2 Paraleipomeno

7 E KIA akaoti akerā Solomona i tana pure, kua topa maira te ai no te rangi mai, pou rava akera te atinga karakaratio, e te au atinga; ki rava akera te are i te kakā o Iehova.

2 Kare akera te kau taunga i o ki roto i te are o Iehova, no te mea kua ki te are o Iehova i te kakā o Iehova.

3 E kite akera te au tamariki katoa a Iseraela i te ai i te topa anga mai, e te kakā o Iehova ki runga i taua are ra, kua tupou iora to ratou mata ki raro i te one ki runga i te paepae ra, e kua akamori, e kua akameitaki ia Iehova, no te mea, e meitaki tona, e tona aroa ka tu ïa e rimua.

4 Kua apai atura te ariki e te au tangata katoa i te au atinga kia Iehova.

5 Kua apai atura te ariki ra ko Solomona i te atinga e tai takau ma rua i te tausani i te puakatoro, okotai anere e rua ngauru i te tausani i te mamoe: i akapera te ariki e te tangata ravarai i te akatapu i te are o te Atua.

6 Te akono ra te kau taunga i ta ratou taoonga: e te au ngati Levi ma te au mea tangi na Iehova ra, i angaia e te ariki ra e Davida, ka imene ei a Davida ia ratou ei akameitaki ia Iehova, no te mea ko tona aroa ka tu ïa e rimua: e i mua mai ia ratou ra, ko te kau taunga ïa i te akatangi anga i te pu e ko Iseraela katoa kua tu ua iora.

7 Kua akatapuia oki e Solomona te ngai i rotopu i te paepae i mua i te are o Iehova: i reira oki aia i te apai anga i te au atinga karakaratio, e te tongaua o te au atinga au ra, no te mea kare akera e o te au atinga karakaratio e te au atinga kai, e te tongaua, i te atarau veo i angaia e Solomona ra.

8 I reira oki a Solomona e ko Iseraela ravarai, e uipaanga maata ua atu, mei te tomoanga ki roto ia Hamata e tae ua atura ki te kauvai ra i Aiphiti, i te akono anga i te oroa e rā itu akera.

9 Kia tae oki ki te rā varu ra, e uruoaanga tapu ïa ta ratou; e rā itu atura te akatapu anga i te atarau ra, e rā itu oki to te oroa.

10 E tae akera ki te tai takau ma toru o te rā i te marama itu ra, kua tuku ua atura aia i te au tangata kia aere ua ana ki to ratou au puakapa, ma te pereperekavana e te rekareka o te ngakau, i te au meitaki ta Iehova i rave ia Davida, e ia Solomona, e ia Iseraela i tona au tangata.

11 E oti akera te are o Iehova ia Solomona, e te are o te ariki; e kua oti meitaki rava akera iaia te au mea katoa tei tupu i roto i te ngakau o Solomona e rave i te are o Iehova, e tona katoa ra are.

12 Kua mama mairā Iehova kia Solomona i te po, e kua tuatua maira kiaia, Kua akarongo au i taau pure, e kua ikiia e au teianei ngai noku uaorai ei are atinga.

13 Kia momaniia e au te rangi e kare atura e ua, e kia akaue au i te tāpakai e kai i te enua, e kia tuku atu au i te maki i toku ra au tangata;

14 Kia taakaaka mai toku ra iti-tangata, tei tapaia i toku ra ingoa, ia ratou uaorai, e kia pure, e kia kimi mai i toku nei mata, e kua ariu mai i to ratou au aerenga kino ra; ei reira au e akarongo ei i runga i te rangi, e ka akakore au i ta ratou ara, e ka akaora au i to ratou enua.

15 E teianei ka akapueraia oku mata, e ka akarongo mai oku taringa i te pure i pureia i teianei ngai.

16 I teianei, kua ikiia e au e kua akatapuia oki teianei are, kia vai rai toku ingoa i reira e tuatau ua atu; ei reira oki oku mata e toku ngakau ka vaoo atu ei i te au rā katoa.

17 Kareka ko koe ra, kia na mua tikai koe iaku i te aere, mei to to metua ra mei to Davida i aere ra, e kia rave koe i te au mea katoa taku i akaue atu ia koe ra, e kia akono i taku au akonoanga e taku ra au tuatua-tau:

18 Ei reira au ka akamou ei i te terono i toou ra basileia, mei iaku ra oki i koreromotu ki to metua kia Davida, ka na ko ei au ra e, Kare koe e ngere i te tangata ei tutara ki runga ia Iseraela.

19 Kia anga ke ra kotou, e kia akaruke mai i taku nei au akonoanga e taku nei au akauenga i tukuia atu e au ki mua ia kotou, e kia aere rai kotou e kia akarongo i te au atua ke, e kia akamori ia ratou:

20 Ka kiriti tumuiaʼi ratou e au i reira i toku enua i orongaia e au no ratou; e teianei are, i akatapuia e au i toku nei ingoa, ka akaruke keia e au e kia ngaro atu; e ka akariroia e au ei amuamuanga e ei tuatuaanga i te au tangata ravarai.

21 E teianei are e teitei nei, ka riro ei vavaranga na te tangata ravarai e na reira te aere; ka riro i te tuatua mai e, Eaa rā Iehova i akapera mai ei ki teianei enua, e teianei are?

22 Ei reira e karangaia atu ei e, No te mea kua akaruke ratou i te Atua o to ratou ai metua ia Iehova, tei arataki mai ia ratou mei te enua maira mei Aiphiti, e kua opu atu ratou i te au atua ke, e kua akamori ia ratou, e kua akarongo ia ratou ra; i apai mai ei aia i teia katoa nei au kino ki runga ia ratou.