Kare oki a Iakoba i kite e, kua keiaia e Rahela.

33 Kua aere aturā Labana ki roto i te puakapa o Iakoba, e ki roto katoa i te puakapa o Lea, e te puakapa o nga tavini vaine ra; kare ra i kitea e ia. Kua aere maira aia mei roto mai i te puakapa o Lea ra, e kua tomo atura ki roto i te puakapa o Rahela ra.

34 Kua raveia aua nga tiki ra e Rahela, e kua momono ki roto i te nooanga kamela, e kua noo iora aia ki rungao. Kua kimi iorā Labana e pini ua ake taua puakapa ra, e kare rava i kitea.

35 E kua tuatua maira aia ki tona metua, Auraka koe e mainaina, e taku pu, i te mea ko au kare i tu ki runga i mua i toou aroaro nei; ko te peu oki o te vaine teia i runga iaku nei. Kua kimi iora aia, kare rai i kitea aua nga tiki ra.

36 E riri akerā Iakoba, e kua akamura maira ia Labana; e kua tuatua mairā Iakoba kia Labana, na ko maira, Eaa taku apa? eaa toku kino, i aru viviki mai ei koe iaku nei?

37 Kua makitoro marie io nei koe i te au apinga katoa naku nei, e eaa taau i kitea i te au apinga katoa naau na? Ka tuku mai ana i ko nei ki mua i te aroaro o to matou nei, e to kotou na, e na ratou e tuku mai i te tika tikai ia taua nei.

38 Okotai takau akenei oku mataiti ki ko na ia koe na; kare rava taau mamoe, e taau puakanio i maemo ta ratou anaunga, kare oki te au toa o taau ra anana i kaingaia e au.

39 Ko tei etieti i te puaka taae ra, kare ïa i tutaki; e ko tei riro i te ao ra, e ko tei riro oki i te po, kua umuumu mai koe i te tutaki iaku nei.

40 I mate au i te pukakā i te ao, e te anu i te po; e kare oki aku e moe.

41 Kua takau tikai toku mataiti i toou na ngutuare; okotai ngauru ma a oku mataiti i te tavini anga ia koe i nga tamaine aau na, e ono oku mataiti, no taau au puaka nei ïa: e kua ngauru oki oou akatu ke anga i taku nei tutaki.

42 Naringa ko te Atua o toku metua ra, ko te Atua o Aberahama, e Tei matakuia e Isaaka, kare i ko nei kiaku nei, kua tuku uaia mai au e koe i teianei rai ma te puapinga kore. Kua akara maira te Atua i toku nei mate, e te angaanga a toku rima, i kauvae mai ei aia ia koe inapo nei.

43 Kua karanga aturā Labana kia Iakoba, na ko atura, Ko eianei puke tamaine, e tamaine ïa naku, e teianei au tamariki, e tamariki ïa naku, e teianei au puaka, e puaka ï naku; e naku te au mea ravarai taau e akara na; e teianei, e akapeea au i aua nga tamaine naku nei, e te au tamariki ta ratou i anau?

44 E tenana, e aere mai, e papau ana taua i tetai koreromotu na taua, ka vaoo ei kite no taua.

45 Kua rave akerā Iakoba i tetai toka, akatu akera ei akairo.

46 Kua karanga aturā Iakoba ki tona ai taeake, Ka akaputuputu mai ana i te toka; kua tari maira ratou i te toka, kua akautua maira i te utua anga; e kua kaikai iora ratou i reira ki runga i taua utua toka ra.

47 E tapaia iora e Labana ia Iegara-saaduta: karekā Iakoba, tapa iora aia it e reira ra ia Galeeda.

48 Kua tuatura iora oki a Labana, Ei kite teianei utua toka no taua i teianei rā. I tapaiaʼi te ingoa o te reira ra ia Galeeda:

49 E ia Mizepa; no te mea, kua tuatua aia e, Kia akara mai a Iehova ia taua, kia taka ke taua tetai e tetai.

50 Kia takinga-kino koe i aku puke tamaine nei, e kia kapiti koe i etai vaine ke i aku tamaine nei, e kare rava e tangata ei kite; i na, tera te kite ia taua, ko te Atua.

51 Kua karanga atu rai a Labana kia Iakoba, I na, teianei utua, e i na, teianei pou, i akatuia e au i rotopu ia taua nei;

52 Ei kite teianei utua, e ei kite teianei pou, e kare teianei utua e topa iaku, ka aere atu ei kia koe ra; e kare oki teianei utua, e teianei pou e topa ia koe, ka aere mai ei koe kiaku, mei te mea e takinga-kino ra:

53 Ei te Atua no Aberahama, e te Atua no Nahora, te Atua o to raua metua, te akataka i te tuatua ia taua nei. Kua taputou iorā Iakoba i Tei matakuia e tona metua ra e Isaaka.

54 Kua apai iorā Iakoba i te atinga i runga i taua maunga ra, e kua karanga atura ki tona ai taeake ra, e kai i taua kai ra: kua kai iora oki ratou i taua kai ra, e noo iora ki runga i taua maunga ra i te reira po.

55 E i te popongi roa, kua tu akerā Labana ki runga, kua ongi iora i nga tamaroa, e nga tamaine nana ra, e kua akameitaki maira ia ratou: aere aturā Labana, oki atura ki tona ngai tikai.