Numero

17 KUA tuatua mairā Iehova kia Mose, na ko maira,

2 E karanga atu koe ki te tamariki a Iseraela, e e rave oki koe i te rakau okotai ngauru ma rua: tataki tai rakau to te ngutuare okotai o to ratou ra metua, okotai mataiapo no te ngutuare o to ratou metua, okotai ïa rakau; e tata koe i tona ingoa ki rungao i tana uaorai rakau. 3 E tata oki koe i to Aarona ingoa ki runga i te rakau o Levi: okotai rakau to te mataiapo okotai no te ngutuare o to ratou metua.

4 E naau e vaoo i taua au rakau ra ki roto i te Are uipaanga, ki mua i te aruna kite ra, i te ngai taku e aravei ia kotou. 5 E te tangata taku e iki ra, ka riro tana rakau i te pua; e akamutu atu oki au i te urutoe a te tamariki a Iseraela, ta ratou i urutoe ia korua ra.

6 Kua karanga aturā Mose ki te tamariki a Iseraela, e kua apai maira to ratou au mataiapo e pini ua ake i te rakau kiaia, okotai mataiapo okotai rakau, i akono rai i te ngutuare o to ratou metua, okotai ngauru ma rua rakau; e tei roto katoa te rakau o Aarona i taua au rakau na ratou ra.

7 Kua vaoo iorā Mose i taua au rakau ra ki mua i te aroaro o Iehova, i roto i te Are kite ra.

8 E ao akera, aere aturā Mose ki roto i te Are kite ra; e i na, taua rakau o Aarona ra no te ngutuare o Levi ra, kua pua ïa, e kua pua tiareia, e te sekadi para oki ki rungao.

9 Kua apai mairā Mose i taua au rakau katoa ra i mua i te aroaro o Iehova ra ki vao, ki te au tamariki ravarai a Iseraela ra; e kua nanau iora ratou, e kua rave anake iora ratou, ko te tangata ko tana rakau, ko te tangata ko tana rakau.

10 Kua tuatua mairā Iehova kia Mose, E apai i te rakau o Aarona ki mua i te aruna kite, kia vaoo ua na, ei akairo no teianei aronga tangata meameaau; kia mutu roa to ratou urutoe anga ki mua iaku nei, kia kore ratou e mate. 11 Kua pera oki a Mose; ko ta Iehova i akaue mai iaia, ko tana ïa i rave.

12 Kua tuatua maira te tamariki a Iseraela kia Mose, na ko maira, I na, kua mate matou, kua pou matou, kua ope roa matou i te pou!

13 Ko tei akavaitata ua atu ki te puakapa o Iehova, kua mate ïa: ka akaope takiri aina matou i te mate?