Nehemia

6 KITE akerā Sanabalata, e ko Tobia, e te Arabia ra ko Gesema, e tetai pae enemi katoa ra e, kua tukiia e au te patu ra, e kare e ngai ngaangaa i toe; (kare ra i akatuia e au te au pa i te tomoanga i reira;)

2 Kua tono mairā Sanabalata raua ko Gesema i te karere kiaku, na ko maira, E aere mai ki tetai o te au vila i te ngai mataataa i Ono ra, ei reira tatou aravei ei. Te manako takinga-kino ra raua iaku.

3 Kua tono atura au i nga karere kia raua, karanga atura, E angaanga maata taku e rave nei, kare e tika iaku kia aere ki raro na: eaa e tikaʼi iaku kia akaruke i te angaanga kia mutu, ka aere atu ei ki ko na kia kotou na?

4 E ka akera karere anga mai kiaku nei mei te reira rai te tu, e kua pera rai oki taku tuatua anga atu kia raua ra.

5 Kua tono mairā Sanabalata i tona tavini kiaku i reira, okotai rai ïa tu, ko te tu rima ïa, ma te leta i tatararaia i te rima.

6 Teia tei tataia i roto i taua leta ra: Kua tuatua aereia i te pa enua nei, e ko Gasemu tei tuatua mai, e kaitamaki toou manako e to te au ngati Iuda; i tuki ei koe i tenana patu, kia riro koe ei ariki no ratou, i tei tau i taua au tuatua nei.

7 E kua akatakaia e koe te au peroveta kia tuatua aereia koe i Ierusalema, e kia tuatua ra e, E ariki tei Iuda nei: e teianei, ka riro taua rongo nei i te tuatuaia ki o te ariki ra. E tenana e aere mai, e akaaiteite ana tatou i te tuatua.

8 Kua tono atura au i te karere kiaia, na ko atura, Kare rava ïa au mea i raveia i taau i tuatua maira, na toou uaorai ngakau tena i kimi.

9 E tuatua akamataku oki ta ratou katoa ia matou, na ko akera, E akaparuparuia to ratou rima kia kore e oti ta ratou angaanga. E teianei, e akaketaketa mai, e te Atua, i oku nei rima.

10 Kua aere iora au i reira ki te are o Semaia te tamaiti a Delaia, te tamaiti a Mehetabeela, ko tei popaniia i roto ra; e kua tuatua maira aia, Taki aere taua i roto i te are o te Atua i roto i te nao ra, ka topiri ei taua i te au pa o te nao: ka aere mai oki ratou e ta ia koe; ei te po ratou e aere mai ei e ta ia koe.

11 Kua karanga atura au, E tika aina ïa tangata mei iaku nei kia oro? koai ïa tangata mei iaku nei e oro ki roto i te nao kia ora? kare au e tomo ki roto.

12 E i na, kite atura au e, kare aia tei tonokia mai e te Atua; kua ouia ra aia e Tobia raua ko Sanabalata, i totou mai ei aia i taua tuatua iaku ra.

13 I ouia ra aia kia mataku au, e kia pera au, e kia araia, kia rauka ta ratou tapepe anga mai iaku, e kia akakinoia au e ratou.

14 E akamaara mai koe, e taku Atua, ia Tobia raua ko Sanabalata, i ta raua nei au angaanga, e te peroveta vaine katoa ia Noadia, e tetai aronga peroveta i anoano i te akamataku mai iaku.

15 E tae akera ki te tai takau ma rima o te rā i te marama ra ia Elula, oti rava akera taua patu ra, e rima ngauru e rua ara i te rā i oti ei.

16 E kite akera to matou au enemi katoa, e kia akara mai oki te au etene e pini ua ake ia matou, kua taitaia rava iora ratou i to ratou uaorai mata: te kite ra oki ratou e, e mea raveia mai taua angaanga nei e to matou Atua.

17 E manganui oki ta te aronga mamaata i Iuda leta i akau kia Tobia i taua au rā ra, e ta Tobia oki i tae mai kia ratou.

18 E manganui oki to Iuda i taputou atu kiaia, no te mea e unonga aia no Sekania te tamaiti a Ara; e tana ra tamaiti ko Iohanana, kua rave aia i te tamaine a Mesulama te tamaiti a Berekia ra ei vaine nana.

19 Kua akakite mai oki ratou ki mua iaku i tana au tuatua meitaki, e taku ra au tuatua kua apaiia e ratou kiaia. E kua akau mai a Tobia i te au leta ei akamataku mai iaku.