Exodo

16 KUA aere maira taua uipaanga katoa o te tamariki a Iseraela ra mei Elima mai, ki te medebara ra ko Sini, i rotopu i Elima e Sinai, ko te ngauru ma rima ïa o te rā, i te rua o te marama o to ratou aere anga mai mei te enua maira mei Aiphiti.

2 Kua urutoe iora taua uipaanga katoa o te tamariki a Iseraela ra ia Mose raua ko Aarona, i taua medebara ra:

3 Kua tuatua maira te tamariki a Iseraela kia raua, Naringa matou i mate i te rima no Iehova i te enua ra i Aiphiti e, ka noo ei matou i vaitata i te au āriki puaka, e kua kai oki i te kai e kua merengo roa; i arataki mai nei oki korua ia matou ki teianei medebara, kia mate teianei uipaanga katoa i te pongi.

4 Kua tuatua maira oki a Iehova kia Mose, I na, e akatopa atu au i te kai no runga i te rangi nei na kotou; e na te tangata e aere ua ki vao i te au rā katoa ra, ka koi ei i te ka rava i taua rā ra, ei timata anga atu naku ia ratou, i to ratou aere anga i taku nei ture, e te kore anga. 5 Kareka kia tae ki te rā ono ra, e rave meitaki ratou i ta ratou e apai mai ki roto ra; kia rua mai ïa tuanga i ta ratou e koi no te au rā katoa ra.

6 Kua tuatua iorā Mose raua ko Aarona ki te au tamariki katoa a Iseraela, Kia aiai kotou e kite ei e, na Iehova kotou i arataki mai mei te enua maira mei Aiphiti:

7 Kia popongi oki kotou ka kite ei i te kakā o Iehova; kua akarongo oki aia i ta kotou urutoeanga ia Iehova: eaa oki ta maua kia urutoe mai kotou ia maua?

8 E kua tuatua akerā Mose, Ka kite pu kotou kia aiai, kia oronga mai a Iehova i te kinaki na kotou e kai, e te areto kia popongi e kia merengo roa; te akarongo ra oki a Iehova i ta kotou urutoeanga ta kotou i urutoe iaia: eaa oki ta maua nei? kare ta kotou au urutoeanga ia maua nei, ia Iehova ra.

9 Kua tuatua akerā Mose kia Aarona, Ka tuatua ana koe ki te uipaanga katoa o te tamariki a Iseraela nei, Ka akavaitata mai kotou ki mua i te aroaro o Iehova; kua akarongo oki aia i ta kotou au urutoeanga.

10 Te tuatua rā Aarona ki taua uipaanga katoa o te tamariki a Iseraela ra, kua anga tika atura ratou ki te pae i te medebara ra, e i na, kua kitea te kakā o Iehova i roto i te tumurangi.

11 Kua tuatua mairā Iehova kia Mose, na ko maira,

12 Kua akarongo akenei au i te au urutoeanga a te tamariki a Iseraela: e tuatua ana koe kia ratou, e na ko atu, Kia aiai kotou ka kai ei i te kinaki, e kia popongi kotou e merengo ei i te areto; e ka kite kotou e, ko au to kotou Atua ko Iehova.

13 E aiai iora, ko te manu maira, e ngaro roa iora taua puakapa ra; e ao akera, kua topa maira te au e pini ua ake taua puakapa ra.

14 E peke akera taua au i topa ra, i na, e mea rikiriki punupunu, tei raro i te one i taua medebara ra, e mea rikiriki mei te topata au te tu.

15 E kite akera te tamariki a Iseraela i taua mea ra, tuatua akera ratou ki ratou uaorai, Eaa teia? kare oki ratou i kite i te reira. Kua tuatua akerā Mose kia ratou, Ko taua kai ra teia ta Iehova i oronga mai na kotou e kai.

16 Teia ta Iehova tuatua i akaue maira, E koi te tangata ravarai i te ka pou iaia kia kai, okotai tangata okotai omera, e kia tau tikai ki te tangata i roto i tona puakapa kia tatou ra, ko ta kotou ïa e rave.

