Deuteronomi

13 KIA tupu ua atu tetai peroveta e te moemoea i rotopu ia kotou na: e kia tuku mai aia i te akairo e te mea umere ia koe ra;

2 E kia tupu tikai taua akairo ra, e taua mea umere ra, kua tuatua maira aia kia koe, kua na ko maira, Taki aere tatou e aru i te au atua ke nei, (i tei kore i kitea e koe nei,) e araara tatou i te reira;

3 Auraka koe e akarongo i te tuatua a te reira peroveta, e te reira moemoea; te timata ra oki to kotou ra Atua ko Iehova ia kotou, kia kitea to kotou inangaro anga i to kotou ra Atua ia Iehova, ma to kotou ngakau katoa, e ma to kotou vaerua katoa.

4 Ko to kotou Atua ra ko Iehova ta kotou e aru, e koia ta kotou e mataku, e tana ra au akauenga te akono, e akarongo oki i tona reo, e araara oki iaia, e koia ta kotou e topiri tika atu;

5 E taua peroveta ra, e taua moemoea ra, ka tamate takiri ravaia ïa; koia i tuatua e, e akaanga ke ia kotou i to kotou Atua ra ia Iehova, ko tei arataki mai ia kotou mei te enua maira mei Aiphiti, e kua akaora ia koe i taua ngutuare i tavini ei ra, kia taka ke koe i taua arataa ra ta to Atua ta Iehova i akaue ia koe e na reira te aere. Pou atura ia koe i reira te kino i roto ia kotou.

6 Kia akanauru poiri mai to taeake ia koe, i te tamaiti a to metua vaine, e taau uaorai tamaiti, e taau uaorai tamaine, e taau uaorai vaine, e moe i to keke ra, e toou oa, mei ia koe katoa uaorai te tu ra, kia tuatua mai e, Taki aere tatou e araara i te au atua ke, (tei kore i kitea e koe, ko koe, e to ai metua katoa ra:)

7 I te au atua no te au tangata e akapini ia koe ra, i tei vaitata ia koe, e tei te mamao ke, mei tetai openga mai o te enua e tae ua atu ki tetai openga o te enua ra;

8 Auraka koe e akatika, auraka oki e akarongo ua atu kiaia; auraka koe e akara aroa atu iaia; auraka koe e akaperepere, auraka oki e uuna atu iaia:

9 E tamate takiri ra koe iaia; ko toou ana te rima e rave ana iaia e tamate takiri rava, e muri ake io te rima o te tangata ravarai ra.

10 peî koe iaia ki te toka kia mate rava; no te mea i aruaru aia ia koe kia taka ke koe i to Atua ra ia Iehova, tei arataki mai ia koe mei te enua maira mei Aiphiti, mei te ngutuare i tavini ei ra.

11 Kia akarongo katoa to Iseraela ravarai e kia mataku, kia kore rava e tupu akaou te kino mei te reira te tu i roto ia kotou na.

12 Kia akarongo ua atu koe i te tuatua i tetai oire ta to Atua ta Iehova i oronga mai noou ei nooanga, i te na ko anga mai,

13 Kua tupu e tokotai puke tangata kanga i rotopu ka kotou, e kua akatareva ke i te au tangata o to ratou oire, i te na ko anga atu e, Taki aere tatou e araara i te au atua ke, kare i kitea e kotou na;

14 E ui koe i reira, e makitoro marie, e e ui maei oki; e i na, e mea mou, e kua taka tikai, e kua raveia te reira mea viivii i rotopu ia kotou na;

15 Ka tamate takiri rava koe i to te reira oire ki te mata koke, kia tutuamu rava ïa te reira e to roto katoa ra, e to reira au puaka ki te mata koke.

16 E akaputuputu oki koe i te apinga tini ravarai o te reira oire i rotopu i te arataa, ka taʼu ei i taua oire ra e te apinga tini ravarai ki te ai, ki mua i te aroaro o to Atua ra o Iehova: e kia riro ua atu ei ututua e tuatau ua atu; kare rava te reira oire e patu akaouia:

17 Auraka rava tetai vaʼi o taua mea i taumaaia ra kia mouria e to rima na; kia anga mai a Iehova i te otooto anga o tona riri, e kia akaperepere mai ia koe ra, e kia aroa mai ia koe, e kia akamaata mai ia koe, i tana i taputou atu ki to ai metua ra;

18 Kia akarongo oki koe i te reo o to Atua ra o Iehova, ma te akono i tana katoa ra au akauenga taku e akaue atu kia koe i teianei rā, i te rave anga i te mea tika ki mua i te aroaro o to Atua ra ko Iehova.