Exodo

11 I TUATUA anā Iehova kia Mose e, Okotai aku mate toe, kia apai ki rungao ia Pharao, e ki runga katoa ia Aiphiti: e i muri ake ka tuku mai ïa aia ia kotou: kia tuku aia ia kotou, e riro aia i te tuaru ia kotou ki vao.

2 E tenana, e karanga atu koe ki nga taringa o te au tangata nei, kia pati te au tane katoa i to vaitata ia ratou, e te au vaine katoa i to vaitata ia ratou, i te apinga ario, e te apinga auro.

3 E i kite aroaia mai teianei aronga e to Aiphiti nei ia Iehova. Ngateitei rava atura taua tangata ra ko Mose i taua enua ra i Aiphiti, ki mua i te aroaro o te au tavini o Pharao ra, e ki mua i te aroaro o te au tangata.

4 Kua karanga aturā Mose, Te na ko mairā Iehova, Kia turuaipo ra ka aere ei au na rotopu i Aiphiti nei:

5 E ka ope te au tama mua i te enua i Aiphiti nei i te mate, mei te tama mua o Pharao e noo ki runga i tona terono, e tae ua atu ki te tama mua o te vaine tavini e noo ki muri i te tavirianga ra; e te anaunga mua o te au puaka katoa ra.

6 E ka aue maata to te enua nei to Aiphiti e pini ua ake, kare ïa aue i kitea ana, e kare oki e kitea akaou.

7 Kareka te tamariki a Iseraela e pini ua akera, kare rava tetai e aoaia mai e te puakaaoa, ko te tangata e te puakaaoa, ko te tangata e te puaka katoa: kia kite kotou i te tu o ta Iehova akataka ke anga i to Aiphiti, e to Iseraela nei.

8 Ei reira taua au tavini katoa noou nei, ka aere mai ei kiaku ra, ka tupou mai ei kiaku, ka tuatua mai ei e, E aere ke koe, e te au tangata katoa i raro ake ia koe na: ei reira ïa au ka aere ei. Riro maira aia mei mua mai i te aroaro o Pharao ma te riri maata.

9 Kua tuatua iorā Iehova kia Mose e, Kare rai a Pharao e akarongo mai ia korua: kia akamaataia taku nei au ravenga mana i taua enua nei i Aiphiti.

10 E kua rave oki a Mose raua ko Aarona i taua au ravenga mana katoa nei ki mua i te aroaro o Pharao; akaketaketa ua atura rā Iehova i te ngakau o Pharao, e kare akera aia i tuku i te tamariki a Iseraela kia akaruke i tona enua.