17 Kua pera oki te tamariki a Iseraela, kua koi ratou, e mea maata ta tetai, e mea iti ta tetai.

18 E kua aite iora i te omera, kia kore e akamaataia ta tei koi i te mea maata, e kia koe oki e akaitiia ta tei koi i te mea iti ra: ko tei aite ki te tangata ravarai kia kai ra, ko ta ratou ïa i koi mai.

19 Kua tuatua akerā Mose kia ratou, Auraka rao tetai tangata e vaoo i tetai vaʼi no te popongi.

20 Kare akera ratou i akarongo ia Mose; vaoo iora tetai aronga i tetai vaʼi no te popongi, e tungaia iora ïa, aunga kino atura: riri akerā Mose ia ratou.

21 Kua koi iora ratou i taua kai ra i te au popongi katoa ra, ko te aite ki te tangata katoa kia kai ra: kia veravera iora oki te rā ra, kua taʼe ïa.

22 E te rā ono ra, e rua tuanga kai ta ratou i koi i reira, taki rua omera i te tangata okotai: e kua aere anake maira te aronga rangatira o taua uipaanga ra, kua akakite maira kia Mose.

23 Kua karanga atura ra aia kia ratou, Teia ta Iehova i tuatua maira, E rā akaangaroi anga apopo, e sabati tapu ïa no Iehova: e keu ta kotou e anoano i te keu, e ka tunu oki i ta kotou e anoano i te tunu; e tei toe ra, e vaoo ïa na kotou kia popongi.

24 Kua vaoo iora ratou i taua mea ra ta Mose i karanga ra, e kia ao ake: kare ïa i aunga kino, e kare rava e tunga o roto.

25 Kua karanga aturā Mose, Ka kai, ei kai no teianei rā; e rā sabati oki teia no Iehova: kare ïa e kitea e kotou ki vao i teianei rā.

26 Ko e ono puke rā ka koi ïa kotou i taua kai ra; kareka te rā itu ra, ko te sabati ïa, kare ïa e kitea i reira.

27 Kua aere ra tetai papaki tangata ki vao i te rā itu ra e koi i taua kai ra, kare rava ra i kitea e ratou.

28 Kua tuatua mairā Iehova kia Mose, Mei te aa te roa o to kotou akono kore anga i taku au akauenga, e taku ture?

29 Akara na, na te mea kua oronga mai a Iehova i te sabati no kotou, i oronga mai ei aia, i te rā ono nei, i te kai no nga rā e rua katoa ïa: e noo ua kotou ravarai, ko te tangata ko tona ngai; auraka roa ei tangata e aere ki vao i tona ngai i te rā itu ra.

30 Kua akaangaroi ua iora te tangata i te rā itu.

31 Tapa iora te ngutuare o Iseraela i te ingoa o taua mea ra, e Māna: e teatea, mei te ua korio te tu; e mei te uefa meli ra kia kai.

32 Kua karangā aturā Mose, Teia te tuatua ta Iehova i akaue mai, E akaki i tetai omera ki taua kai nei, e vaoo e ope ua atu to kotou au uki ra; kia kite ratou i te kai taku i angai atu ia kotou i te medebara, iaku i arataki mai ia kotou mei te enua maira mei Aiphiti.

33 Kua tuatua akerā Mose kia Aarona, Ka rave i tetai kapu, ka tuku ei i tetai omera māna ki roto, ka vaoo ei ki mua i te aroaro o Iehova, kia vaio ua ana e ope ua atu to kotou au uki ra:

34 Ko ta Iehova i tuatua mai kia Mose ra, koia oki ta Aarona i tuku i te pae o nga papa kite ra, kia vaoo ua ana i reira.

35 E a ngauru anga o te tamariki a Iseraela mataiti i te keinga i te māna, e tae ua atura ratou ki te enua tangata; i kai ua ratou i te māna, e tae ua akera ratou ki te pae o te enua ra o Kanaana.

36 Okotai ngauru omera, okotai ïa epha.