2 Ariki

16 TAE akera ki te ngauru ma itu o Peka te tamaiti a Remalia mataiti, i ariki ei a Ahaza te tamaiti a Iotama ariki no Iuda.

2 Tei te mataiti okotai takau o Ahaza i ariki ei aia, okotai ngauru ma ono ona mataiti i te ariki anga i Ierusalema; kare ra aia i rave i te mea tika i mua i te aroaro o tona Atua o Iehova, mei tona tupuna ra mei ia Davida.

3 Aere atura ra aia na te arataa o te au ariki o Iseraela; e kua apai atura i tana uaorai tamaiti na roto i te ai, mei te ravenga rikarika a te au etene, ko tei tuaruia e Iehova i mua i te aroaro o te tamariki a Iseraela ra.

4 E kua apai aia i te atinga, e kua tutungi i te atinga kakara, ki runga i te au ngai teitei, e ki runga i te au tuaivi, e ki raro ake i te au rakau marumaru katoa ra.

5 Kua aere mai te ariki o Arama ra ko Rezina, e te ariki o Iseraela ra ko Peka te tamaiti a Remalia ra, e tamaki mai ia Ierusalema; e kua tamaki maira ia Ahaza, kare akerai i autu.

6 Rauka iora Elata i te ariki o Arama ra ia Rezina i reira no Arama, e te ngati Iuda i Elata ra, tuaru ke atura ïa: e kua aere maira to Edoma ki Elata, e kua noo i reira e tae rava akenei ki teianei rā.

7 Kua tono akerā Ahaza i te au karere ki te ariki o Asura ra kia Tigelata-pilesera, karanga atura, Ko to tavini oki au, e to tamaiti: e aere mai ana koe e akaora iaku i te rima o te ariki o Arama, e te rima oki o te ariki o Iseraela, ko tei tu mai ki runga e tamaki iaku nei.

8 Kua rave akerā Ahaza i te ario e te auro, i kitea i roto i te are o Iehova, e i roto i te uipaanga apinga i te are o te ariki ra, e kua akau atura ei taoonga-rima na te ariki o Asura ra.

9 Kua akarongo maira taua ariki o Asura ra kiaia; kua aere iora oki taua ariki o Asura ra, kua tamaki iora i Dameseko, e rauka iora, e kua apai i te au tangata ei tuikaa ki Kira, e kua ta iora ia Rezina.

10 Kua aere iora taua ariki ra ko Ahaza ki Damaseko, e aravei i te ariki o Asura ra, ia Tigelata-pilesera, kite akera aia i te atarau i Damaseko ra; kua akau akera te ariki ra ko Ahaza kia Uria taunga ra i te ariteanga o taua atarau ra, i te tu e tau tikai i te ravenga.

11 Kua akatu akerā Uria taunga i tetai atarau, e aiteite tikai te tu i tei akauia mai e te ariki ra e Ahaza mei Damaseko maira: kua pera oki a Uria taunga ra i te rave, ka rokoia mai ei e taua ariki ra e Ahaza mei Damaseko maira.

12 E tae maira te ariki mei Damaseko maira, kua kite maira te ariki i taua atarau ra; kua akavaitata maira te ariki ki taua atarau ra, e kua apai i te atinga ki rungao,

13 Kua tutungi akera aia i te atinga karakaratio nana, e te atinga kai nana, e kua riringi i te atinga inu nana, e kua pîpî i te toto o tana atinga au ki runga i taua atarau ra.

14 E kua apai maira oki aia i te atarau veo i mua i te aroaro o Iehova, mei mua mai i taua are ra, mei rotopu mai i taua atarau ou ra e te are o Iehova, e kua tuku atura ki te pae i apatokerau i tana atarau ou ra.

15 Kua akaue maira te ariki ra ko Ahaza kia Uria taunga ra, tuatua maira, Ko te atinga karakaratio popongi te tutungi ki runga i te atarau maata ra, e te atinga kai aiai ra, e te atinga karakaratio a te ariki ra, e te atinga kai nana, e te au atinga karakaratio a te tangata ravarai o te enua nei, e ta ratou atinga kai, e ta ratou au atinga inu; ka pîpî ei i te toto katoa o te au atinga karakaratio ki rungao, e te toto katoa o te au atinga: kareka te atarau veo nei, e ui ana au ki reira.

16 Kua perā Uria taunga ra i tei akaueia mai e te ariki ra e Ahaza.

17 Kokoti keia iora e te ariki ra e Ahaza i tei runga i te tapa o te au turanga āriki-vai, e kua tuku keia iora taua āriki-vai ra: e kua tuku iora i te āriki-vai maata ki raro no runga mai i te au puakatoro veo i raro akera, e vaooia iora ki runga i te patu toka ra.

18 E te ara tapokiia no te sabati i angaia e ratou i roto i te are, e te tomoanga o te ariki i vao mai, i ruri keia e ia i te are o Iehova, no te ariki o Asura ra.

19 E te toenga o te tuatua ia Ahaza, i raveia e ia ra, kare ainei kua tataia ki roto i te buka, te tuatua no te au rā o te au ariki no Iuda ra?

20 Moe iorā Ahaza ki o tona ra ai metua, e tanumia iora ki o tona ai metua i roto i te oire o Davida: tupauia akera aia i te au e tana tamaiti ra e Hezekia.