Exodo

38 ANGA iora oki aia i te atarau atinga karakaratio e sitima te rakau: e rima kubiti te roa e rima oki kubiti te pararauare, kua aiteite nga aro e a; e toru ra kubiti te teitei.

2 Tarai iora oki aia i nga tara i nga poo e a ra; okotai rai ïa rakau aua nga tara katoa ra; e vaî iora aia i te reira ki te veo.

3 Anga iora oki aia i te au mea ravarai o te atarau, i te au pani, e te au taipu, e te au kapu, e te au kokai, e te au āriki ai: e veo anake te au āriki ravarai tana i anga.

4 Anga iora oki aia i te paata veo kopekapeka no taua atarau ra, i raro ake i te nia i rotopu tikai i taua atarau ra.

5 Kua akato iora aia i nga tātai e a no nga poo e a i taua paata veo ra, ei momonoanga amo ra.

6 Kua tarai iora aia i nga amo sitima, vaî iora oki ki te veo.

7 Kua momono iora aia i nga amo na roto i nga tātai ra, i te tiroa o te atarau ra, ei apai anga i taua atarau ra: e tapaanga rakau taua atarau ra, e te puerakaua i roto i te anga angaia e ia ra.

8 Anga iora aia i te āriki-vai veo, e e veo oki te vaevae, i te au io veo o te au vaine i uipaia, tei uipa i te ngutupa o te Are uipaanga ra.

9 E nana oki i anga i te paepae: te au paruru orongā i taviriia no te paepae i te pae i apatonga, okotai anere kubiti te roa;

10 E to reira au pou okotai takau ïa, e to ratou au turanga veo okotai takau; kareka te au tapeka, e te au tatua no taua au pou ra, e ario ïa:

11 E to te pae apatokerau ra au paruru, okotai anere ïa kubiti te roa, to reira au pou okotai takau, e to ratou au turanga veo okotai takau; kareka te au tapeka e te au tatua no taua au pou ra, e ario ïa:

12 E to te pae i te opunga o te rā ra au paruru, e rima ngauru ïa kubiti te roa, to reira au pou okotai ngauru, e to ratou au turanga okotai ngauru; kareka te au tapeka, e te au tatua no taua au pou ra, e ario ïa.

13 E to te pae i te itinga o te rā au paruru e rima ngauru ïa kubiti te roa.

14 Te au paruru i tetai pae ngutupa ra, okotai ngauru ma rima ïa kubiti; to reira au pou e toru, e to ratou au turanga e toru:

15 E to tetai pae ngutupa paepae, tetai rima e tetai rima, e paruru katoa okotai ngauru ma rima kubiti; to reira nga pou e toru, e to ratou nga turanga e toru.

16 E orongā taviri anakeia te au paruru paepae e pini ua ake.

17 E te au turanga no te au pou ra, e veo ia; kareka te au tapeka e te au tatua i taua au pou ra, e ario ïa; e te vaî o te au mimiti ra, e ario ïa; i tatua katoaia te au pou paepae ravarai ki te ario.

18 E te paruru no te ngutupa o taua paepae ra, i akamaneaia i te mea kerekere, e te purapura, e te muramura, e te orongā i taviriia: okotai takau kubiti te roa, e rima kubiti te teitei, ko te pararauare rai ïa, i aite katoa ki te au paruru o te paepae ra.

19 E to reira oki nga pou e a, e to ratou nga turanga veo e a; kareka te au tapeka ra, e ario ïa; e te vaî o te au mimiti ra, e nga tatua, e ario ïa.

20 E te au titi ravarai no te puakapa, e to te paepae e pini ua ake, e veo anake ïa.

21 Ko te rainga anga teia o te puakapa, koia te puakapa kite ra, tei akaueia e Mose, e i tukuia ki te ngati Levi i raro ake ia Itamara te tamaiti a Aarona taunga ra.

22 Na Bezaleela oki, te tamaiti a Uri, te tamaiti a Hura, no te kopu o Iuda, i anga i te au mea ravarai ta Iehova i akaue mai kia Mose ra.

23 Koia e Aholiaba, te tamaiti a Ahisamaka, no te kopu o Dana, e tangata kokoti toka, e taunga karape, e te akamanea kakau, i te mea kerekere, e te purapura, e te muramura, e te orongā.

24 Te auro i pou i taua angaanga ra, te angaanga katoa no taua ngai-tapu ra, koia te auro atinga ra, okotai takau ma iva i te taleni, e itu anere e toru ngauru sekela, i te sekela o te ngai-tapu ra.

25 E te ario o te uipaanga tangata i tatauia ra, okotai ïa anere i te taleni, okotai tausani e itu oki anere e itu ngauru ma rima i te sekela, i te sekela o te ngai-tapu ra:

26 Okotai tangata, okotai beka, koia te afa sekela nei, i te sekela o te ngai-tapu ra, i taua aronga ravarai i aere kia tatauia ra, i tei tae ki te rua o te ngauru anga o tona mataiti e tei ara atu, e ono anere e toru ara i te tausani, e rima anere, e rima ngauru taua aronga ra.

27 E taua au taleni ario okotai anere ra i tei akatoia ïa ei turanga no te au tapaanga rakau o te ngai-tapu ra, e ei turanga no te au pou o te paruru ra; okotai anere turanga no taua au taleni okotai anere ra, okotai taleni okotai turanga.

28 E taua au sekela okotai tausani e itu anere e itu ngauru oki ma rima ra, tei te au tapeka pou ïa, e tei te vaî i te au mimiti pou ra, e tei te au tatua i taua au pou ra.

29 E te veo i taua atinga ra, e itu ngauru ïa taleni, e rua tausani e a anere sekela.

30 Tei te au turanga te reira no te au kopa no te Are uipaanga, e tei te atarau veo ra, e tona paata veo, e te au mea ravarai no taua atarau ra;

31 E tei te au turanga oki no te paepae e pini ua ake, e tei te au kopa no te paepae, e tei te au titi katoa o te puakapa, e tei te au titi ravarai o te paepae e pini rava ake.