Koheleta

2 KUA karanga iora au ki toku uaorai ngakau, Aere mai, e timata ana i te rekareka, e kimi oki i te navenave: e i na, e puapinga kore katoa te reira.

2 Kua karanga atura au ki te kata, Kua nenevaia koe: e te rekareka, Eaa ïa puapinga?

3 Kua ui au ki toku uaorai ngakau e, ei runga au i te wina, te aratakiia ra toku ngakau e te pakari; e ei te kanga au, kia kite oki au i taua meitaki ra, e angaanga uaʼi te tamariki a te tangata nei i raro ake i teianei rangi, e ope rava ake to ratou puke rā i te ora anga nei.

4 Kua rave au i te au angaanga nunui; kua akatu au i tetai aronga are; kua tanu au i te kainga vine:

5 Kua rave au i te kainga manea noku, e te ngai vaorakau, e kua tanu i te au rakau kai e manganui te tu ki roto;

6 Kua ko oki au i etai vaarua no te vai, ei tamauu i te au rakau tupu ou i tanumia ra:

7 Kua rauka iaku te tavini tane e te tavini vaine, e e tavini rai toku i anau ki roto i toku ra are; e manganui taku anana puakatoro e te mamaoe, e iti ta te au tangata katoa i noo i Ierusalema i mua iaku nei:

8 Kua akaputuputi oki au i te ario e te auro, e te au apinga manea na te ui ariki, e no te au enua; kua tiki oki i te tane imene e te vaine imene, e i tei inangaroia e te tamariki a te tangata ra, te vaine oki e manganui ua atu.

9 Riro atura au ei tangata maata, e te apinga maata taku i te aronga katoa i noo i Ierusalema i mua iaku ra; e te vai nei oki taua pakari noku ra iaku nei.

10 E ko tei inangaroia e toku mata ra, kare ïa i tāpuia e au; kare au i akangere i taku ngakau i te au mea katoa e rekarekaʼi ra; kua rekareka oki taku ngakau i te au mea katoa i raveia e au ra: oti ra ua taku i rauka ko te reira i taua au angaanga katoa naku ra.

11 Kia maara ra au i taua au angaanga i raveia e taku rima ra, e te au angaanga katoa i raveia e au ra, i na, e mea puapinga kore anake, e te kai i te matangi, kare rava oki e puapinga i raro ake i te rā nei.

12 Kua ariu akera au e akamaara i te pakari, e te neneva, e te auouo; e ariki tei na mua ra, eaa ta te tangata nei e rauka tei na muri, mari ra ko tei raveia e ia ra?

13 E kite akera au e te tu ke ra te pakari i te neneva, mei te mārama e tu ke i te poiri nei.

14 Ko te tangata pakari ra, tei te mimiti tona mata; te aaere ua ra te neneva na roto i te poiri: kua kite rai oki au e, okotai rai openga to te tangata katoa ra.

15 Kua na ko iora au i roto i toku ngakau: Okotai rai tu openga to te neneva e toku uaorai, eaa iora te puapinga o toku nei pakari? te karanga ra au i roto i taku ngakau, E puapinga kore katoa to te reira.

16 Kare oki e tamou tikaia te manako anga, to te tangata pakari e to te neneva; e ope rava oki te au mea e vai nei i te akangaropoinaia i te au rā a muri nei; e peea to te tangata pakari nei matenga? mei to te neneva katoa ra.

17 Mainaina atura au i teianei ora anga; no te mea te kinokino nei au i te angaanga i raveia e au i raro ake i teianei rā; e mea puapinga kore anake rai e te kai i te matangi.

18 Mainaina roa akera au i taku ra au angaanga i angaangaia e au i raro ake i teianei rā; no te mea teia au ka vaio i taua au mea ra na te tangata e na muri mai iaku nei;

19 E koai oki tei kite iaia e e tangata pakari,

e e neneva? e riro ra aia ei pu i taku katoa nei angaanga i rave pakariia e au i raro ake i teianei rā. E mea puapinga kore katoa to te reira.

20 Kua maara iora au e akaruke i te manako i te au angaanga katoa i raveia ra, taku i rave i raro ake i te rā nei.

21 Te angaanga ra oki tetai ma te pakari, e te kite, e te karape; ko tetai ra ko tei kore i tauta i te rave, tana ïa i vaio ei tuanga nana. E mea puapinga kore katoa te reira, e te kino maata.

22 Eaa iora ta te tangata i tana katoa ra au angaanga, e te manamanata o tona ra ngakau, i rave uaʼi aia i te angaanga i raro ake i te rā nei?

23 E aue anake tei tona katoa ra au rā, e te mamae i tana ra au angaanga, e te po katoa ra kare tona ngakau e meitaki i te moe. E mea puapinga kore katoa tei te reira.

24 Kare ainei e meitaki no te tangata nei kia kaikai, e kia inu, e kia kite tona ngakau i te meitaki i tana ra angaanga? E te kite nei oki au e na te rima ïa o te Atua i oronga mai.

25 Koai oki te tangata e tikaʼi kia kai, e kia rave i tona inangaro, mari ra ko au nei?

26 Ko te tangata oki i meitaki ki mua i tona aroaro, te oronga ra te Atua i te pakari, e te kite, e te rekareka: i te rave ara ra, kua akono aia i te angaanga ra, i te akaputuputu, vaoo kia ututua ua, kia apai atu aia na taua tangata i meitaki ki mua i te Atua. E mea puapinga kore katoa te reira e te kai ua i te matangi.