2 Korinetia

11 NARINGA kotou e akakoromaki iti ua mai na iaku nei i taku nei akatietie neneva nei; koia tikai e akakoromaki mairai kotou iaku.

2 Te mataku nei au ia kotou i te mataku Atua: kua momokoia kotou e au i te tane okotai, kia tuku atu au ia kotou ei paretenia viivii kore i te Mesia ra.

3 Te mataku nei ra au, ko te akakinoia aea to kotou ngakau kia kore atu te tavaitai ua e tau i te Mesia nei, mei ta te ovi i pikikaa atu ia Eva i tona pakari.

4 Te tuatua ra taua tangata i aere maira i tetai Iesu ke, ko tei kore i tuatuaia e matou ra, e te āriki na kotou i tetai vaerua ke, ko tei kore i ārikiia e kotou ra, e tetai evangelia ke kare i mouria e kotou, akakoromaki tika kotou iaia.

5 Te manako nei oki au e kare rava au i iti i te au aposetolo mamaata katoa ra.

6 Te kamakura ra au i te tuatua, kare ra au e kamakura i te kite; kua kitea puia ra matou i rotopu ia kotou i taua au mea katoa nei.

7 Kua apa aina au i te taakaaka anga iaku uaorai, kia teitei kotou; ko au i tuatua ua atu i te evangelia o te Atua ia kotou na?

8 Kua pou oki etai au ekalesia iaku i te rave anga i te tutaki, kia tika iaku kia rave i ta kotou angaanga.

9 Iaku oki i noo ki o kotou na ka ngere ei au ra, kare rava tetai tangata i teiaa iaku: na te au taeake ra no Makedonia mai i turu mai iaku i taua ngere noku ra: kua matakite marie ei au iaku uaorai kare i tivata, kia kore kotou e teiaa iaku, e ka matakite rai au iaku uaorai.

10 Tei roto iaku nei te tuatua-mou a te Mesia ra, kare rava e kore teianei akatietie iaku nei, i te pa enua i Akaia nei.

11 No te aa ra? no te mea kare au i aroa ia kotou? kare, kua kite oki te Atua.

12 Ko taku ra e rave nei, e rave rai au, ei akakore atu i te ravenga a te aronga i kimi i te ravenga, kia riro ratou mei ia matou katoa nei i taua mea ta ratou e akatietie ra.

13 E aposetolo pikikaa oki te reira, e rave angaanga pikikaa ïa, i te akatutu aposetolo anga na te Mesia ia ratou uaorai.

14 Kare oki e vavaria; ko Satani oki tei akatutu angela katoa iaia uaorai no te mārama.

15 Kare oki te mea va maata, kia akatutu tavini tona au tavini no te tuatua-tika; e akatauia to ratou openga i ta ratou angaanga.

16 Teia rai taku tuatua, auraka rava tetai tangata e manako iaku e e neneva; te manako ra e e neneva, e akakoromaki mai iaku i te neneva nei, kia akatietie iti ua na au.

17 Taku oki e tuatua nei, kare oki au e tuatua mei te mea e tau i te Atu ra, mei te mea ra e tuatua neneva ua, i te tuatua akatietie nei.

18 E e manganui tei paapaa i te kopapa nei, e paapaa katoa oki au.

19 I akakoromaki tika kotou i te neneva, te pakari oki kotou uaorai.

20 Te akakoromaki ra oki kotou kia taao mai tetai ia kotou, kia pou kotou i tetai, kia āru mai oki tetai, kia akateitei tetai iaia uaorai, kia moto mai oki tetai i to kotou mata.

21 No taua akakino ra, e te apikepike nei matou, taku ïa e tuatua nei. Te mea ra i maroiroi ei tetai tangata atu, (te tuatua neneva ua nei au,) e maroiroi katoa au.

22 E Ebera aina ratou? koia katoa au. E ngati Iseraela aina ratou? koia katoa au. E uanga aina ratou no Aberahama? koia katoa au.

23 E rave angaanga aina ratou na te Mesia? (te tuatua neneva ua nei au) e maata atu au; e rai taku angaanga i rave, e rai oki te pāpā angaia, e rai oki te tae i roto i te are tapekaanga, e manganui oki te mate.

24 Ka rima akenei oku pāpā angaia e te ngati Iuda, taki toru ngauru taki iva ara i te pāpāanga okotai.

25 Ka toru oki pāpā angaia i te rakau, okotai peî angaia i te toka, e toru oku pou anga i te pai ngaa, okotai oku po, okotai oki ao, i raro i te moana:

26 E manganui te aerenga, te mate i te vai, e te mate i te anana keia, te mate i te tangata i toku uaorai enua, te mate i te etene, te mate i roto i te oire, te mate i te medebara, te mate i te tai, te mate i rotopu i te au taeake pikikaa ra;

27 Te roiroi e te mamae, te tapapa anga e manganui, te pongi e te kaki vai, te akakore anga kai e manganui, te anu e te putaua:

28 Kare oki ko te au mea anake i vao ra, ko te pekapeka ra i rokoia ua mai ei au i te au rā katoa nei, i te akono anga i te au ekalesia katoa ra.

29 Koai tei paruparu e kare au i paruparu? koai tei turori e kare au i ka?

30 E akatietie rai au e tikaʼi, e akatietie ïa au i toku nei au paruparu.

31 Ko te Atua te Metua o to tatou Atu ra o Iesu Mesia, tei iaia te meitaki mutu kore ra, ko tei kite ïa e kare au i pikikaa.

32 Na te tutara a Areta ariki ra i tuku i Damaseko i te tiaki i te oire a to Damaseko ra, inangaro i te opu iaku:

33 E i tukuia au ki raro na roto i te māramārama na te pae koro i roto i te tapora, ora atura au i tona rima.