2 Tesalonia

3 E TEIANEI, e te au taeake, e pure ia matou, kia oro ua te tuatua a te Atu e kia akakakāia, mei tei i o kotou na;

2 E kia akaoraia matou i te tangata kikino e te akono kore; kare oki i ope katoatoa te tangata i te akarongo.

3 E tuatua-mou ra ta te Atu, nana kotou e akatinamou, e e akaora oki ia kotou i te kino.

4 E te irinaki nei matou i te Atu ia kotou, e te rave na kotou e ka rave rai kotou, i ta matou e akaue atu ia kotou na.

5 E kia akatae oki te Atu i to kotou ngakau i te aroa o te Atua, e i te akakoromaki o te Mesia ra.

6 Te ako atu nei matou ia kotou, e te au taeake, i te ingoa o to tatou Atu o Iesu Mesia, e akataka ke mai kotou i te taeake aerenga tika kore ra, kare i tau i te tuatua tana i kite ia matou nei.

7 Kua kite oki kotou uaorai e, kia aru mai kotou ia matou e tikaʼi: kare to matou i te aerenga tika kore i roto ia kotou na:

8 Kare matou i kai ua i ta etai ke ra kai; kua rave ra matou i te angaanga ma te roiroi i te po e te ao, kia kore rava tetai o kotou e teiaa ia matou nei:

9 Kare ra mei te mea e, kare e tau ia matou; kia riro ra matou ei akaraanga na kotou, kia aru mai kotou ia matou nei.

10 E kua akaue atu oki matou ia kotou ia matou rai i ko na ia kotou na e, ko te tangata kare e rave i te angaanga, auraka katoa aia e kaikai.

11 Te akarongo nei oki matou e, e aerenga tika kore to tetai papaki o kotou na, kare e rave i te angaanga, e koka aere ua ra.

12 Ko te aronga ra e pera ra, te akaue atu nei matou, e te ako atu nei i te ingoa o to tatou Atu o Iesu Mesia e, e rave marie ratou i ta ratou angaanga, ka kai ei i ta ratou uaorai kai.

13 Kareka kotou, e te au taeake, auraka e akaroiroi i te rave anga i te meitaki.

14 E te tangata kare i akarongo i ta matou tuatua i teianei leta, akairo atu i te reira tangata, e eiaa e kapiti atu iaia, kia akama aia.

15 Auraka ra e tuatua e enemi, e ako atura ei taeake.

16 E teianei, kia oronga mai te Atu, nona uaorai te au, i te au no kotou i te au mea katoa nei auraka kia mutu. Ei vaitata uaorai te Atu ia kotou katoa na.

17 Ko toku teia aroa anga atu ia kotou, to Paulo, na toku uaorai rima i tata, ko te akairo ïa i te au leta katoa; e na reira au kia tata:

18 Ei ia kotou katoa te aroa ua o to tatou Atu o Iesu Mesia. Amene.