2 Ariki

2 TE MANAKO rā Iehova e rave mai ia Elia na roto i tetai puaioio ki runga i te rangi, kua aere iorā Elia raua ko Elisaia mei Gilagala atu.

2 Kua karanga aturā Elia kia Elisaia, Ei ko nei koe, taku ïa tuatua kia koe; te tono nei a Iehova iaku ki Betela. Kua tuatua mairā Elisaia, Te ora rā Iehova, e te ora katoa ra koe uaorai, kare au e akaruke ia koe. Aere atura raua ki Betela.

3 Kua aere maira te au tamariki peroveta i Betela kia Elisaia, e kua tuatua maira kiaia, Te au tamariki peroveta i Betela kia Elisaia, e kua tuatua maira kiaia, Te kite ra aina koe ka raveia mai to pu e Iehova akonei i runga i to upoko na? Kua karanga atura aia, A, kua kite au; e muteki ua ana kotou.

4 Kua karanga aturā Elia kiaia, E Elisaia, ei ko nei koe, taku ïa tuatua kia koe; te tono nei oki a Iehova iaku ki Ieriko. Kua tuatua maira aia, Te ora rā Iehova, e te ora katoa ra koe uaorai, kare au e akaruke ia koe. Kua tae atura raua ki Ieriko.

5 Kua aere maira te au tamariki peroveta i Ieriko kia Elisaia, e kua tuatua maira kiaia, Te kite ra aina koe ka raveia mai to pu e Iehova i teianei rā i runga i to upoko na? Kua karanga atura aia, A, kua kite au; e muteki ua ana kotou.

6 Kua karanga atu rai a Elia kiaia, Ei ko nei koe, taku ïa tuatua kia koe; te tono nei a Iehova iaku ki Ioridana. Kua tuatua maira aia, Te ora rā Iehova, e te ora katoa ra koe uaorai, kare au e akaruke ia koe. Kua aere kapipiti iora raua.

7 Kua aere iora oki te au tangata e rima ngauru no te au tamariki peroveta, e kua tu ua i te atea ke ra: te tu ua raua i te pae Ioridana.

8 Kua rave iorā Elia i tona kakau, kua pokaikai iora, e kua ta iora i taua vai ra, mavete atura, e kua aere ua iora raua ki tetai pae na runga i te one marō.

9 E tae atura raua ki tetai pae, kua tuatua akerā Elia kia Elisaia, E pati mai e akapeea atu au ia koe, ka rave keia atu ei au ra. Kua tuatua mairā Elisaia, Teia taku tuatua kia koe, Kia rua mairai taku i tenana vaerua i roto ia koe na.

10 Kua karanga atura aia, E mea rauka ngata taau i pati mai na: kia kite mai koe iaku, kia raveia mai au ra, ka akaperaia mai koe, kia kore ra, kare e akaperaia.

11 Te aere ua ra raua, karangaranga uaʼi, e i na, e kariota ai, e te au oroenua ai, taka ke akera raua; riro aturā Elia na roto i te puaioio ki runga i te rangi.

12 Te kite aturā Elisaia, e kua kapiki atura, E taku metua e! e taku metua! te kariota o Iseraela e te au akaoro oroenua ra! Kare akera aia i kite akaou atu iaia; kua rave iora aia i tona uaorai kakau, kua aae rua iora aia.

13 Kua rave iora aia i te kakau o Elia i topa maira mei runga mai iaia ra, e kua oki maira, tu ua iora i te pae Ioridana;

14 Kua rave iora aia i taua kakau o Elia i topa maira mei runga mai iaia ra, kua ta iora i taua vai ra, kua tuatua akera aia, Teiea te Atua o Elia ra ko Iehova? kia ta iora aia i taua vai ra, mavete atura: kua aere ua iorā Elisaia ki tetai pae.

15 Kia kite ra te au tamariki peroveta iaia, i te akara anga i Ieriko ra, kua tuatua akera ratou, Te vai ra te vaerua o Elia i runga ia Elisaia. Kua aere maira ratou e aravei iaia, e kua tupou akera ratou uaorai ki mua iaia ki raro i te one.

16 Kua tuatua maira ratou kiaia, I na, e rima ngauru teia aronga tangata maroiroi i o matou i to au tavini nei; e tuku ana koe ia ratou, ko ta matou ïa tuatua kia koe, kia aere ua ana e kimi i to pu; peneiake kua apai keia aia e te Vaerua o Iehova, e kua tuku uaia ki runga i tetai maunga, e kare ra, ki roto i tetai o. Kua karanga atura aia, Auraka e tonokia.

17 E kia tuatua raurau maira iaia, e kua akama ua iora, kua karanga atura aia, Ka tono. Kua tono atura ratou i taua aronga tangata e rima ngauru ra; e kua kimi iora ratou e po toru akera, kare ra i kitea.

18 E kia oki akaou maira ratou kiaia ra, (tei Ieriko rai aia i te noo anga,) kua karanga atura aia kia ratou, Kare au i karanga atu kia kotou, Auraka e aere?

19 Kua tuatua maira te au tangata o te oire kia Elisaia, I na oki, teia ta matou tuatua kia koe, teianei oire, e mea turanga meitaki, kua kite oki koe, e taku pu: ko te vai ra tei kino, e te maemo ua nei te au mea o teianei enua.

20 Kua karanga atura aia, E apai mai i tetai kumete ou, ka tuku ei i te tai ki roto. Kua apai maira ratou kiaia.

21 Kua aere iora aia ki taua punavai ra, e kua titiri atura i te tai ki roto, e kua tuatua akera, Te na ko mairā Iehova. Kua akaoraia e au teianei vai; kare atura e mate e te maemo oki.

22 Kua ora akera taua vai ra e tae rava akenei ki teianei rā, i te tuatua oki i tuatuaia e Elisaia ra.

23 E mei reira oki riro atura ki Betela; e te aere ua ra aia ki runga na te arataa ra, kua aere maira te tamariki mei roto mai i te oire, e kua amuamu maira kiaia, kua tuatua maira kiaia, E aere ki runga, e tenana upoko pakiko; e aere ki runga, e tenana upoko pakiko e.

24 Kua ariu akera aia ki muri, kua akara atura ia ratou, e kua taumaa atura i te ingoa o Iehova. Kua aere maira nga daba e rua mei roto mai i te ngai vaorakau, etieti uaia iora taua aronga tamariki e a ngauru ma rua ra.

25 Mei reira oki aere atura aia ki te maunga ra ki Karamela, e mei reira oki kua oki maira ki Samaria.