Angaanga

20 E PAPA akera taua keu maata ra, kua akaputuputu mairā Paulo i te au pipi kiaia, aroa atura, e riro atura, aere atura ki Makedonia.

2 E oti akera taua pa enua ra i te aereia e ia ra, e manganui akera te ako anga atu ia ratou, tae atura aia ki Eleni.

3 Noo iora aia i reira, e toru akera marama, e kia vaitata akera aia i te ano ki Suria, kua moetapapa iora te ngati Iuda iaia, kua manako akera aia e, e na Makedonia te oki.

4 Kua kapiti mairā Sopatero i Berea i tona tere ki Asia; to Tesalonia ra, ko Arisetareko ïa ma Sekuno; to Derebe ra, ko Gaio ïa ma Timoteo oki; to Asia ra, ko Tukiko ïa e ko Terophimo;

5 Na mua atura ratou e Teroa, tapapa maira ia matou.

6 E ope akera te au rā manga akaopue koreia ra, ano atura matou mei Philipi atu, e po rima akera, tae atura matou ki Teroa kia ratou; noo atura matou i reira e po itu.

7 E tae akera ki te rā muatangana o te ebedoma ra, kia akaputuputu mai te au pipi e vavaʼi i te manga ra, kua ako aturā Paulo ia ratou, kia popongi ake aia e riro ei; tamou marie atura tana ako anga atu e turuaipo akera.

8 E manganui te lamepa i roto i taua pia i runga ra ka putuputu ei ratou.

9 Te noo ua ra tetai tangata ou ko Eutiko te ingoa i te ngutupa māramārama, varea iora aia e te moe maata: no te mea kua roa ta Paulo tuatua anga, tinainai rava maira tana moe, topa iora aia ki raro i te toru o te tupati pia te topa anga, e tei te rave angaia atu aia ra kua mate takiri rava;

10 Kua eke aturā Paulo ki raro, tipapa iora ki rungao iaia, takave atura, na ko akera, Auraka ana kotou e aue; te vai nei te aʼo i roto iaia.

11 E tae akaou maira aia ki runga, vavaʼi iora i te manga, e kai iora, e oti akera, tuatua iora oki e tuatua anga roa, e tataiata iora, riro atura aia.

12 Kua apai maira ratou i taua tangata ou ra, kua ora rava, mareka rava akera ratou.

13 Aere atura matou na mua ki runga i te pai, ano atura ki Aso, ei reira akauta mai ei ia Paulo: nana uaorai oki i akatau, i maara oki aia e, na uta te aere ki reira.

14 E aravei akera aia ia matou i Aso, akauta akera matou iaia, e tae atura matou ki Mitulene.

15 Mei reira oki ano atura matou e ao akera e tutaki iora matou ki Kio; e ao akera oki tae atura matou ki Samo, noo iora i Terogulio; e ao akera oki tae atura matou ki Mileto.

16 Kua akakoro ana oki a Paulo eiaa e na Ephesia kia ano, kia kore aia e tavare i Asia; te rapurapu ra oki aia kia rokoia atu e ia te rā Penetekose i Ierusalema ra.

17 Kua unga atura aia i te karere ki Ephesia mei Mileto atu, e tiki i te aronga orometua i te ekalesia ra.

18 E tae maira ratou kiaia ra, kua karanga atura aia kia ratou, Kua kite kotou i te tu o toku noo anga i o kotou nei, i te au tuatau katoa, mei te rā muatangana mai ka tae mai ei au ki Asia nei,

19 I te akamori anga i te Atu ma te ngakau akaaka roa, e ma te roi-mata maata, e te timataanga ka rokoia mai ei au i te moetapapa angaia e te ngati Iuda:

20 E kare rava akenei e mea e meitaki ei kotou na i vaioia e au, kare akenei au i tivata i te ako atu ia kotou e te apii ia kotou i te ngai tangata, e i tera are i tera are,

21 I te tuatua marie anga atu ki te ngati Iuda ma te Eleni i te tataraara i te Atua, e te akarongo i to tatou Atu ia Iesu Mesia.

22 E teianei te aere nei au ma te aratakiia e te Vaerua ki Ierusalema, kare oki i kitea te mea e rokoia mai ei au i reira:

23 Mari ra ko ta te Vaerua Tapu i akakite mai kiaku i te au oire katoa nei, i te tuatua anga mai e, te vai ra te tapeka noku e te mate.

24 Kare ra au e akono ua atu i taua au mea katoa ra, kare oki au i anoano ua i taku ora, mei te mea e, e mea apinga naku uaorai, kia akaoti ra au i toku oro anga ma te rekareka, e te taoonga i rauka iaku i te Atu ra ia Iesu, kia akakite ua atu au i te evangelia o te aroa ua o te Atua.

25 E teianei, i na, kare rava kotou katoa nei, ko taku i tuatua aere i te basileia o te Atua i roto ia kotou na, e kite akaou mai i toku mata, kua kite au.

26 E teianei e akakite ua atu na au kia kotou i teianei rā, kare rava oku viivii i te toto o te tangata katoa nei.

27 Kare rava akenei au i uuna, kua akakite ua atu oki au kia kotou i te anoano katoa o te Atua.

28 E teianei, e matakite ia kotou uaorai, e te anana katoa i akariroiaʼi kotou e te Vaerua Tapu ei tiaki i rungao ra, kia akaangai oki kotou i te ekalesia a te Atua, ko tana i oko i tona uaorai toto.

29 Kua kite oki au kia riro ke atu au, ka o mai ei te luko taae ki roto ia kotou na, kare e akaperepere i te anana.

30 E ka tu mai oki te tangata mei roto ia kotou uaorai, e tuatua mai i te tuatua mingi, kia aruia ratou e te pipi.

31 E matakite oki, e akamaara, ka toru akenei oku mataiti, kare au i tivata i te ako atu i te tangata ravarai e pini ua ake, ma te roimata, i te po e te ao.

32 E teianei, e te au taeake, teia taku tuatua, ei te Atua rai kotou, e te tuatua no tona aroa ua, ko tei tika iaia kia patu ia kotou, e kia oronga mai i te tuanga na kotou e te aronga katoa i akatapuia ra.

33 Kare rava akenei au i noinoi i te ario a te tangata katoa nei, e te auro, e te kakau.

34 Kua kite oki kotou e na teianei rima i rave i te angaanga i raukaʼi taku, e ta te aronga katoa i kapiti mai kiaku nei.

35 Kare e mea toe iaku i te akakite atu kia kotou na, kia pera katoa kotou i te rave i te angaanga, e e turu atu oki kotou i te aronga apikepike, e tikaʼi, e kia maara oki i te tuatua a te Atua ra a Iesu, ko tana oki i tuatua maira e, “E mea meitaki i te oronga atu i te rave mai.”

36 E oti akera teianei tuatua i te karangaia atu, kua tuturi iora aia ki raro, kua pure iora e ratou katoa.

37 Aue anake iora ratou ravarai, takave maira ki runga i te kaki o Paulo, kua ongi maira iaia: no te tuatua tana i tuatua ra e, kare rava ratou e kite akaou mai i tona mata, i maata ravaʼi to ratou aue. Kua kave atura ratou iaia ki te pai.

38 See verse 37