Salamo

106 ALELU Ia. E akapaapaa ia Iehova; e meitaki oki tona; e tu oki tona aroa e rimua. 2 E tika iaai kia akaiki i te au ravenga mana a Iehova? e ope iaai tona meitaki kia akakite? 3 E ao to te aronga i akono i te tuatua-tau; i tei rave i te tuatua-tika kare e tukumoe. 4 E akamaara mai koe iaku, e Iehova, i te akaperepere naau, i toou ra au tangata tikai: kite mai oki koe iaku i te ora naau ra; 5 Kia kite oki au i te meitaki o te aronga i ikiia e koe ra; kia rekareka oki au i te rekareka a to iti-tangata ra, kia akapaapaa katoa au ma taau ra tuanga. 6 Kua ara matou ma to matou ai metua katoa ra; kua rave matou i te kino, kua rave matou i te mea tika kore. 7 Kare to matou ai metua i manako i to au angaanga taka ke i Aiphiti; kare ratou i akamaara i te maata anga o toou ra au aroa, kua akakoko ra ratou iaia i taatai, i te Tai Muramura ra. 8 Kua akaora ra aia ia ratou i tona ra ingoa, kia kitea oki tona mana maata. 9 Kua akamura aia i te Tai Muramura, e kua marō atura: e kua arataki aia ia ratou na te moana ra, mei te mea e kua na te medebara. 10 Kua akaora aia ia ratou i te rima o tei makitakita mai ia ratou ra, e kua ora iora ratou iaia i te rima o te enemi ra. 11 Ngaromia iora to ratou au enemi i te tai; kare takiri tetai o ratou i toe. 12 Kua akarongo ratou i tana tuatua i reira, kua imene akameitaki ratou iaia. 13 Ngaropoina vave atura ia ratou tana au angaanga; kare i tiaki i tana tuatua. 14 Kua maata rava atura to ratou kaki i te medebara, e kua timata atu i te Atua i te ngai motutaa ra. 15 Kua akatika atura aia i ta ratou i pati ra, kua tuku maira ra i te ikoke i to ratou vaerua. 16 Kua vareae oki ratou ia Mose i roto i te puakapa ra, e ia Aarona i akatapuia e Iehova ra. 17 Kua amama te enua e kua apuku ia Datana, e tangaro iora te pouou o Abirama. 18 Kua ka iora te ai i rotopu i to ratou pououanga, kua ka akera te aronga kikino i te ai. 19 I Horeba ta ratou angaanga i te punua puakatoro, e kua akamori atura i te tu i akatoia ra. 20 Kua akariro oki ratou i to ratou kakâ ei tu no te puakatoro e kai i te ngangaere ra. 21 Kua ngaropoina ia ratou te Atua i akaora ia ratou ra; ko tei rave i te au mea nunui i Aiphiti; 22 Te au angaanga taka ke i te enua o Hama ra; te au mea matakutaku i te Tai Muramura ra. 23 I tuatua mai ei aia e, e tamate rava aia ia ratou, aua tana i iki ra ko Mose, i tu mai i te ngai ngaa ki mua iaia, ei akatioi ke i taua riri akapou nona ra. 24 Kua akavaavaa atura ratou i te enua anoanoia ra, kare akera i akarongo i tana tuatua: 25 Kua urutoe ra ratou i to ratou au puakapa, kare akera i akarongo i te reo o Iehova. 26 I akatika atu ei oki aia i tona rima ia ratou, kia inga ratou i te medebara; 27 E kia inga to ratou uanga i roto i te au etene ra, e kia pueurikiriki ke ratou iaia i te pa enua ra. 28 Kua kapiti oki ratou kia Baala-peora, e kua kai oki i te atinga a tei mate ra. 29 Ko ta ratou ïa akakoko anga atu iaia kia riri, i ta ratou ra ravenga; rokoia iora ratou e te maki-mate. 30 Kua tu mairā Phinehaza, kua akaoko i taua ara ra, kore akera taua maki-mate ra. 31 Riro atura te reira ei tuatua-tika nana, i tera uki i tera uki, e tuatau ua atu. 32 Kua akariri oki ratou iaia i te vai o Meriba, tumatetenga iorā Mose ia ratou: 33 Kua akaongoongo oki ratou i tona ngakau, i tuatua tau kore ei tona vaa. 34 Kare oki i pou ia ratou to te pa enua, ta Iehova i tuatua mai kia ratou ra: 35 Kua iropu ua ra ratou i roto i te au etene ra, e kua apii i ta ratou au ravenga ra. 36 Kua akamori oki ratou i to ratou au idolo; e riro atura ei ereere no ratou. 37 Kua apai ratou i ta ratou au tamariki tamaroa e ta ratou au tamaine na te au demoni: 38 Maringi ua atura te toto ara kore ia ratou; te toto o ta ratou au tamariki tamaroa e ta ratou au tamaine, ta ratou i apai na te au idolo i Kanaana: viivii akera taua enua ra i te toto: 39 E kua viivii ratou i ta ratou uaorai au angaanga, e kua akaturi aere i ta ratou uaorai ra au peu. 40 I tupu ei oki te riri o Iehova i tona uaorai au tangata, e kua rikarika atura i tana uaorai tuanga. 41 E kua oronga atura aia ia ratou i te rima o te au etene; e te aronga i makitakita mai ia ratou ra tei tutara ki runga ia ratou. 42 Kua akaaoia ratou e to ratou au enemi, e kua akakauraroia ratou i to ratou rima. 43 Tuatini akera tana akaora anga ia ratou; e kua akariri ua mairai ratou iaia i ta ratou tuatua, e kua tuku akaakaia ratou i to ratou kino. 44 Kua akono maira aia i to ratou tumatetenga, kia kite aia i to ratou kapiki: 45 Kua akamaara rai aia i tana koreromotu ia ratou, e kua tataraara aia no tona ra aroa maata. 46 Kua akatupu aia i te aroa ia ratou, i te aronga katoa i apai ia ratou ei tuikaa. 47 E akaora ia matou, e to matou Atua, e Iehova e, e akaputuputu ia matou mei roto atu i te au etene ra, kia akameitaki matou i to ingoa tapu ra, kia rekareka matou i te akapaapaa anga ia koe ra. 48 Kia akameitakiia te Atua o Iseraela ia Iehova, mei tupua mairai e tuatau ua atu; e tuatua mai oki te tangata katoatoa ra, Amene. Alelu Ia.