Mika

1 TE tuatua a Iehova i tae mai kia Mika te Morasi, i te au rā o Iotama, e ia Ahaza, e ia Hezekia, e puke ariki no Iuda, ko tana ïa i kite ia Samaria, e Ierusalema.

2 E akarongo mai, e te au tangata katoa e; e akono mai, e te enua e, ma tona ki katoa ra: ei kite oki te Atu ra ko Iehova ia kotou, te Atua nei i roto i tona ra nao tapu.

3 I na oki, te aere mai nei a Iehova mei roto i tona ra ngai; e eke mai oki aia ki raro, e takatakai i te au ngai teitei o te enua nei.

4 E e taʼe te au maunga i raro ake iaia, e ngaangaa oki te au o e taka ke atura, mei te tapou ki te pae ai, mei te vai i riringiia mai i runga i te ngai teitei.

5 No te tatipake a Iakoba taua au mea katoa nei, e no te ara a te ngutuare o Iseraela. Eaa taua tatipake a Iakoba ra? kare ainei Samaria? eaa oki te au ngai teitei o Iuda? kare ainei Ierusalema?

6 Ka akariro ei au ia Samaria ei ututua i roto i te kainga, ei au tanumanga kainga vine ra; e uri oki au i tana au toka ki raro i te tairua, e kia kitea uaia tona au tango.

7 E pāpāia tona au tiki kotikoti ravarai e ungaungātiti rava; e tona au apinga akaturi, e taʼu na anakeia ïa ki te ai, e pou rava iaku tona katoa ra au idolo: no te mea, no te oko a te akaturi tana apinga i te akaputuputu anga, e akaokiia oki te reira ei oko na te akaturi.

8 E teianei, e aue au, e e kakaoa; ka aere taaka ua au e ma te kakau kore; e aue au mei te au taae ra, e e mii au mei te au ione ra.

9 E puta ora kore oki tona; kua tae tika mai ïa ki Iuda; e kua tae ki te ngutupa o toku ra au tangata, ki Ierusalema rava.

10 Auraka e akakiteia i Gata, auraka rava e aue: ei Beteaphara ka takaviri ei ia koe uaorai i raro i te one-pueu.

11 Aere ra koe, e tei noo i Saphira, ma te kakau kore e te akama; kare tei noo i Zaanana e aere atu; na te aue o Bete-ezela e ngere ei kotou i te tauturu nona.

12 Kua taitaia ua tei noo i Marota i te apinga, kua tae mai oki te kino ki raro ki te ngutupa i Ierusalema, mei ko mai ia Iehova ra.

13 Ka akamou ana i te kariota ki te puaka oro viviki ra, e tei noo i Lakisa e: nana i akamata i te ara i te tamaine a Ziona, i roto oki ia koe na te au ara i Iseraela i te kitea anga.

14 E teianei, ei apinga kopae taau e oronga atu kia Moresegata; e riro te au ngutuare o Akaziba ei pikikaa i te au ariki o Iseraela.

15 E arataki atura au i te tangata kainga kia koe, e tei noo i Maresa: e tae mai aia ki Adulama, te kakā o Iseraela.

16 Ka akapakiko ana, e ka varu i to mimiti, i to au tamariki akaperepere; e akamaata i to pakiko mei to te aeto ra; kua riro tuikaa oki ratou mei mua ia koe.